ބާސެލޯނާގެ ފުރަތަމަ މެމްބަރު މަނުއެލް މާނޮސް މަރުވެއްޖެ

ސްޕެއިންގެ ގަދަ ބާރު ބާސެލޯނާގެ ފުރަތަމަ މެމްބަރު މަނުއެލް މާނޮސް ގޮންޒަލްބޯ މަރުވެއްޖެއެވެ.

އުމުރުން 101 އަހަރުގައި މަނުއެލް މާނޮސް މަރުވިކަން ހާމަކޮށް ބާސެލޯނާއިން ކުރި ޓުވީޓެއްގައި ބުނީ، އޭނާ މަރުވުމުން އެކަމުގެ ހިތާމައިގައި އެ ކުލަބުން ބައިވެރިވާކަމަށެވެ. އަދި މަނުއެލް މާނޮސްގެ އާއިލާއާއި ގާތް ރަޙުމަތްތެރިންނަށް ބާސެލޯނާއިން ވަނީ ތައުޒިޔާ ފޮނުވާފައެވެ.

ބާސެލޯނާގެ ފުރަތަމަ މެމްބަރުކަން މަނުއެލް މާނޮސްއަށް ލިބުނީ 2019 ވަނަ އަހަރުގެ ފެބްރުއަރީ 11 ވަނަ ދުވަހުއެވެ. އެއީ އޭގެ ކުރިން ފުރަތަމަ މެމްބަރުގެ ގޮތުގައި ހުރި ޖޯސެފް މާރިއާ ސެލްވާ މަރުވުމުންނެވެ. މާރިއާ ސެލްވާ އަކީ 1931 ވަނަ އަހަރުގެ ޖެނުއަރީ މަހުގެ ތިން ވަނަ ދުވަހުން ފެށިގެން ބާސެލޯނާގެ މެމްބަރެކެވެ.

ބާސެލޯނާގެ މެމްބަރެއްގެ ގޮތުގައި މަނުއެލް މާނޮސް ހަމަޖެހުނީ 1932 ވަނަ އަހަރުގެ ސެޕްޓެމްބަރު މަހުގެ ފަސް ވަނަ ދުވަހުއެވެ. ބާސެލޯނާގެ މެމްބަރުގެ ގޮތުގައި 140،000 އަށްވުރެ ގިނަ މީހުން ތިބޭއިރު، އެމީހުންނަކީ ކުލަބުގެ މުހިންމު ކަންކަމުގައި ވޯޓު ދިނުމުގެ ޝަރުތު އޮންނަ މީހުންނެވެ.