ބައިނަލްއަގުވާމީ ކްރެޑިޓް ރޭޓިން އެޖެންސީ މޫޑީޒް ރޭޓިންގްސް އިން ރާއްޖެއަށް ކުރިން ދީފައިވާ ސީއޭއޭ2 ރޭޓިންގ (ޖަންކް ރޭޓިންގ) ދަމަހައްޓާ އައުޓްލުކް ސްޓޭބަލްއަށް ބަދަލުކޮށްފި އެވެ.

މީގެ ކުރިން މޫޑީޒް އިން ރާއްޖޭގެ ކްރެޑިޓް ރޭޓިން ކަނޑައެޅީ މިދިޔަ އަހަރުގެ ސެޕްޓެމްބަރު މަހުގަ އެވެ. އެއިރު މޫޑީޒް އިން ބުނީ ރޭޓިން ދަށް ކުރީ މޫޑީސްގެ އެސެސްމެންޓުން ރާއްޖެ ބަނގުރޫޓްވުމުގެ ރިސްކް އޮތް ކަމަށް ފެންނާތީ ކަމުގަ އެވެ. މި އަހަރު ވެސް ރޭޓިންގ އަށް ބަދަލު ނުގެނެސް އައުޓްލުކް އަށް ބަދަލު ގެނެސްފައިވާ އިރު މޫޑީޒް އިން ބުނީ ރޭޓިންއަށް މި ލިބުނު ކުރިއެރުމުގެ މައިގަނޑު ސަބަބަކީ ރާއްޖޭގެ މާލީ ސިޔާސަތުތަކުގެ ނަތީޖާއެއްގެ ގޮތުން ރާއްޖޭގެ އިގްތިސާދު ހާލަތު ރަނގަޅުވުމެވެ.

އިގްތިސާދީ ހާލަތު ރަނގަޅުވެފައިވާ ކަމަށް މޫޑީޒް އިން ބުނި އިރު، ދައުލަތުގެ ބަޖެޓް ސަރޕްލަސްގައި ބެހެއްޓުމަށްޓަކައި ޕީއެސްއައިޕީގެ އެއްވެސް ޕްރޮޖެކްޓްކަށް ސަރުކާރުން މި އަހަރުގެ ތެރޭގައި ހަރަދުކޮށްފައި ނުވެ އެވެ. މީގެ އިތުރުން ޕީއެސްއައިޕީގެ ބޮޑެތި ޕްރޮޖެކްޓްތައް ދައުލަތުގެ ބަޖެޓުން ހަރަދު ނުކޮށް ހަރަދު ކުޑަކުރިކަން ދެއްކުމުގެ ގޮތުން ސަރުކާރުން ވަނީ ބިން ހިއްކުމާއި އެއަރޕޯޓުގެ ޕްރޮޖެކްޓްތައް ބަޖެޓުން ހަރަދުކުރަން ނުޖެހޭ ގޮތަށް އެމްއޭސީއެލްއާއި އަދި އެހެނިހެން ކުންފުނިތަކާއި ހަވާލުކޮށްފަ އެވެ.

މޫޑީޒް އިން ބުނީ އައުޓްލުކް އަށް ކުރިއެރުމެއް ލިބުނު ނަމަވެސް އަންނަ އަހަރު ދައްކަން އޮތް ބޭރުގެ ބޮޑު ދަރަންޏާއި އިތުރުވަމުންދާ އެތެރޭގެ ދަރަންޏާމެދު އެ އެޖެންސީގެ ކަންބޮޑުވުން އޮތް ކަމަށެވެ.

މޫޑީސް އިން ބުނީ އަންނަ އަހަރު ދައްކަން ޖެހޭ ސެކިއުރިޓީޒް އާއި އެހެނިހެން ދަރަނީގެ ގޮތުގައި 500 މިލިއަން ޑޮލަރުގެ ދަރަނިތަކާ އެކު ރާއްޖެއަށް އަދިވެސް ގޮންޖެހުންތަކެއް ކުރިމަތިވެފައިވާ ކަމަށެވެ. ރިޒާވް އަދި އެސްޑީއެފް ރަނގަޅުވުމުން ދަރަނި އަދާކުރުމަށް ފަސޭހަވާނެ ކަމަށް ވެސް ބުނެފައިވެ އެވެ.

