ޖާޕާނާއި ޗައިނާ އާ ދެމެދު ސިޔާސީ ކޯޅުން ބޮޑުވެ، ޖަޕާނުން ސީފުޑް އިމްޕޯޓު ކުރުން ޗައިނާ އިން ހުއްޓާލައިފި

ޗައިނާ އާއި ޖަޕާން އާ ދެމެދު އުފެދިފައިވާ ސިޔާސީ ހަމަނުޖެހުންތައް ބޮޑުވަމުން ގޮސް ޖަޕާނުން އުފައްދާ ސީފުޑް ގެ ބާވަތްތައް އެތެރެކުރުން ޗައިނާ އިން މަނާ ކޮށްފި އެވެ.

ޖަޕާނު ގެ ދައުލަތުގެ މީޑިއާ އެން.އެޗް.ކޭ އާއި ކިޔޯޑޯ ނޫސް އެޖެންސީން ބުދަ ދުވަހު ބުނީ، ސީފުޑް ގެ ބާވަތްތައް އެތެރެކުރުން މަނާކޮށްފައި މިވަނީ، 2023 ވަނަ އަހަރު ޖަޕާނު ގެ ފުކުޝިމާ ނިއުކްލިއާ ޕްލާންޓުން ރޭޑިއޯއެކްޓިވް ފެން ކަނޑަށް ދޫކުރުމާ ގުޅިގެން ޗައިނާ އިން ޖަޕާނު ގެ ސީފުޑް އެތެރެ ކުރުން މަނާ ކުރަން އެޅި ފިޔަވަޅުތައް މި މަހުގެ ކުރީކޮޅު އުވާލާފައި ވަނިކޮށްނެވެ.

މި މައްސަލައިގެ މައުލޫމާތު އެނގޭ ފަރާތްތަކާ ހަވާލާދީ ކިޔޯޑޯ ނޫހުން ބުނީ، ފުކުޝިމާ އިން ޕެސިފިކް ކަނޑަށް ދޫކުރާ ފެން އިތުރަށް މޮނިޓަރ ކުރުމުގެ ބޭނުމުގައި މި ފިޔަވަޅު އަލުން އަޅަން ޖެހުނީ ކަމަށް ޗައިނާ އިން ޖަޕާނަށް އަންގާފައިވާ ކަމަށެވެ.

ނަމަވެސް، މި ފިޔަވަޅު އަޅާފައި މިވަނީ، ޖަޕާނުގެ ބޮޑުވަޒީރު ސަނާއޭ ޓަކައިޗީ ދެއްކެވި ވާހަކަފުޅަކާ ގުޅިގެން ޗައިނާ އާއި ޖަޕާނާ ދެމެދުގައި އުފެދިފައިވާ މައްސަލަ އިތުރަށް ގޯސްވެފައިވާ ދަނޑިވަޅެއްގައެވެ.

ނޮވެމްބަރު މަހުގެ 7 ވަނަ ދުވަހު ޕާލަމެންޓުގައި ވާހަކަ ދައްކަވަމުން ބޮޑުވަޒީރު ވިދާޅުވީ، ތައިވާނަށް ޗައިނާއިން ދޭ ހަމަލާއެއްގެ ސަބަބުން ޖަޕާނުގެ ސަލާމަތަށް ނުރައްކާވެއްޖެ ނަމަ، އެއީ ޖަޕާނުގެ އަސްކަރިއްޔާ އިން ރައްދު ދޭންޖެހިދާނެ މަދު ހާލަތްތަކުގެ ތެރެއިން ހާލަތެއް ކަމަށެވެ.

ޓަކައިޗީ ގެ މި ވާހަކަފުޅާ ގުޅިގެން ޗައިނާގެ އޮފިޝަލުންނާއި ދައުލަތުގެ މީޑިއާތަކުން ވަރަށް ބޮޑަށް ފާޑުކިޔުންތައް އަމާޒުކުރިއެވެ. އަދި އޭގެ ސަބަބުން، ޗައިނާގައި ތިބި ޖަޕާނުގެ ރައްޔިތުންނަށް ރައްކާތެރިކަމުގެ ފިޔަވަޅު އަޅައި، މީހުން ގިނަ ތަންތަނަށް ދިއުމުން ދުރުހެލިވުމަށް ޖަޕާނުން ވަނީ އަންގާފައެވެ.

