ޔޫއެސް އެއިޑުން ރާއްޖެއަށް 300،000 ޑޮލަރުގެ ހިލޭ އެހީ ދީފި
މިއީ މޫސުމީ ބަދަލުތަކުން ލިބޭ ގެއްލުންތަކުން އަރައިގަތުމަށް ދީފައިވާ އެހީއެއް
ޔޫއެސް އެއިޑުން ރާއްޖެއަށް އެހީވުން
ޔޫއެސް އެޖެންސީ ފޮރ އިންޓަރނޭޝަނަލް ޑިވެލޮޕްމެންޓް (ޔޫއެސްއެއިޑް)އިން ރާއްޖެއަށް 300،000 ޑޮލަރުގެ ހިލޭ އެހީ ދީފިއެވެ.
ޔޫއެސް އެއިޑުން ދިން ހިލޭ އެހީއަކީ މޫސުމަށް އަންނަ ބަދަލުތަކުގެ ސަބަބުން ލިބޭ ގެއްލުންތަކުން އަރައިގަތުމާ ކުރާ މަސައްކަތްތަކަށް އެހީވުމުގެ ގޮތުން ދީފައިވާ އެހީއެކެވެ. މި ހިލޭ އެހީގެ އެއްބަސްވުމުގައި ސޮއިކޮށްފައިވަނީ އެފްޖޭއެސް ކޮންސަލްޓިން ކޯޕަރޭޝަނާއި، އެސްޑީއެފްސީ އިންނެވެ.
ޔޫއެސް އެއިޑުން ބުނީ މި އެހީއާއެކު މޫސުމީ ބަދަލުތަކުން އަރައިގަތުމަށް ފަސޭހައިން ކުރެވެންހުރި ކަންކަން ދެނެގަނެ، މިކަމުން ފަތުރުވެރިކަމަށާއި، މަސްވެރިކަމަށާއި، ދަނޑުވެރިކަމުގެ އިންވެސްޓްމެންޓްތަކަށް ކުރާ އަސަރު ކުޑަކުރުމަށް އެހީތެރިކަން ފޯރުކޮށްދެވިގެންދާނެ ކަމަށެވެ.
ޔޫއެސް އެއިޑުން ބުނީ މޫސުމީ ބަދަލުތަކުގެ ސަބަބުން ލިބޭ ގެއްލުންތަކަށް ހައްލު ހޯދުމަށް މަސައްކަތްކުރުމުގެ ތެރެއިން ޕްރައިވެޓް ސެކްޓަރއާއި، ސަރުކާރާއި، މުޖުތަމައުގެ މެދުގައި ކެޕޭސިޓީ ބިލްޑުކުރުމަށް މަސައްކަތްތަކެއް ކުރެވި، ދެމެހެއްޓެނިވި ގޮތެއްގައި މުސުމީ ބަދަލުތަކުން އަރައިގަތުމަށް މަސައްކަތްކުރެވޭނެ ގޮތްތަކެއް ހޯދައި މަސައްކަތްތަކެއް ކުރެވިގެންދާނެ ކަމަށެވެ.
މި ޕްރޮގްރާމުގެ ތެރެއިން ކްލައިމެޓް ރިސްކު އެސެސްމެންޓުތައް ހެދުމާއި، ޕްރައިވެޓް ސެކްޓަރާއި، ސަރުކާރާ ގުޅިގެން މޫސުމީ ބަދަލުތަކުން ލިބޭ ގެއްލުންތަކުން އަރައިގަތުމަށް މަސައްކަތްކުރުމާއި، މި ދާއިރާއިން ޕްރައިވެޓް ސެކްޓަރުގެ ކެޕޭސިޓީ ބިލްޑުކޮށް، ހޭލުންތެރިކަން އިތުރުކުރުމުގެ މަސައްކަތްތަކެއް ކުރެވިގެންދާނެ ކަމަށް ޔޫއެސް އެއިޑުން ބުނެފައިވެއެވެ. މި ދާއިރާއިން އަލަށް ފަށައިގަންނަ މަސައްކަތްތަކަށް އެހީވުމާއި، ރަށްރަށުގައި ހަރަކާތްތެރިވާ ފަރާތްތަކާ ގުޅިގެން ގާތުން މަސައްކަތްތަކެއް ކުރެވިގެންދާނެ ކަމަށް ޔޫއެސް އެއިޑުން ބުނެފައިވެއެވެ.
