ކުރިއަށް އޮތް ސީޒަނުގެ ހުރިހާ ތައްޓެއް ކާމިޔާބުކުރުމުގެ ފުރުސަތު ބާސެލޯނާއަށް އެބަ އޮތް ކަމަށް ރޮބާޓް ލެވަންޑޯސްކީ ބުނެފިއެވެ.

ޖަރުމަނުގެ ބަޔާން މިއުނިކް ދޫކޮށް ބާސެލޯނާއަށް ބަދަލުވި އިތުބާރު ފޯވާޑް މިހެން ބުނީ އޭނާ ދިން އިންޓަވިޔުއެއްގައެވެ. ބާސެލޯނާއަށް ބަދަލުވި ފަހުން އެ ޓީމަށް އޭނާ ކުޅެދީފައިވަނީ އެންމެ މެޗެކެވެ. އެއީ އެކުވެރިކަމުގެ މެޗެއްގައި ބާސެލޯނާއިން ވާދަވެރި ރެއާލް މެޑްރިޑާ ދެކޮޅަށް ކުޅުނު މެޗެވެ. އެ މެޗުގެ ފުރަތަމަ 11 ގައި ހިމެނިގެން ލެވަންޑޯސްކީ ކުޅެން އެރި ނަމަވެސް، ދެ ވަނަ ހާފުގައި އޭނާ ވަނީ ބަދަލުކޮށްފައެވެ.

އިންޓަވިޔުއެއްގައި ވާހަކަ ދައްކަމުން ލެވަންޑޯސްކީ ބުނީ ބާސެލޯނާގެ ޕޮޓެންޝިއަލަށް ބަލާނަމަ، އެ ޓީމަށް ހުރިހާ ކަމެއް ވެސް ކާމިޔާބުކުރެވޭނެ ކަމަށެވެ. އޭނާ ބުނީ މުޅި ބާސެލޯނާގައި އޮތީ ވަރުގަދަ ހިތްވަރެއް ކަމަށެވެ. މީގެ އިތުރުން ލެވަންޑޯސްކީ ބުނީ ޓީމުގެ ޒުވާން ކުޅުންތެރިން ތިބީ އެމީހުންގެ އެންމެ ރަނގަޅު ކުޅުން ދެއްކުމުގެ އަޒުމުގައި ކަމަށެވެ.

މީގެ އިތުރުން ލެވަންޑޯސްކީ ބުނީ އޭނާ ޓީމާ ގުޅުނުތާ މިވީ މަދު ދުވަސްކޮޅުގެ ތެރޭގައި އެތައް ކަމެއް ދަސްވެއްޖެކަމަށާއި، ޓީމުގެ ކުޅުންތެރިންގެ ފަރާތުން އޭނާ އަށް ފުރިހަމަ އެހީތެރިކަމެއް ލިބޭ ކަމަށެވެ. ލެވަންޑޯސްކީ ބުނީ ބާސެލޯނާގައި އޭނާ ހުރީ، އޭނާގެ އެންމެ މޮޅު ކުޅުން ދެއްކުމުގެ އަޒުމުގައި ކަމަށެވެ. އިތުރަށް އޭނާ ބުނީ ފުރަތަމަ ދުވަހުން ފެށިގެން ވެސް ޓީމާ މެދު އޭނާ ހިތްހަމަ ޖެހުނު ކަމަށެވެ.

އިތުރަށް ވާހަކަ ދައްކަމުން އޭނާ ބުނީ ޓީމު ރަނގަޅުކޮށް ކުރިއަށް ގެންދިޔުމަކީ އެންމެ އިސްކަމެއް ދޭންޖެހޭ ކަމެއް ކަމަށެވެ. އެއަށްފަހު އޭނާގެ ގޯލު އަންނަނީ ދެ ވަނަ އަށް ކަމަށެވެ. އޭނާ ބުނީ ފުރަތަމަ ދުވަހުން ފެށިގެން ރަނގަަޅަށް މަސައްކަތް ކުރަން ޖެހޭނެ ކަމަށާއި، މެޗުން މޮޅުވެ ތިން ޕޮއިންޓު ހޯދުމަކީ މުހިންމު ކަމެއް ކަމަށެވެ.

އެކުވެރިކަމުގެ މެޗެއްގައި ދެން ބާސެލޯނާއިން ނުކުންނާނީ އިޓަލީގެ ޔުވެންޓަސްއާ ދެކޮޅަށެވެ.