ބާސާގައި ފުރަތަމަ މެޗަށްފަހު ރަފީނިއާ ބޭނުންވަނީ ރެއާލާ ދެކޮޅަށް ކުޅެން

ބާސެލޯނާގައި އޭނާ އެންމެ ކުޅެން ބޭނުންވަނީ ރެއާލް މެޑްރިޑާ ދެކޮޅަށް ކަމަށް ރަފީނިއާ ބުނެފިއެވެ.

ބާސާއަށް ބަދަލުވެ އޭނާ އަންނަނީ އެ ޓީމާއެކު ކުރިއަށް އޮތް ސީޒަންގެ ފަރިތަކުރުން ތަކުގައި ބައިވެރިވަމުންނެވެ. ޕްރީ ސީޒަންގެ ފުރަތަަމަ މެޗުގައި ބާސާއިން އެމެރިކާގައި އިންޓަ މިއާމީއާ ދެކޮޅަށް ކުޅުނު މެޗުގައި ރަފީނިއާ ވަނީ ކުޅެފައެވެ. ބާސާއަށް ކުޅެދިން ފުރަތަމަ މެޗުގައި ވެސް އޭނާ ވަނީ އެއް ލަނޑު ޖަހައި، ދެ ލަނޑު ޖެހުމަށް އެހީތެރިވެދީފައެވެ. އެ މެޗުން ބާސާ މޮޅުވެފައިވަނީ 6-0 ންނެވެ.

މެޗަށްފަހު ރަފީނިއާ ބުނީ ބާސާގައި އޮތީ ވަރުގަދަ ޓީމެއް ކަމަށާއި، ޓީމުގައި ޒުވާން ހުނަރުވެރި ކުޅުންތެރިން ހިމެނޭކަމަށެވެ. ބާސާގެ މުސްތަގުބަލު އޮތީ ޒުވާން ޓީމުގެ އަތް މަތީގައިކަން ފާހަގަ ކުރަމުން ރަފީނިއާ ބުނީ، ބާސާ އޮތީ ރަނގަޅު ހާލަތެއްގައި ކަމަށާއި، ބޮޑެތި ތަށިތައް ކާމިޔާބުކުރަން ޖެހޭ ކަމަށެވެ.

މީގެ އިތުރުން އޭނާ ބުނީ ބާސާގެ ކުޅުންތެރިންނާއެކު ކުޅެލެވުމުން އޭނާއަށް ހުރިހާ ކަމެއް ވެސް ފަސޭހަވެގެންދާ ކަމަށެވެ. ނަމަވެސް އޭނާ ބުނި ގޮތުގައި އަދިވެސް ޓީމަށް ހޭނުމަށްޓަކައި ކުރަން ޖެހޭ ކަންކަން އެބަ ހުއްޓެވެ. ރަފީނިއާ ބުނީ ބާސާގެ ކުޅުންތެރިން އެކަމުގައި އޭނާއަށް އެހީތެރިވެދޭ ކަމަށާއި، އުންމީދަކީ ކުޅުންތެރިންނަށް އެހީވުމުގެ ފުރުސަތު އޭނާއަށް ލިބުން ކަމަށެވެ.

ބާސާއާ ވާދަވެރި ރެއާލާ ގުޅޭ ގޮތުން ވާހަކަ ދައްކަމުން ރަފީނިއާ ބުނީ ރެއާލަށް ވުރެ ބާސާއަކީ ވަރުގަދަ ޓީމެއް ކަމަށާއި، ރެއާލާ ދެކޮޅަށް ކުޅެން އޭނާ ބޭނުންވާ ކަމަށެވެ.

ބާސާއިން ރަފީނިއާގެ ސޮއި ހޯދީ ވާދަވެރި ރޭހެއްގައި ޗެލްސީ އާއި އާސެނަަލް ފަހަތަށް ޖައްސާލުމަށްފަހުއެވެ. ބާސާއިން ރަފީނިއާ ހޯދީ 67 މިލިއަން ޔޫރޯ ޚަރަދުކުރުމަށްފަހުއެވެ.