އެމެރިކާގެ ހައުސް އޮފް ރެޕްރެޒެންޓޭޓިވްސްގެ ގެ ސްޕީކަރ ނޭންސީ ޕެލޯސީ ޓައިވާނަށް ޒިޔާރަތް ކުރެއްވުމާއި ގުޅިގެން އެމެރިކާއާއި މެދު ފިޔަވަޅު އެޅުމުގެ ގޮތުން ޗައިނާއިން އެ ޤައުމާއެކު ކުރަމުން އައި މުހިންމު މަޝްވަރާތަކެއް މަޑުޖައްސާލައިފިއެވެ.

މި މަޝްވަރާތަކުގެ ތެރޭގައި ދެ ޤައުމުގެ ސީނިއަރ ލެވެލްގެ މިލިޓަރީ ކޮމާންޑަރުންގެ މަޝްވަރާތަކާއި މޫސުމަށް އަންނަ ބަދަލު ޔަކާއި ގުޅޭގޮތުން ބާއްވަން ނިންމާފައިވާ މަޝްވަރާތައް ހިމެނެއެވެ.

ޗައިނާގެ ފޮރިން މިނިސްޓްރީއާއި ހަވާލާދީ ރޮއިޓަރސްގައި ބުނެފައިވަނީ ދެ ޤައުމުގެ ގިނަ މަޝްވަރާތަކެއް މިވަގުތަށް މަޑުޖައްސާލާފައިވާ ކަމަށެވެ. އެގޮތުން، ކްރޮސް ބޯޑަރ ކްރައިމް އާއި މަސްތުވާތަކެއްޗާއި ޓްރެފިކިންގ އާއި ގަވާއިދާ ޚިލާފަށް ދިރިއުޅޭ މީހުންނާއި ގުޅުންހުރި މަޝްވަރާތައް ވެސް ހިމެނޭ ކަމަށް ވަނީ ބުނެފައެވެ. އަދި ޕެލޯސީގެ ދަތުރުފުޅާއެކު މެރިޓައިމް މިލިޓަރީ ސެކިއުރިޓީ މެކޭނިޒަމް އާއި ގުޅިގެން ބާއްވަން ތާވަލު ކޮށްފައި އޮތް ބައިލެޓްރަލް ބައްދަލުވުމެއް ވެސް ޗައިނާއިން ވަނީ ކެންސަލް ކޮށްފައެވެ.

ޕެލޯސީ ޓައިވާނަށް ކުރެއްވި ޒިޔާރަތަކީ ޓައިވާނުން ގެންގުޅޭ ވަކިވެގަތުމުގެ ވިސްނުމަށް ތާއީދުކޮށް އެމެރިކާއިން ކުރިޔަށް ގެންދާ ހަރަކާތެއް ކަމަށް ބުނެ ޗައިނާއިން ވަނީ އެ ދަތުރުފުޅު ކުށްވެރިކޮށްފައެވެ. އަދި އެއީ އަލިފާނާ ކުޅުން ފަދަ ކަމެއްގެ ގޮތުގައި އެ ޤައުމުން ވަނީ ސިފަކޮށްފައެވެ.

ޗައިނާގެ ފޮރިން މިނިސްޓްރީން ނެރުނު ބަޔާނުގައި ވަނީ އެގައުމުން އެކަމަށް ވަރަށް ބޮޑަށް ދެކޮޅު ހަދަމުންދަނިކޮށް އޮގަސްޓް މަހުގެ ދެ ވަނަ ދުވަހު ޕެލޯސީ ޓައިވާނަށް ވަޑައިގަތުމަކީ އެގައުމުގެ ވަން-ޗައިނާ ސިޔާސަތާ ދެކޮޅަށް އެމެރިކާއިން ކުރި ވަރަށް ސީރިއަސް ކަމެއް ކަމަށް ބުނެފައެވެ. މިއީ ޗައިނާ އާއި އެމެރިކާއާއި ދެމެދު އެއްބަސްވެފައިވާ ޗައިނާ-ޔޫއެސް ޖޮއިންޓް ކޮމިއުނިކޭ ތަކާ ވެސް ހިލާފުކަމެއް ކަމަށް މިނިސްޓްރީން ވަނީ ބުނެފައެވެ.

އެމިނިސްޓްރީން ވަނީ ޕެލޯސީ ޓައިވާނަށް ވަޑައިގަތުމަކީ ޗައިނާ-އެމެރިކާގެ ގުޅުމަށް ވަރަށް ބޮޑު ހީނަރުކަމެއް ގެނުވާނެ ކަމެއް ކަމަށާއި މިއީ ޗައިނާގެ އިސްތިގުލާލާ ސަރަހައްދީ މިނިވަންކަމަށް އެމެރިކާއިން އަރައިގަތުން ކަމަށް ބުނެފައެވެ.

ޗައިނާގެ ފޮރިން މިނިސްޓްރީން ނެރުނު ބަޔާނުގައި ވަނީ އެމެރިކާއިން 1979 ވަނަ އަހަރު ޗައިނާ އާއެކު އެއްބަސްވި ޗައިނާ-ޔޫއެސް ޖޮއިން ކޮމިނިކޭ ގައިވެސް ޕީޕަލްސް ރިޕަބްލިކް އޮފް ޗައިނާގެ ސަރުކާރަކީ މުޅި ޗައިނާގެ މައި ސަރުކާރުކަމަށް އެމެރިކާއިން ގަބޫލުކުރާކަމަށް އެއްބަސްވެފައިވާ ކަން ވަނީ ފާހަގަކޮށްފައެވެ. އަދި އެމެރިކާއިން ޓައިވާނާއެކު ގުޅުންތައް ބާއްވާނީ މިކަމަށް ރިއާޔަތްކޮށް ކަމަށްވެސް އެއްބަސްވެފައިވާނެ ކަމަށް މިނިސްޓްރީން ވަނީ ފާހަގަކޮށްފައެވެ.