ކުރިއަށް އޮތް ތަނުގައި ވެސް ނިއުރޭޑިއަންޓް ސްޕޯޓްސް ކުލަބުގެ ކޯޗަކަށް ހުންނާނީ ސޮބާހް މުޙައްމަދު (ސޮބާ) ކަމަށް އެ ޓީމުގެ ޗެއާމަން އަޙުމަދު ވާސިފް ބުނެފިއެވެ.
ވާސިފް މިހެން ބުނީ ދެ ވަނަ ޑިވިޝަންގެ ސެމީ ފައިނަލްގައި ޕެނަލްޓީ ޖަހައިގެން ބުރު ސްޕޯޓްސް ކުލަބް އަތުން ބަލިވެ ނިއު ކެޓުމާ ގުޅިގެން ސޮބާ ކުރި ޕޯސްޓަކަށް ކުރި ކޮމެންޓެއްގައެވެ.
މީގެ ކުރިން ވެސް ނިއުގެ ކޯޗެއްގެ ގޮތުގައި މަސައްކަތްކޮށްފައިވާ ސޮބާ ކުރި ޕޯސްޓުގައި ބުނީ، އޭނާއަށް ލިބުނީ ނިސްބަތުން ތަޖުރިބާހުރި ލިމިޓެޑް ކުޅުންތެރިން ކަމަށެވެ. ސޮބާ ބުނީ އޭނާ ނިއުރޭޑިއަންޓާ ހަވާލުވީ ރަނގަޅު މަސައްކަތެއްކޮށް, ނިއުރޭޑިއަންޓް ފުރަތަމަ ޑިވިޝަނަށް ގެންދިއުމަށް މަސައްކަތްކުރުމުގެ ހެޔޮ ނިޔަތުގައިކަމަށެވެ. ނަމަވެސް އެކަން ނުވުމުން ސަޕޯޓަރުން މާޔޫސްވާނެކަން އެނގޭކަމަށާއި, އަދި މިއީ ނިއުރޭޑިއަންޓްގެ ސަޕޯޓަރުންނަށް ޤަބޫލުކުރަން ފަސޭހަ ނަތީޖާއަކަށްވެސް ނުވެދާނެކަމަށެވެ.
އެ ޕޯސްޓުގައި ވާސިފް ކުރި ކޮމެންޓެއްގައި ބުނީ، ކުރިއަށް އޮތް ތަނުގައި ވެސް ނިއުގެ ކޯޗަކަށް ހުންނާނީ ސޮބާ ކަމަށެވެ. އަދި އޭނާ ވަނީ ސޮބާ އަކީ ހަމައެކަނި ނިއުގެ ކޯޗު ނޫން ކަމަށާއި، އޭނާ އަކީ މެނޭޖުމަންޓުގެ ވެސް މެމްބަރެއް ކަމަށް ބުނެފައެވެ. މީގެ އިތުރުން ވާސިފް ވަނީ ލިބުނު ކުޑަ ވަގުތު ކޮޅުގެ ތެރޭގައި ސޮބާ ކުރީ ރަނގަޅު މަސައްކަތައް ކަމަށް ވެސް ބުނެފައެވެ.
ދެންވެސް، އަދިވެސް، މާދަމާވެސް ނިއު ރޭޑިއަންޓުގެ ކޯޗަކަށް ހުންނާނީ ސޮބާހް މުޙައްމަދު. އަހަރަމެން މަސައްކަތް ކުރީ ޓީމެއްގެ ގޮތުގައި. ސޮބާ އަކީ ހަމައެކަނި ނިއު ރޭޑިއަންޓް ސްޕޯޓްސް ކުލަބުގެ ކޯޗެއް ނޫން، ތިއީ މެނޭޖުމަންޓުގެ ވެސް މެމްބަރެއް. އަންނަ އަހަރު އަހަރަމެން އެނބުރި އަންނާނީ ވަރުގަދަކޮށް، އިންޝާﷲ. އަހަރަމެންނަށް ލިބުނު މަދު ވަގުތު ކޮޅުގެ ތެރޭގައި ކޯޗެ ކޮށްދިނީ ރަނގަޅު މަސައްކަތެއް.އަޙުމަދު ވާސިފް / ނިއު ރޭޑިއަންޓުގެ ޗެއާމަން
ސެމީ ފައިނަލްގައި ބުރު އަތުން ބަލިވުމުން، ނިއުއަށް ވަނީ އަލުން ފުރަތަމަ ޑިވިޝަނަށް ޕްރޮމޯޓްވާން ކުރި މަސައްކަތް ނާކާމިޔާބުވެ, އެއިންތިޒާރު އިތުރު އަހަރަކަށް ދިގުލައިފައެވެ. ގިނަ ދުވަސްތަކެއް ވަންދެން ސަސްޕެންޝަންގައި އޮތުމަށްފަހު، ނިއު އެކަމުން ސަލާމަތްވީ ވެސް ދެ ވަނަ ޑިވިޝަން ފެށެން މަދު ދުވަސްކޮޅަކަށް ވެފައި ވަނިކޮށެވެ.
ސޮބާ ވަނީ މީގެ ކުރިން ދެ ފަހަރަކު ނިއު އަށް ކޯޗުކަން ކޮށްދީފައެވެ. އެއީ 2015 ވަނަ އަހަރާއި 2018 ވަނަ އަހަރުއެވެ.
