ހަ ފޯވާޑުން ގެނަޔަސް، ބާސެލޯނާގައި މަޑުކުރަން ބޭނުންވާކަމަށް މެމްފިސް ޑިޕާއި ބުނެފި

ބާސެލޯނާއިން ހަ ފޯވާޑުން ގެނައި ނަމަވެސް، އޭނާ ބޭނުންވަނީ ޓީމުގައި މަޑުކުރަން ކަމަށް މެމްފިސް ޑިޕާއި އަންގައިފިއެވެ.

ކުރިއަށް އޮތް ސީޒަނަށް ބާސެލޯނާއިން ރޮބާޓް ލެވަންޑޯސްކީ އާއި ރަފީނިއާ ހޯދުމާއެކު، ޓީމުން އޭނާ ދޫކޮށްލަން އުޅޭ ކަމަށް ބައެއް މީޑިއާތަކުގައި ރިޕޯޓުކޮށްފައިވެއެވެ. 2021 ވަނަ އަހަރު ބާސެލޯނާއަށް ބަދަލުވި ޑިޕާއި ވަނީ ކުރީގެ ކޯޗު ރޮނާލްޑު ކޫމަންގެ އިރުޝާދުގެ ދަށުން ބާސެލޯނާގައި މުހިންމު ދައުރެއް އަދާކޮށްފައެވެ.

ލެވަންޑޯސްކީ އާއި ރަފީނިއާ ގުޅުމުގެ އިތުރުން އަނިޔާއިން ރަނގަޅުވެ އަންސޫ ފާޓީ ޓީމާ ގުޅިފައިވާތީ ޑިޕާއި އަށް ޓީމު ދޫކޮށްލަން ޖެހުމުގެ ބިރު އޮތް ކަމަށް ސްޕެއިންގެ ރިޕޯޓުތަކުގައިވެއެވެ. މިކަމާ ގުޅިގެން ހަ ފޯވާޑުން ގެނަޔަސް، ބޭނުންވަނީ ޓީމުގައި މަޑުކުރަން ކަމަށް ޑިޕާއި ބާސެލޯނާގެ ކުޅުންތެރިން ގާތު ބުނެފައިވާކަމަށް ވެސް ރިޕޯޓުތަކުގައިވެއެވެ.

ބާސެލޯނާގެ ކޯޗު ޒަވީ ހެނާންޑޭޒް ވަނީ އެ ޓީމުން ބައެއް ކުޅުންތެރިން ދޫކޮށްލާނެކަން ހާމަކޮށްފައެވެ. އެއީ އެކި މަގާމުތަކަށް ކުޅޭ ކުޅުންތެރިންތަކެއް އެ ޓީމުން ހޯދާފައިވާތީއެވެ. ޒަވީ ބުނެފައިވަނީ ޓީމުގައި މަޑުކުރެވޭނީ ބާސެލޯނާގެ ޕްލޭންގައި ހިމެނޭ ކުޅުންތެރިންނަށް އެކަނި ކަމަށެވެ.

ޑިޕާއި ވަނީ ބާސެލޯނާއަށް ބަދަލުވެ އެ ޓީމަށް ކުޅެދިން 38 މެޗުގައި 13 ލަނޑު ޖަހާފައެވެ. ބާސެލޯނާއާއެކު އޭނާއަށް މިހާތަނަށް އެއްވެސް ތައްޓެއް ކާމިޔާބުކުރެވިފައެއް ނުވެއެވެ.