މޫޑީޒް އިން އައުޓްލުކަށް ބަދަލު ގެނައި ސަބަބުތަކުގެ ތެރޭގައި ސަރުކާރުގެ އިސްލާހީ ފިޔަވަޅުތަކާއެކު ބޭރުގެ ފައިސާގެ ރިޒާވް އިތުރުކުރުމާއި ދަރަންޏާއި އިމްޕޯޓަށް ބޭނުންވާ ފައިސާ ހުންނަކަން ކަށަވަރު ކުރުމަށް އަޅައިފައިވާ ފިޔަވަޅުތަކުގެ ސަބަބު ހިމެނެ އެވެ. އަދި 2024ގައި ރިޒާވްތައް ދަށްވި ނަމަވެސް، އެމްއެމްއޭ އާއި ސޮވެރިން ޑިވެލޮޕްމެންޓް ފަންޑް (އެސްޑީއެފް) ގައި ހުރި ބޭރު ފައިސާ މިހާރު އިތުރުކޮށްފައިވާ ކަމަށް މޫޑީޒް އިން ބުނެ އެވެ.

ވޭތުވެދިޔަ އަހަރު ތެރޭގައި މޯލްޑިވްސް މަނިޓަރީ އޮތޯރިޓީގެ އަތުގައި ހުރި ފޮރިން އެކްސްޗޭންޖް ރިޒާވް އާއި އެސްޑީއެފްގެ އެސެޓްތައް ވަރަށް ބޮޑަށް ރަނގަޅުވެފައިވާ ކަމަށް މޫޑީޒް އިން ބުނެފައިވެ އެވެ. އަދި އޮކްޓޯބަރު 2025 ގެ ނިޔަލަށް ފޮރިން އެކްސްޗޭންޖް ރިޒާވް 859 މިލިއަން ޑޮލަރަށް އަރާއިރު، ގާތްގަނޑަކަށް 3 މަސް ދުވަހުގެ އިމްޕޯޓް ކަވަރު ކުރާއިރު، ސެޕްޓެމްބަރު 2024 ގައި 364 މިލިއަން ޑޮލަރުގެ ޓްރަފް އަށް އަރާފައިވާ ކަމަށް ބުނެ އެވެ.

2026 ވަނަ އަހަރު ދައްކަންޖެހޭ ބޭރުގެ ދަރަންޏަކީ އަދިވެސް ބޮޑު ހުރަހެއްގެ ގޮތުގައި އޮތްއިރު، އެއީ ގާތްގަނޑަކަށް 950 މިލިއަން ޑޮލަރު ކަމަށް މޫޑީޒް އިން ބުނެ އެވެ. ރިޒާވްގައި ވެސް އަދި އެސްޑީއެފްގައި ވެސް ހިމެނޭ ބޭރު ފައިސާގެ ވަސީލަތްތަކަށް ޕްރެޝަރު ބޮޑުވެ، ކައިރި މުސްތަގުބަލުގައި ފައިސާ ދެއްކުމުގެ މި ހާލަތްތަކާ ކުރިމަތިލާއިރު، އަދިވެސް ނުރައްކާ އޮތް ކަމަށް މޫޑީޒް އިން ބުނެ އެވެ.

ކްރެޑިޓް ރޭޓިން ދަމަހައްޓައި އައުޓްލުކަށް ބަދަލެެއް ގެނައި ނަމަވެސް މާލީ އިސްލާހީ ފިޔަވަޅުތައް ތަންފީޒު ކުރުމުގައި ފަހަތު ފަޔަށް ބުރަވާނަމަ ރޭޓިން ދަށްކުރުމުގެ ފުރުސަތު އޮތް ކަމަށް މޫޑީޒް އިން ބުނެ އެވެ.