އައު ސީޒަނަށް ތައްޔާރުވުމުގެ ގޮތުން ކުޅުނު ފަހު މެޗުގައި ގަމްބާ އޮސަކާ ބަލިކޮށް، ޕެރިސް ސެއިންޓް ޖާމަން (ޕީއެސްޖީ)ން ފުރިހަމަ މޮޅަކާއެކު ނިންމާލައިފިއެވެ.

އެކުވެރިކަމުގައި ޕީއެސްޖީން ކުޅުނު ހަތަރު މެޗުން ވެސް އެ ޓީމު ވަނީ މޮޅުވެފައެވެ. ހަތަރު ވަނަ މެޗު އެ ޓީމުން ކާމިޔާބުކުރީ 6-2 ންނެވެ. މެޗުގައި ޕީއެސްޖީގެ މުހިންމު ކުޅުންތެރިން ވަނީ ފެނިފައެވެ.

މެޗު ފަށައިގެން 28 ވަނަ މިނެޓުގައި ޕީއެސްޖީއަށް ލީޑު ނަގައިދިނީ ޕަބްލޯ ސަރަބިއާއެވެ. އޭގެ ހަތަރު މިނެޓު ފަހުން އެ ޓީމަށް ލިބުނު ޕެނަލްޓީއެއްގައި ލީޑު ފުޅާކޮށްދިނީ ނޭމާ ޖޫނިއަރއެވެ. އޭގެ މިނެޓެއް ފަހުން، 33 ވަނަ މިނެޓުގައި ކްރޮކަވާ ވަނީ ގަމްބާ އޮސަކާގެ ފުރަތަމަ ލަނޑު ޖަހާފައެވެ. ފުރަތަމަ ހާފު ނިމުމުގެ ކުރިން ޕީއެސްޖީން ވަނީ އިތުރު ދެ ލަނޑު ޖަހާފައެވެ. އެއީ 37 ވަނަ މިނެޓުގައި ނޫނޯ މެންޑޭސް ޖަހައިދިން ލަނޑާއި، 39 ވަނަ މިނެޓުގައި ލިއޮނެލް މެސީ ޖަހައިދިން ލަނޑެވެ.

ޕީއެސްޖީގެ އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގައެވެ. ފުރަތަމަ ލަނޑު 60 ވަނަ މިނެޓުގައި ޖެހީ ނޭމާއެވެ. އޭގެ ދިހަ މިނެޓު ފަހުން ގަމްބާ އޮސަކާ އިން ވަނީ އެ ޓީމުގެ ދެ ވަނަ ލަނޑު ޖަހާފައެވެ. މި ލަނޑު ޖެހީ ޔަމަމީއެވެ. ޕީއެސްޖީގެ ހަ ވަނަ ލަނޑު މެޗުގެ 86 ވަނަ މިނެޓުގައި ޖެހީ ކީލިއަން އެމްބާޕޭ އެވެ. އެއީ އެ ޓީމަށް ލިބުނު ޕެނަލްޓީއެއްގައެވެ.

އައު ސީޒަނުގެ ފުރަތަމަ މެޗުގައި ޕީއެސްޖީން ނިކުންނާނީ ޓްރޮފީ ޑެސް ޗެމްޕިއަންސްގަައި ނަންޓެސްއާ ދެކޮޅަށެވެ. އެއީ ނިމުނު ސީޒަންގެ ފްރާންސް ލީގު ކާމިޔާބުކުރި ޓީމާއި، ފްރާންސް ކަޕް ކާމިޔާބުކުރި ޓީމާ ދެމެދު ކުޅެވޭ މެޗެކެވެ.