ފެކަލްޓީ އޮފް އާޓްސްއަށް ދިމާވެފައިވާ އެންމެ ބޮޑު ގޮންޖެހުމަކީ ކޯސްތަކަށް ބޭނުންވާ ދަރިވަރުން ނުލިބުމުގެ މައްސަލަ ކަމަށް، ޤައުމީ ޔުނިވަރސިޓީގެ ޑެޕިއުޓީ ވައިސް ޗާންސެލަރ ހުސެއިން ޙަލީމް ވިދާޅުވެއްޖެއެވެ.

އޭނާ އެފަދައިން ވިދާޅުވީ އެ ޔުނިވަރސިޓީގެ ފެކަލްޓީ އޮފް އާރޓްސްގެ ޑީންގެ މަޤާމަށް ދެވަނަ ދައުރަކަށް، އާސިމް އަބްދުއްސައްތާރު އައްޔަން ކުރެއްވުމުގެ ގޮތުން ބޭއްވި ރަސްމިއްޔާތުގައި ވާހަކަދައްކަވަމުންނެވެ. އޭނާ ވިދާޅުވީ ކޯސްތަކައް ހިންގުމަށް ބޭނުންވާ މިންވަރަށް ދަރިވަރުން ނުލިބޭ ސަބަބަކީ އެފްއޭގައި އުނގަންނައިދޭ ކޯސްތަކަކީ ފަންނީ ދާއިރާތަކާއި ގުޅުން ހުރި ކޯސްތަކަކަށްވުން އެކަށީގެންވާތީ ކަމަށެވެ.

ޤައުމީ ޔުނިވަރސިޓީގެ މަސައްކަތްތަކާ މެދު ވާހަކަދައްކަވަމުން ޙަލީމް ވިދާޅުވީ އެމްއެންޔޫއިން އެންމެ ބޮޑު އިސްކަމެއް ދެނީ އެ ޔުނިވަރސިޓީގެ ދަސްވެނިންނަކީ، އެ ދަރިވަރުން އުނގެނޭ ދާއިރާގައި މަސައްކަތްކުރުމުގެ ޤާބިލްކަން ހުރި ބަޔަކަށް ހެދުމަށް ކަމަށެވެ. އެ ޔުނިވަރސިޓިއިން ހަދާފައިވާ އޮޑިޓްތަކުން ޔުނިވަރސިޓީއިން އުނގަންނައި ދިނުމުގައި ގެންގުޅޭ އުސޫލުތައް ރަނގަޅުކަމާއި، އެ ޔުނިވަރިސިޓީއިން ނެރެދީފައިވާ ނަތީޖާ ރަނގަޅުކަން ފާހަގަކުރެވޭ ކަމަށް ވެސް އޭނާ ވިދާޅުވިއެވެ.

ޤައުމީ ޔުނިވަރސިޓީގެ ކޯސްތަކުގެ ތެރެއިން ފެކަލްޓީ އޮފް އާރޓްސްގެ ކޯސްތަކަކީ އަމަލީ މައިދާނުގައި މަސައްކަތް ކުރަން ދަރިވަރުން ތަމްރީނުކުރުމަށް އިސްކަން ދީގެން ތައްޔާރުކޮށްފައިވާ ޕްރޮގްރާމްތަކެކެވެ. އެގޮތުން ފެކަލްޓީ އޮފް އާރޓްސްގެ ކޯސްތައް ފަރުމާކޮށްފައިވަނީ އެ ދަރިވަރުން އުނގެނޭ ދާއިރާއެއްގެ ތަޖުރިބާ އެ ކުދިންނަށް ޙާސިލްކުރެވޭ ފަދަ ގޮތަކަށެވެ.

ޤައުމީ ޔުނިވަރިސިޓީއިން ދަނީ ތައުލީމާއި ތަޖުރިބާ ހުރި މީހުން ބޭނުންވާ ސިނާއަތުތައް ދެނެގަނެ، އެ ދާއިރާތަކާއި ގުޅުން ކޯސްތައް އުފެއްދުމަށް މަސައްކަތްކުރަމުންނެވެ. މީގެ އިތުރުން ދަރިވަރުންގެ ފެންވަރު ރަނގަޅުކުރުމަށް އެކި ސިނާއަތުތަކުގައި މަސައްކަތް ކުރާ ފަރާތްތަކާއި ގުޅިގެން ވެސް އެ ޔުނިވަރސިޓީ އިން ދަނީ ގިނަ ޕްރޮގްރާމްތަކެއް ހިންގަމުންނެވެ.