މާޒިޔާގެ މެނޭޖްމަންޓުން އެއްވެސް އިރެއްގައި އެއްވެސް ވަރެއްގެ ޕްރެޝަރެއް ކުޅުންތެރިންނަށް ނުދޭކަމަށް ވައިސް ކެޕްޓަން މުޙައްމަދު އިރުފާން (އިރޭ) ބުނެފިއެވެ.

ވިދިވިދިގެން ތިންވަނަ ފަހަރަށް ލީގު ޗެމްޕިއަންކަން ހޯދުމަށްފަހު އިރޭ ބުނީ އޭނާ މާޒިޔާގައި ހޭދަކުރި އަހަރުތަކުގައި އެފަދަ ކަމެއް ކުރިމަތިވެފައި ނެތްކަމަށެވެ. އިރޭއަކީ މިދިޔަ 10 އަހަރު މާޒިޔާގެ މެދުތެރެއާއި ފަހަތުގައިވެސް މުހިއްމު ދައުރެއް އަދާކުރި ކުޅުންތެރިއެކެވެ.

އިރޭ ބުނީ މާޒިޔާއިން އެކުރާ ޚަރަދާއި, އެހެންވެސް ކަންކަމަށް ބަލާ އެޓާގެޓްތަކަށް ވާޞިލްވުމަކީ އަދި އެކަމަށް މަސައްކަތްކުރުމަކީ ކުޅުންތެރިންގެ ޒިންމާއެއްކަމަށެވެ. އެއީ މާޒިޔާއިން ދޭ ޕްރެޝަރެއް ނޫންކަމަށާއި, ޕްރެޝަރެއް ނެތި އެއްވެސް ކުޅުންތެރިއަކަށް ފުޓްބޯޅަ ނުކުޅެވޭނެކަމަށް އިރޭ ބުންޏެވެ.

ޤައުމީ ފުޓްބޯޅަ ޓީމްގެ %90 ކުޅުންތެރިންނާއެކު މާޒިޔާ ނިކުންނަނީ މުޅިން ސީޒަން ކާމިޔާބުކުރުމަށެވެ. ނަމަވެސް މިއަހަރު ޕްރެޒިޑެންޓްކަޕް ވަނީ ގެއްލިފައެވެ. ލީގު ހޯދީ 21 މެޗުގެ ތެރެއިން 20 މެޗުން މޮޅުވެގެންނެވެ.