ލިބުނު ވަގުތާ ބަލާފަ މިއީ ކުރިއެރުމެއް: ޝައްފާން

މުބާރާތަށް ތައްޔާރުވުމަށް ލިބުނު ވަގުތާ ބަލާފައި، ކުރިއެރުމެއް ލިބުނު ކަމަށް ޤަބޫލުކުރެވޭ ކަމަށް ރާއްޖޭގެ ޓޭބަލް ޓެނިސް (ޓީޓީ) ކުޅުންތެރިޔާ އިސްމާއިލް ޝައްފާން ބުނެފިއެވެ.

ތުރުކީގެ ކޮންޏާގައި ކުރިއަށްދާ އިސްލާމިކް ސޮލިޑާރިޓީ ގޭމްސްގެ ޓީޓީ ފިރިހެން ސިންގަލްސްގައި ޝައްފާން ވަނީ ވާދަކޮށްފައެވެ. ޝައްފާން ވަނީ މުބާރާތުގެ ގަދަ 16 އާ ހަމައަށް ދަތުރުކޮށްފައެވެ. ފުރަތަަމަ ބުރުގައި ޝައްފާން ނުކުތީ ޓޯގޯގެ އަޓާރޫ އަސޫއާ ދެކޮޅަށެވެ. އޭނާގެ މައްޗަށް ސީދާ ތިން ސެޓުން ކުރި ހޯދައި، ޝައްފާން ވަނީ ގަދަ 32 ކުޅުްތެރިންގެ ބުރަށް ދަތުރުކޮށްފައެވެ. އެ ބުރުގައި އަޒަރުބައިޖާންގެ އާދިލް އަހުމަދު ޒާދާ ވާދަކޮށް ވެސް ޝައްފާން ވަނީ ސީދާ ތިން ސެޓުން މޮޅުވެފައެވެ. އެއީ، 11-09، 11-03 އަދި 11-09 އިން ސެޓުތައް ހޯދައިގެންނެވެ.

ގަދަ 16 ގައި ޝައްފާން ނުކުތީ އީރާންގެ ސައްޔިދު އާމިރު ހުސެއިން ހޯދާއީއާ ދެކޮޅަށެވެ. އޭނާ އަތުން ޝައްފާން ވަނީ ސީދާ ތިން ސެޓުން ބަލިވެފައެވެ. އެއީ 11-09، 11-6 އަދި 11-07 އިންނެވެ.

ޝައްފާން ބުނީ އައު ކޯޗަކާއެކު މުބާރާތަށް ތައްޔާރުވާން ލިބުނު ވަގުތާ އަޅާ ބަލާއިރު، ރަނގަޅު ކުރިއެރުމެއް ލިބުނު ކަމަށެވެ. މީގެ އިތުރުން ޝައްފާން ބުނީ އާމަޒަކަށްވީ ވީހާވެސް ރަނގަޅަށް ޕާފޯމް ކުރުން ކަމަށާއި، އުންމީދުކުރި ވަރަށްވުރެ ރަނގަޅަށް ކުޅެވުން ކަމަށެވެ. ޝައްފާން ބުނީ މުބާރާތަކަށް އޭނާ އައީ ވަރަށް ދުވަހަށްފަހު ކަމަށާއި، އެ ހުރިހާ ކަމަކަށް ބަލާއިރު، ކުޅުމާމެދު ހިތްހަމަ ޖެެހޭ ކަމަށެވެ.

ޝައްފާން ބުނިީ އެންމެ އުނގަދޫކަމަކަށް ދިމާވީ ގިނަ މެޗު ކުޅެން ނުލިބުމުގެ މައްސަލަ ކަމަށެވެ.

އިތުރަށް ޝައްފާން ބުނީ އަބަދުވެސް މަސައްކަތް ކުރަން ޖެހޭނީ މޮޅުވާން ކަމަށެވެ. ޝައްފާން ފާހަގަ ކުރި ގޮތުގައި ރަނގަޅު ކޯޗެއްގެ އިރުޝާދުގެ ދަށުން އަހަރެއްހާ ދުވަހު ފަރިތަކުރުންތައް ލިބުނަސް ވަރަށް ބޮޑު ކުރިއެރުމެއް ލިބޭނެކަމަށެވެ. އަލަށް ގެނައި ކޯޗާއެކު ފަރިތަކުރެވުނީ މަދު ދުވަސް ކޮޅެއްކަން ފާހަގަ ކުރަމުން ޝައްފާން ބުނީ، އެ މުއްދަތުގައި ކޯޗު ބުނެދިން ކަންކަމާއެކު ކުޅުނީމާ ރަނގަޅު ކުޅުމެއް ދެއްކޭ ކަމަށެވެ. އެހެންކަމުން ކުރިއަށް އޮތް ތަނުގައި ކޯޗުގެ އިރުޝާދުގެ ދަށުން ކުރިއަށް ދިޔައީމަ ރަނގަޅުވާނެ ކަމަށް ޝައްފާން ބުންޏެވެ.

ގޭމްސްގައި ސިންގަލްސް އިވެންޓުތަކަށްފަހު ދެން ރާއްޖެ އަށް އޮތީ ޓީމު އިވެންޓެވެ. ރާއްޖޭގެ ފިރިހެން ޓީމު ހިމެނިފައިވަނީ ބަންގްލަދޭޝް އަދި އިރާނާއެކު އެއް ގްރޫޕެއްގައެވެ.