ޗައިނާގެ ޑިޕްލޮމެޓަކާމެދު ޖަޕާނުން ނުރުހިއްޖެ

ޖަޕާނުގެ އޮސާކާގައި ހުންނަ ޗައިނާގެ ކޮންސުލް ޖެނެރަލް، ޖަޕާނުގެ ބޮޑުވަޒީރަށް އިންޒާރު ދިން ކަމަށް ބުނެ، ޖަޕާނުން ނުރުހުން ފާޅުކޮށްފި އެވެ.

އޮސާކާގައި ހުންނަ ޗައިނާގެ ކޮންސުލް ޖެނެރަލް ޝިއު ޖިއާން، އިންޒާރެއްގެ ގޮތުގައި ނެގިދާނެ ބަސްތަކެއް ޖަޕާނުގެ ބޮޑުވަޒީރު ސަނައޭ ޓަކައިޗީއާއި މެދު ސޯޝަލް މީޑިއާގައި ބުނެފައިވަނީ، ޓައިވާނުގެ މައްސަލައިގައި ޓަކައިޗީ އެއްޗެއް ވިދާޅުވުމުންނެވެ. ޓަކައިޗީ ވިދާޅުވީ ޓައިވާނަށް ޗައިނާއިން އަރައިފިނަމަ، ޖަޕާނުންވެސް އަސްކަރީ ފިޔަވަޅުތައް އަޅާފާނެކަމަށެވެ. ޓަކައިޗީ އެހެން ވިދާޅުވުމުން، ޖަޕާނާއި ނުބެހޭ ކަމެއްގެ ތެރެއަށް ޓަކައިޗީ ވަދެވަޑައިގަތީކަމަށާއި، އެކަމުގެ ސަބަބުން އޭނާގެ ހަށިކޮޅަށް ގެއްލުމެއް ދޭންޖެހޭކަން ދޭހަވާ މޭރުމަކުން ޗައިނާގެ ކޮންސުލް ޖެނެރަލް ކުރި ސޯޝަލް މީޑިއާ ޕޯސްޓް މިހާރު ވަނީ ޑިލީޓްކޮށްލާފަ އެވެ.

ޖަޕާނުގެ ޗީފް ކެބިނެޓް ސެކްރެޓަރީ މިނޯރޫ ކިހާރާ ވިދާޅުވީ ކޮންސުލް ޖެނެރަލްގެ ޕޯސްޓްގެ މަޤްޞަދަކީ ކޮބައިކަން ސާފުނުވާކަމަށާއި، މިފަދަ ވާހަކަތައް ކުރިންވެސް ދައްކާތީ އޭނާއާއި މެދު ފިޔަވަޅު އެޅުމަށް ޗައިނާގެ ކިބައިން އެކި ފަހަރު އެދިފައިވާކަމަށެވެ. އެހެންނަމަވެސް ޗައިނާއިން ކޮންސުލް ޖެނެރަލް ޖިއާން އާއި ދެކޮޅަށް އެއްވެސް ފިޔަވަޅެއް މިހާތަނަށް އަޅާފައެއް ނުވެއެވެ. ޗައިނާގެ ފޮރިން މިނިސްޓްރީއިން މިމައްސަލައިގައި ވާހަކަ ދެއްކީވެސް އޭނާގެ ދިފާއުގަ އެވެ.

ޓައިވާނާއި އެމެރިކާއިން ވެސް ވަނީ ޖަޕާނުގެ ބޮޑުވަޒީރަށް ޗައިނާއިން ދިނީ އިންޒާރެއްކަމަށް ސިފަކޮށްފަ އެވެ.

ޖަޕާނުގެ ބޮޑުވަޒީރުން އާއްމުކޮށް ޓައިވާނުގެ މައްސަލައިގެ ތެރެއަށް ނުވަތް ނަމަވެސް، އައު ބޮޑުވަޒީރު ޓަކައިޗީ ގެންދަވަނީ މިމައްސަލައިގައި ވަރަށް ސާފު ސްޓޭންޑެއް ނަންގަވަމުންނެވެ. އެގޮތުން މިދިޔަ މަހު ދެކުނު ކޮރެއާގެ ސޯލްގައި އޮތް ބައްދަލުވުމެއްގެ ހަވާސާގައި ޓައިވާނުގެ މަންދޫބަކާއި ބައްދަލުކުރެއްވި ފޮޓޯއެއްވެސް އާއްމު ކުރެއްވި އެވެ.

އަދި ޗައިނާއިން ޓައިވާނަށް އަރައިފިނަމަ، އެއީ ޖަޕާނުގެ ދެމި އޮތުމަށް އޮތް ނުރައްކަލެއްކަމަށް ބެލިދާނެކަމަށާއި، އެފަދަ ޙާލަތެއްގައި ޖަޕާނުގެ އަސްކަރިއްޔާ ޑިޕްލޮއި ކުރެވިދާނެކަމަށް ހުކުރު ދުވަހު ޕާލަމެންޓްގައި ވާހަކަ ދައްކަވަމުން އޭނާ ވިދާޅުވި އެވެ. ޓައިވާން އޮންނަނީ ޖަޕާނާއި 100 ކިލޯމީޓަރު ކައިރީގަ އެވެ.