ޗައިނާއާމެދު އުފެދިފައިވާ ނުތަނަވަސްކަމުގެ ތެރެއިން ޓައިވާންގެ އަސްކަރީ ޙަރަކާތްތައް ވަރުގަދަ ކުރުމަށް ނިންމައިފިއެވެ.

އަންގާރަ ދުވަހު ޓައިވާންގެ ޑިފެންސް މިނިސްޓްރީން ހާމަކޮށްފައިވާ ގޮތުގައި ޓައިވާންގެ ސަރަޙައްދުތަކުގައި އަސްކަރީ ޙަރަކާތްތައް ފުޅާކޮށް، ވަރުގަދަ ކުރަމުންދަނީ ޗައިނާއިން ދެމުންދާ އިންޒާރުތަކާއި ގުޅިގެންނެވެ.

ޓައިވާންގެ ޤައުމީ ސަލާމަތް ރައްކާތެރި ކުރުމަށް ބޭނުންވާ ޤާބިލިއްޔަތުކަމާއި ހިތްވަރު އެބަހުރިކަންވެސް ޓައިވާނުން ވަނީ ފާހަގަކޮށްފައެވެ.

އޭގެ އިތުރުން، ކުއްލި ޙާލަތްތަކުގައި އަމަލު ކުރާނެ ގޮތްތަކެއްވެސް ކަނޑައެޅިފައިވާކަން ޓައިވާންގެ ޑިފެންސް މިނިސްޓްރީން ފާހަގަކޮށްފައިވެއެވެ.

އަންގާރަ ދުވަހު ޗައިނާގެ ހަނގުރާމަމަތީ ބައެއް އުޅަނދުތައް ވަނީ ޓައިވާންގެ ކަނޑުއޮޅި ސަރަޙައްދު ކައިރިން ދަތުރުކޮށްފައެވެ. އެކަމުގެ ސަބަބުންނާއި، އެމެރިކާގެ ހައުސް އޮފް ރެޕްރެޒެންޓޭޓިވްގެ ސްޕީކަރ ނެންސީ ޕެލޯސީ ޓައިވާނަށް ވަޑައިގަންނަވާނެ ކަމުގެ ޚަބަރުތަކުގެ ސަބަބުންވެސް އެ ސަރަޙައްދުގެ މަސްރަހު ވަނީ ހޫނުވެފައެވެ.

ނެންސީ ޕެލޯސީ އޭޝިޔާގެ ބައެއް ގައުމުތަކަށް ކުރައްވާ ދަތުރުފުޅުގައި ޓައިވާނަށް ވަޑައިގަންނަވާނެކަމަށް އެމެރިކާ އާއި ޓައިވާންގެ އިސް އޮފިޝަލުންތަކެއް ވަނީ ވިދާޅުވެފައެވެ. ޕެލޯސީ ޓައިވާނަށް ވަޑައިގަތުމަކީ ހީނަރުވެފައިވާ ޗައިނާ އާއި އެމެރިކާގެ ގުޅުން އިތުރަށް ގޯސްވެ ހާލަތު މުޅިން ގޯސްވެގެން ހިނގައިދާނެކަމެއްކަމަށް ބެލެވޭތީ އެމެރިކާ ސަރުކާރުގެ އޮފިޝަލުންވެސް ވަނީ ޕެލޯސީ ޓައިވާނަށް ވަޑައިގަތުމާމެދު ކަންބޮޑުވުން ފާޅުކުރައްވާފައެވެ.

ޗައިނާގެ ފޮރިން މިނިސްޓްރީން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވަނީ ޕެލޯސީގެ ދަތުރުފުޅާ ގުޅިގެން އިންޒާރުދީފައެވެ. ޗައިނާއިން ދައުވާކުރަމުން އަންނަނީ ޓައިވާނަކީ އެގައުގެ ތަނެއްކަމަށެވެ. ނަމަވެސް އެކަމާ އެމެރިކާއިން ދެކޮޅު ހަދައެވެ.

އަދި ޓައިވާނަކީ ވަކި ދައުލަތެއްގެ ގޮތުގައި އޮތުމަށް އެމެރިކާއިން އަންނަނީ ޓައިވާނަށް ސީދާ ގޮތުންނާއި ނުސީދާ ގޮތުން އެހީތެރިކަން ފޯރުކޮށްދެމުންނެވެ.