ފަނޑިޔާރުކަމަކީ ހަމައެކަނި ވަޒީފާއެއް އަދާކޮށްލުމެއް ނޫން: ހިސާން
ފަނޑިޔާރުކަމުގެ ހުވަޔާއެކު ޙަވާލުވެގެންދަނީ ވަރަށް ބޮޑު ޒިންމާއެއް
ޖޭއެސްސީގެ ރައީސް ހިސާން ހުސައިން
ފަނޑިޔާރުކަމަކީ ހަމައެކަނި ވަޒީފާއެއް އަދާކޮށްލުމެއް ނޫންކަމަށް ޖޭއެސްސީގެ ރައީސް ހިސާން ހުސައިން ވިދާޅުވެއްޖެއެވެ.
ހިސާން އެހެން ވިދާޅުވީ ދިވެހިރާއްޖޭގެ ހައިކޯޓަށް އަލަށް އައްޔަނު ކުރެއްވި ފަނޑިޔާރުން ހުވާ ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
މި ރަސްމިއްޔާތުގައި ދެއްކެވި ވާހަކައިގައި ހިސާން ވަނީ ފަނޑިޔާރުކަމުގެ ޒިންމާއާއި މަސްއޫލިއްޔަތު އެންމެ ފުރިހަމަ ގޮތުގައި އަދާކޮށްދެއްވުމަށް ފަނޑިޔާރުންނަށް ގޮވާލައްވާފައެވެ.
ހިސާން ވިދާޅުވީ، ފަނޑިޔާރުކަމުގެ ހުވަޔާއެކު ޙަވާލުވެގެންދަނީ ވަރަށް ބޮޑު ޒިންމާއެއް ކަމަށެވެ. އެގޮތުން ފަނޑިޔާރުންގެ މަސައްކަތްތަކަކީ އެތަކެއް ބައެއްގެ ޙައްޤުތަކާއި ގުޅިފައިވާ މަސައްކަތެއްކަން ހިސާން ފާހަގަ ކުރެއްވިއެވެ.
މި މަސައްކަތަކީ ފަރުވާ ކުޑަކުރެވޭ ޒާތުގެ މަސައްކަތެއް ނޫންކަންވެސް ހިސާންގެ ވާހަކައިގައި ފާހަގަ ކުރެއްވިއެވެ. އެގޮތުުން އެކަންކަމަކީ އަދުލަށް ނޫން ގޮތަކަށް ނިމިގެންވާނެ ކަންކަމެއްވެސް ނޫންކަމަށް ހިސާން ވިދާޅުވިއެވެ.
ފަނޑިޔާރުކަމަކީ ހަމައެކަނި ވަޒީފާއެއް އަދާކޮށްލުން ނޫންކަމަށް ހިސާން ވިދާޅުވިއެވެ. އެގޮތުން އެއީ ދީނީ ގޮތުންނާއި، ދުނިޔަވީ ގޮތުންވެސް ވަރަށް ބޮޑު ހިއްސާއެއް އޮތް މަސައްކަތެއްކަން ފާހަގަ ކުރެއްވިއެވެ.
ހިސާން ވަނީ ފަނޑިޔާރުކަމުގެ ޒިންމާ އެންމެ ފުރިހަމައަށް އަދާކުރުން މަތީ ދެމިތިބުމަށް ފަނޑިޔާރުންނަށް ގޮވާލައްވާފައެވެ. އެއީ ހަމައެކަނި ލިބިފައިވާ ތައުލީމުގެ މައްޗަށް ބިނާކޮށް ކުރެވިދާނެ ކަމެއް ނޫންކަމަށް ހިސާން ވިދާޅުވިއެވެ.
ހިސާން ވިދާޅުވީ، ފަނޑިޔާރުންނަކީ އިލްމާއި ހިލްމުގެ ވެރި ބަޔަކަށް ވާން ޖެހޭ ކަމަށެވެ.
ހައިކޯޓުގެ ފަނޑިޔާރުކަމަށް ޢައްޔަން ކުރުމަށް ކޮމިޝަނަށް ލަފާ އަރުވާފައިވާ ކ.މާލެ މ.ގުލްޝަން، އަލްއުސްތާޛާ ދީބާނާޒް ފަހުމީ އާއި ފ.ބިލެތްދޫ، މޯނިންގްވިލާ، އަލްއުސްތާޛު މުޙައްމަދު ސަލީމް ދިވެހިރާއްޖޭގެ ހައިކޯޓުގެ ފަނޑިޔާރުކަމުގެ ހުވާ ވަނީ ކުރައްވާފައެވެ.
