އެސްޓީއޯގެ ގޮދަންފުށް ފެކްޓަރީގެ މަސައްކަތް އަންނަ އަހަރުގެ ފަހުކޮޅަށް ނިންމާލެވޭނެ: އަމްރު
ކުޅުދުއްފުށި ޚިޔާރުކުރީ އެރަށަކީ އުތުރުގެ ވިޔަފާރީގެ މައި ހަބު ކަމަށްވުމުން
ކުޅުދުއްފުށީ ސިޓީ ކައުންސިލް އާއި އެސްޓީއޯގެ ސީއީއޯ އަދި މެނޭޖިންގ ޑިރެކްޓަރ އަލްފާޟިލް ހުސައިން އަމްރު ބޭއްވި ބައްދަލުވުމުގެ ތެރެއިން
ހދ ކުޅުދުއްފުށީގައި ޤާއިމުކުރާ ގޮދަންފުށް ފެކްޓަރީގެ މަސައްކަތް އަންނަ އަހަރުގެ ފަހުކޮޅަށް ނިންމާލެވޭނެކަމަށް އެސްޓީއޯގެ މެނޭޖިންގ ޑިރެކްޓަރ ހުސައިން އަމްރު ވިދާޅުވެއްޖެއެވެ.
އަމްރު އެހެން ވިދާޅުވީ ދައުލަތުގެ މީޑިއާގެ ޕްރޮގްރާމެއްގައި ވާހަކަ ދައްކަވަމުންނެވެ. އެގޮތުން ގޮދަންފުށް ފެކްޓަރީ ތަރައްޤީކުރުމުގެ މަސައްކަތް އަންނަ އަހަރުގެ ފަހުކޮޅަށް ނިންމާލެވޭނެ ކަމަށް އަންދާޒާ ކުރެވޭކަމަށް އަމްރު ވިދާޅުވެއެވެ.
އަމްރު ވިދާޅުވީ އެކުންފުނީގެ ގޮދަންފުށް ކާރުޚާނާ ޤާއިމުކުރުމަށް ކުޅުދުއްފުށި ޚިޔާރުކުރީ އެރަށަކީ އުތުރުގެ ވިޔަފާރީގެ މައި ހަބު ކަމަށްވެފައި، އެ ސަރަޙައްދަކީ އެފަދަ ކާރުޚާނާއެއް ހިންގުމަށް އެންމެ ރަނގަޅު އެއް ސަރަޙައްދަށް ވުމުންކަމަށެވެ. އަދި މިކަމުގެ ސަބަބުން އެ ސިޓީއަށާއި، އެ ސަރަޙައްދަށްވެސް ވިޔަފާރިއާއި އިޤްތިޞާދީގޮތުން އެތައް ކުރިއެރުންތަކެއް ލިބިގެންދާނެކަމަށް އަމްރު ފާހަގަކުރެއްވިއެވެ.
އޭގެ އިތުރުން، މިފަދަ ކާރުޚާނާއެއް ރާއްޖޭގައި ޤާއިމު ވެގެންދިއުމުގެ ސަބަބުން އެކި ބޭނުންތަކަށް ޚާއްސަ ފުށް ތާޒާކަމާއިއެކު އުފެއްދޭނަކަމަށާއި، އެތަކެތި ރައްކާކޮށްފައި ބެހެއްޓޭނެ މުއްދަތު އިތުރުވެގެންދާނެކަމަށް އަމްރު ވަނީ ވިދާޅުވެފައެވެ.
އަދި އަމިއްލަ ފަރާތްތަކާއި ކާބޯތަކެތި އުފެއްދުމުގެ ދާއިރާގައި ހަރަކާތްތެރިވާ ގިނަ ފަރާތްތަކާއި ވިޔަފާރިކުރާ ފަރާތްތަކަށް ބޭނުންވާ އެކި ވައްތަރުގެ ފުށް މި ކާރުޚާނާއިން ރާއްޖޭގެ ބާޒާރަށް ނެރޭނެކަމަށްވެސް އަމްރު ވިދާޅުވެއެވެ.
މިއީ ކުޅުދުއްފުށީގެ ތަރައްޤީއަށް އިތުރުވެގެންދާ ބޮޅެއްކަމަށާއި، މިކަމުގެ ސަބަބުން އިތުރު ވަޒީފާ ތަކެއް އުފެދިގެން ދާނެކަމަށް ކުޅުދުއްފުށީ ސިޓީ ކައުންސިލުންވެސް ވަނީ ބުނެފައެވެ.
