އައްޑޫ ސިޓީ ހިތަދޫއިން އަނެއްކާވެސް ސީލްއެއް ފެނިއްޖެއެވެ.
މައުލޫމާތުލިބޭގޮތުގައި އެ ސީލް ފެނިފައިވަނީ ހިތަދޫ ކިނބިވައު ސަރަހައްދުގެ އަތިރިމަތިންނެވެ.
މިދިޔަ ހަފުތާގައިވެސް އައްޑޫއިން ސީލްއެއް ފެނިފައިވެއެވެ. އެހެންނަަމަވެސް އެއީ އެދުވަހު ފެނުނު ސީލްކަމެއް ޔަގީނެއްނޫނެވެ.
ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަގޮތުގައި، އާދިއްތަ ދުވަހު ކިނބިވައު ބީޗްއިން ފެނުނު ސީލް އޮތީ ވަރަށް ބޮޑަށް އެއްގަމަށް އަރާފައެވެ. އެ ސީލްގެ ދިގުމިނުގައި ގާތްގަނޑަކަށް 8 ފޫޓު ހުރިކަމަށް މަންޒަރު ދުށް ބައެއް މީހުން ބުނެފައިވެއެވެ.
މީގެ ކުރިން އައްޑޫސިން ސީލްއެއް ފެނުމާގުޅިގެން އީޕީއޭއިން ވަނީ، ރާއްޖެއަށް އެކިފަހަރުމަތިން ބެހިގެން އަންނަ ސީލްފަދަ ޖަނަވާރު ހިފުމާއި މިފަދަ ދިރުންތަކަށް ގޯނާއެއްވާކަހަލަ އެއްވެސް އަމަލެއް ނުކުރުމަށް އިލްތިމާސްކޮށްފައެވެ. އަދި އެ ބާވަތުގެ ސީލްއަކީ އިންސާނުންނަށް ނުރައްކާތެރި ޖަނަވާރެއް ނޫންކަމަށްވެސް އީޕީއޭއިން ބުނެފައިވެއެވެ.