ޓަކައިޗީ ގެ ވާހަކަފުޅަށް ފަހު، އޯސާކާ ގައި ހުންނަވާ ޗައިނާގެ ކޮންސުލް ޖެނެރަލް، ޝުއޭ ޖިއާން، 'އެކްސް' ގައި ކުރެއްވި ޕޯސްޓެއްގައި، "އެ ނުތާހިރު ކަރު ބުރިކޮށްލާނަން" ކަމަށް ވިދާޅުވެ އިންޒާރު ދެއްވިއެވެ. އެއީ ޖަޕާނު ގެ ބޮޑުވަޒީރަށް ދިން ރައްދެއް ކަމަށް ބެލެވެއެވެ. ފަހުން ފުހެލާފައިވާ މި ޕޯސްޓާ ގުޅިގެން ޗައިނާގެ ސަފީރު ހާޒިރުކޮށްފައި ވާނެ ކަމަށް ޓޯކިޔޯ އިން ބުނެފައިވެއެވެ.

ޗައިނާ އިން ވަނީ އެ ޤައުމުގެ ރައްޔިތުންނަށް ޖަޕާނަށް ދަތުރު ނުކުރުމަށް ވެސް ނަސޭހަތްތެރިވެފައެވެ. އަދި ޓަކައިޗީ ގެ ވާހަކަފުޅު އަނބުރާ ގެންދިއުމަށް ޑިމާންޑްކޮށްފައިވެއެވެ. ނަމަވެސް ޖަޕާނުން ބުނީ އެއީ ސަރުކާރުގެ ރަސްމީ ބަސް ކަމަށެވެ.

މި މައްސަލަ ހައްލުކުރުމުގެ މަސައްކަތުގެ ތެރެއިން، ޖަޕާނުގެ ފޮރިން މިނިސްޓްރީގެ އޭޝިއާ ޕެސިފިކް ސަރަޙައްދާ ބެހޭ އެންމެ އިސް އޮފިޝަލް، މަސާކީ ކަނާއީ، އަންގާރަ ދުވަހު ޗައިނާގެ ވެރިރަށް ބެއިޖިން ގައި އޭނާ އާ އެއްފެންވަރުގެ ޗައިނާގެ އޮފިޝަލް، ލިއު ޖިންސޮންގް އާ ބައްދަލުކުރައްވައި ވާހަކަ ދައްކަވާފައިވެއެވެ.

ރަސްމީ ހިސާބުތައް ދައްކާ ގޮތުގައި، އެންމެ ފަހުން ސީފުޑް ގެ ބާވަތްތައް އެތެރެކުރުން މަނާކުރުމުގެ ކުރިން، ޖަޕާނުގެ ސީފުޑް ގެ އުފެއްދުންތައް އެކްސްޕޯޓްކުރާ ޤައުމުތަކުގެ ތެރެއިން އެންމެ ބޮޑު ބަޔެއް ހިއްސާ ކުރީ ޗައިނާއެވެ.

މި މައްސަލަ ވަނީ ޗައިނާ އާއި ޖަޕާނުގެ ގުޅުމުގެ އެހެން ދާއިރާތަކަށް ވެސް ފެތުރިފައެވެ. އެގޮތުން، ޗައިނާގެ ދައުލަތުގެ ބާރުގެ ދަށުން ހިންގާ ޗައިނާ ފިލްމް އެޑްމިނިސްޓްރޭޝަނުން ނެރޭ 'ޗައިނާ ފިލްމް ނިއުސް' އިން ވަނީ، ޖަޕާނުގެ ދެ ފިލްމެއް ރިލީޒްކުރުން ފަސްކޮށްފައިވާ ކަމަށް އިއުލާނު ކޮށްފައެވެ.

ފިލްމުތަކާ ބެހޭ މައުލޫމާތު ގެނެސްދޭ ވެބްސައިޓެއް ކަމަށްވާ 'ޑައުބާން' އިން ބުނާ ގޮތުގައި، އެ ދެ ފިލްމު ރިލީޒްކުރުމަށް ކުރިން ހަމަޖެހިފައި އޮތީ ޑިސެމްބަރު މަހުގެ 6 ވަނަ ދުވަހާއި ނޮވެމްބަރު މަހުގެ 22 ވަނަ ދުވަހުއެވެ.