އެފްއޭގެ ކޯސްތަކުގެ ފެންވަރު ރަނގަޅުކުރުމަށް ގިނަ މަސައްކަތްތަކެއް މިދަނީ ކުރަމުން: ޑީން
1 އޯގަސްޓު 2022 | ހޯމަ 08:43އެފްއޭއިން ފާއިތުވި 4 އަހަރު އާ 4 ކޯސް ވަނީ ތައާރަފްކޮށްފައި
އާސިމް އަބްސުއްސައްތާރު ފެކަލްޓީ އޮފް އާރޓްސްގެ ޑީންގެ މަޤާމާއި ދެވަނަ ދައުރަށް ހަވާލުވެވަޑައިގަތުމުގެ ރަސްމިއްޔާތުގެ ތެރެއިން
ޤައުމީ ޔުނިވަރސިޓީ (އެމްއެންޔޫ)ގެ ފެކަލްޓީ އޮފް އާރޓްސްގެ ކޯސްތައް އިތުރުކޮށް، ކޯސްތަކުގެ ފެންވަރު ރަނގަޅުކުރަން ފާއިތުވި 4 އަހަރު ދުވަހުގެ ތެރޭގައި ގިނަ މަސައްކަތްތަކެއް ކުރެވިފައިވާ ކަމަށް، ފެކަލްޓީ އޮފް އާރޓްސްގެ ޑީންގެ މަޤާމާއި ދެވަނަ ދައުރަކަށް ހަވާލުވެވަޑައިގެންނެވި އާސިމް އަބްދުއްސައްތާރު ވިދާޅުވެއްޖެއެވެ.
އޭނާ މަޤާމާއި ހަވާލުވެވަޑައިގަތީ މިއަދު އެމްއެންޔޫގައި ބޭއްވި ރަސްމިއްޔާތެއްގައެވެ. ޑީންގެ މަޤާމާއި ހަވާލުވެވަޑައިގަތުމަށް ފަހު ވާހަކަދައްކަވަމުން އާސިމް ވިދާޅުވީ، އެ ފެކަލްޓީގެ މަސައްކަތް ކާމިޔާބުވާނީ އޮފީސްތަކަށް ބޭނުންވާ ފަދަ ތަމްރީނާއި ތަޖުރިބާ ލިބިފައިވާ ބަޔަކު އުފެއްދުމުންކަމަށް ޤަބޫލުކުރައްވާ ކަމަށެވެ. އަދި ފާއިތުވި ދައުރުގައި ޑީންގެ މަޤާމުގައި ހުންނެވި އިރު އޭނާ ވަނީ އެ ފެކަލްޓީގައި އާ ކޯސްތައް އުފައްދާ، ކޯސްތަކުގެ ފެންވަރު ރަނގަޅުކުރަން މަސައްކަތް ކުރައްވާފައި ކަމަށެވެ. އެގޮތުން އެމްކިއުއޭ އިން ޤަބޫލުކުރާ ފެންވަރުގެ 4 ކޯސް ތަޢާރަފްކޮށްފައިވާ ކަމަށް އާސިމް ފާހަގަކުރެއްވިއެވެ. މީގެ އިތުރުން ބަހާއި، ނޫސްވެރިކަމާއި، ފަންނުވެރިކަމާއި، ހިންގުން އަދި ހުނަރުވެރިކަމާއި ގުޅުން ހުރި ދާއިރާތަކުން ހިންގާފައިވާ ކޯސްތަކަކީ ފެންވަރު ރަނގަޅު ކާމިޔާބު ކޯސްތަކެއް ކަމަށް އޭނާ ވަނީ ވިދާޅުވެފައެވެ.
މީގެ އިތުރުން ބައިނަލްއަޤުވާމީ ގޮތުން ފާހަގަކޮށްލެވޭ ބަސްތަކުގެ ކޯސްތައް ތައާރަފްކުރުމުގެ މަސައްކަތް ކުރަމުންދާ ކަމަށާއި އޭގެ ތެރޭގައި ސްޕެނިޝް އަދި ކޮރެއާ ފަދަ ބަސްބަހުގެ ކޯސްތައް ހިމެނޭ ކަމަށް އާސިމް ވިދާޅުވިއެވެ. ފެކަލްޓީ އޮފް އާޓްސްގެ ޑީންގެ ދެ ވަނަ ދައުރަކަށް އާސިމް އައްޔަންކުރައްވާފައިވާއިރު އޭނާ އެ މަޤާމަށް އައްޔަން ކުރައްވާފައި ވަނީ 4 އަހަރު ދުވަހުގެ މުއްދަތަކަށެވެ.
އާސިމް އެންމެ ފުރަތަމަ ޤައުމީ ޔުނިވަރސިޓީ އާއި ގުޅިވަޑައިގަންނަވާފައި ވަނީ 2005 ވަނަ އަހަރު، އެ ޔުނިވަރސިޓީގެ އެސިސްޓެންޓް ލެކްޗަރަރއެއްގެ މަޤާމަށެވެ. އެއަށް ފަހު ފެކަލްޓީ އޮފް އެޑިއުކޭޝަންގައި ޑީންގެ މަޤާމާއި ލެކްޗަރަރގެ މަޤާމް އާސިމް ވަނީ އަދާކުރައްވާފައެވެ. 2012 ވަނަ އަހަރު ޔުނިވަރސިޓީ އިން ވަކިވެވަޑައިގަތުމަށް ފަހު އާސިމް އަލުން ޔުނިވަރސިޓީ އާއި ގުޅިވަޑައިގަތީ 2018 ވަނަ އަހަރު ފެކަލްޓީ އޮފް އާރޓްސްގެ ޑީންގެ މަޤާމާއި ހަވާލުވެވަޑައިގަތް ހިސާބުންނެވެ.
