އަލިފުށި އީދު ފުޓްސަލް ޗެލެންޖްގެ ޗެމްޕިއަންކަން އާން ދޯ ހޯދައިފި

ރ.އަލިފުށި އީދު ފުޓްސަލް މުބާރާތް "ޔަސްކީ އެންޑް އަދާން އީދު ފުޓްސަލް ޗެލެންޖް" ގެ ޗެމްޕިއަންކަން އާން ދޯ ހޯދައިފިއެވެ.

އާން ދޯ ޗެމްޕިއަންކަން ހޯދީ ފައިނަލްގައި އެލްޖީ އެފްސީއާ ވާދަކޮށް މެޗުގެ ފުރިހަމަ ވަގުތު ހަމަވިއިރު ދެޓީމް އެއްވަރުވުމުން ނަތީޖާ ނެރުމަށް ޖެހި ޕެނަލްޓީގައި ކުރި ހޯދައިގެންނެވެ. މެޗުގެ ފުރިހަމަ ވަގުތު ހަމަވީ 2-2 ން ދެޓީމް އެއްވަރުވެގެންނެވެ. ޕެނަލްޓީގައި އާންދޯ ކުރި ހޯދީ 3-1 ނެވެ. ފައިނަލް މެޗުގެ މޮޅު ކުޅުންތެރިއަކީ އާން ދޯގެ އާދަމް މަންސޫރެވެ. މުބާރާތުގެ އެންމެ މޮޅު ކުޅުންތެރިއަކީވެސް އޭނާއެވެ. މުބާރާތުގެ ޗެމްޕިއަންކަން އާން ދޯ ހޯދީ ކުޅުނު ހުރިހާ މެޗެއްވެސް ކާމިޔާބުކޮށްގެންނެވެ.

މުބާރާތުގެ ފެއަރޕްލޭ ކުޅުންތެރިއަކީ ފެނަކަ ޔުނައިޓެޑްގެ އަލީ އަބުދުاللهއެވެ. ފެއަރޕްލޭ ޓީމަކީ ޔުނައިޓެޑް އޭއީޖީއެވެ. މުބާރާތުގެ އެންމެ އުއްމީދީ ކުޅުންތެރިއަކީ އެފްސީ ބްލެކް ހޯކްގެ އަހުމަދު ޒަލަފްއެވެ. މުބާރާތުގެ ރަންބޫޓް ދެ ކުޅުންތެރިއަކު ހިއްސާކުރިއެވެ. އެއީ ވަނީލާ ސްޕޯރޓްސް ކްލަބްގެ ޖިނާހުއާއި އަހުމަދު ހަފީޒުއެވެ. މުބާރާތުގެ އެންމެ މޮޅު ފަސް ކުޅުންތެރިންނަކީ އާން ދޯގެ އާދަމް މަންސޫރު, ހަސަން އަބުދުالله, އަހުމަދު ހަފީޒު, އެލްޖީ އެފްސީގެ މުޙައްމަދު ޖުމާން, އަދި މުޙައްމަދު އަޒުލިފްއެވެ.

15 ޓީމް ވާދަކުރި މުބާރާތުގެ ޗެމްޕިއަން ޓީމަށް ކަނޑައެޅިފައި އޮތީ 20,000 ރުފިޔާއެވެ. މިއީ އަލިފުށި ރެޓްރޯ ކޮފީން އިންތިޒާމްކޮށްގެން ބޭއްވި މުބާރާތެކެވެ.