މާޝިއަލް ދޫކޮށްލަން ޔުނައިޓެޑަކުން ބޭނުމެއް ނުވޭ
23 ޖުލައި 2022 | ހޮނިހިރު 12:08ޔުނައިޓެޑުގެ ކޯޗު އެރިކް ޓެން ހާގް ވަނީ އެ މާޝިއަލް ދޫނުކުރުމަށް ކުލަބުގައި އެދިފައި
އެންތަނީ މާޝިއަލް
މެންޗެސްޓަރ ޔުނައިޓެޑުގެ ފޯވާޑް އެންތަނީ މާޝިއަލް ދޫކުރަން އެ ކުލަބުން ބޭނުންނުވާ ކަމަށް ރިޕޯޓުތައް ބުނެފިއެވެ.
ރިޕޯޓުތައް ބުނާ ގޮތުގައި ލޯނު އެއްބަސްވުމުއްގެ ދަށުން މާޝިއަލް ހޯދުމަށް ދެ ކުލަބަކުން މަސައްކަތްކުރިއެވެ. އަދި އެ ކުލަބުތަކާ ޔުނައިޓެޑާ ދެމެދު އެކަމުގެ މަޝްވަރާތައް ވެސް ކުރެވުނު ކަމަށެވެ. ނަމަވެސް ޔުނައިޓެޑުގެ ކޯޗު އެރިކް ޓެން ހާގް ވަނީ އެ މާޝިއަލް ދޫނުކުރުމަށް ކުލަބުގައި އެދިފައިކަމާއި، ޓެން ހާގާއި ޔުނައިޓެޑުގެ ބޯޑާ ދެމެދު މަޝްވަރާކުރުމަށްފަހު މާޝިއަލް ދޫނުކުރަން ނިންމިކަމަށް ރިޕޯޓުތައް ބުނެއެވެ. އަދި ޔުނައިޓެޑުން މިހާރު ވަނީ މާޝިއަލް އެކަން އަންގާފައި ކަމަށް ވެސް ރިޕޯޓުތައް ބުނެއެވެ.
ލިއޯން އިން ސީނިއަރ ކެރިއަރު ފެށި މާޝިއަލް ޔުނައިޓެޑަށް ބަދަލުވީ 2015 ވަނަ އަހަރުއެވެ. އޭގެ ފަހުން އޭނާ ވަނީ އެ ޓީމަށް 269 މެޗު ކުޅެދީ 79 ލަނޑު ޖަހާފައެވެ. މީގެ އިތުރުން އޭނާ ވަނީ ޔުނައިޓެޑާއެކު އެފްއޭ ކަޕް، ކަރަބޯ ކަޕް އަދި އެފްއޭ ކޮމިއުނިޓީ ޝީލްޑް ކާމިޔާބުކޮށްފައެވެ. މާޝިއަލް މިހާރު އަންނަނީ ލޯނު އެއްބަސްވުމެއްގެ ދަށުން ސެވިއްޔާއަށް ކުޅެމުންނެވެ.
