މާޝިއަލް ބޭނުންވަނީ އެއްބަސްވުމުގައި އޮތް ދެއަހަރު ޔުނައިޓެޑްގައި މަޑުކުރަން

މެންޗެސްޓާ ޔުނައިޓެޑަށް ކުޅެމުން އަންނަ ފްރާންސްގެ ފޯވާޑް އެންތޮނީ މާޝިއަލް ބޭނުންވަނީ އެ ކްލަބާއެކު ހަދާފައިވާ އެއްބަސްވުމުގައި ބާކީ އޮތް ދެ އަހަރު ޔުނައިޓެޑުގައި މަޑުކުރަން ކަމަށް އޭނާގެ އެޖެންޓް ފިލިޕޭ ލެމްބޯލޭ ބުނެފިއެވެ.

ނޫސްވެރިންނަށް މައުލޫމާތު ދެމުން ފިލިޕޭ ބުނީ ޔުނައިޓެޑާއެކު މާޝިއަލް ހަދާފައިވާ އެއްބަސްވުމުގައިވާގޮތުން ބާކީ ދެ އަހަރު އެބަ އޮތް ކަމަށާއި، އެގޮތުން އިތުރު ކްލަބަކަށް ބަދަލުވާން އޭނާ ބޭނުންނުވާ ކަމަށެވެ.

އެހެންނަމަވެސް އޭނާ ބުނީ މާޝިއަލް ކްލަބުގައި ބަހައްޓަން ކްލަބުން ބޭނުންނުވާނަމަ ކްލަބް ދޫކޮށްލަން މާޝިއަލް ހުރީ ތައްޔާރަށް ކަމަށާއި، އޭނާ ހޯދުމަށް ބައިވަރު ހުށަހެޅުންތައް މިހާރުވެސް ލިބެމުން އަންނަ ކަމަށެވެ.

ދާދި ފަހުން ނޫސްވެރިންނަށް މައުލޫމާތު ދެމުން މާޝިއަލް ބުނީ ސަޕޯޓަރުން އަދި ކްލަބް އުފާކޮށްދިނުމަށްވެސް އޭނާ މަސައްކަތްތަކެއް ކުރާ ކަމަށާއި، ކްލަބުގައި ދިގު މުއްދަތެއްވަންދެން މަޑުކުރަން ބޭނުންވާ ކަމަށެވެ. އެގޮތުން އެކަން އެގޮތަށް ވުމަށް އެދޭކަމަށްވެސް އޭނާ ވަނީ ބުނެފައެވެ.

އުމުރުން 21 އަހަރުގެ މާޝިއަލް ކެރިއަރު ފެށީ ފްރާންސްގެ އޮލިމްޕިކް ލިއޯން އިންނެވެ. އެޓީމުގައި ސީޒަނެއް ހޭދަކުރުމަށްފަހު ދެން އޭނާ ބަދަލުވީ މޮނާކޯއަށެވެ. އޭނާ ވަނީ އެ ކްލަބުގައި ހޭދަކުރި ތިން ސީޒަނުގައި ކުޅުނު 70 މެޗުގައި 15 ލަނޑު ކާމިޔާބުކޮށް މަޝްހޫރު ކްލަބްތަކުގެ ސަމާލުކަން ހޯދާފައެވެ.

އޭނާ ޔުނައިޓެޑަށް ބަދަލުވީ 2015 ވަނަ އަހަރެވެ. އެގޮތުން މިވީތަނަށް އޭނާ އެ ކްލަބަށް ކުޅުނު 91 މެޗުގައި 25 ލަނޑު ކާމިޔާބުކޮށްފައިވާ އިރު، އޭނާ ވަނީ، އެފްއޭ ކަޕް އަދި އެފްއޭ ކޮމިއުނިޓީ ޝީލްޑްވެސް އެ ކްލަބާއެކު ކާމިޔާބުކޮށްފައެވެ.