ތުރުކީގެ ކޮންޏާގައި މިހާރު ކުރިއަށްދާ އިސްލާމިކް ސޮލިޑާރިޓީ ގޭމްސްގެ ޓޭބަލް ޓެނިސް (ޓީޓީ) ޓީމު އިވެންޓުގެ ފުރަތަމަ ބުރުގައި ޖުބޫޓީ އަތުން ރާއްޖޭގެ އަންހެން ޓީމު މޮޅުވެއްޖެއެވެ.

ޖިބޫޓީއާ ދެކޮޅަށް ކުޅުނު މެޗު ރާއްޖެއިން ކާމިޔާބުކުރީ ސީދާ ތިން ގޭމުންނެވެ. މެޗުގެ ފުރަތަމަ ސިންގަލްސްގައި ރާއްޖެއިން ކުޅެން ނުކުތީ ފާތިމަތު ޖުމާނާ ނިމާލްއެވެ. ޖުމާނާ ވަނީ ފުރަތަމަ ގޭމު ސީދާ ތިން ސެޓުން ކާމިޔާބުކޮށްފައެވެ. އެއީ 11-02، 11-09 އަދި 12-10 އިންނެވެ. އަންހެން ސިންގަލްސްގެ ދެ ވަނަ ގޭމުގައި ރާއްޖެއިން ނުކުތީ ފާތިމަތު ދީމާ އަލީ އެވެ. ދީމާ ވެސް ވަނީ މި ގޭމު ސީދާ ތިން ސެޓުން ކާމިޔާބުކޮށްފައެވެ. އެއީ 11-03، 11-07 އަދި 11-03 އިންނެވެ.

ފަހު ގޭމުގައި ޑަބަލްސްގައި ނުކުމެ ރާއްޖޭގެ އައިޝަތު ރަފާ ނާޒިމް އާއި ދީމާ ވަނީ ސީދާ ތިން ސެޓުން ގޭމު ކާމިޔާބުކޮށް މެޗުން މޮޅުވެފައެވެ. މި ގޭމުގެ ސެތުތައް ރާއްޖެއިން ހޯދީ 12-10، 11-06 އަދި 11-06 އިންނެވެ. މެޗު ރާއްޖެއިން ނިންމާލީ އެންމެ ސެޓެއް ވެސް ގެއްލުވާ ނުލައެވެ.

އަންހެން ޓީމަށް މިއަދު ދެން އޮތީ ތުރުކީއާ ދެކޮޅަށް ކުޅޭ މެޗެވެ. ފިރިހެން ޓީމަށް އޮތީ އީރާނާ ދެކޮޅަށް ކުޅޭ މެޗެވެ.