"ކޮންމެ ސީޒަނަކު 150 ކުޅުންތެރިން ހޯދާކަން ނޫޅެން!"

މެންޗެސްޓަރ ސިޓީން ކޮންމެ ސީޒަނަކު 150 ކުޅުންތެރިން ހޯދަން ނޫޅޭ ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފިއެވެ.

އޭނާ މިހެން ބުނީ ސިޓީން ޕެރިސް ސެއިންޓް ޖާމަން (ޕީއެސްޖީ) ގެ ފޯވާޑް ނޭމާ ޖޫނިއަރ ހޯދުމަށް މަސައްކަތް ކުރާ ކަމަށް ބުނެ ވާހަކަ ދައްކާ ދަނޑިވަޅެއްގައެވެ. ގާޑިއޯލާ ބުނީ ނޭމާއަކީ ހުނަރުވެރި މޮޅު ކުޅުންތެރިއެއް ކަމަށާއި، އޭނާއަށް މައުލޫމާތު ލިބިފައިވާ ގޮތުގައި ނޭމާ އަކީ ވަރަށް ތަފާތު ކުޅުންތެރިއެއް ކަމަށެވެ. ނޭމާ ހޯދަން މަސައްކަތް ކުރާ ވާހަކަ ދޮގުކުރަމުން މަޒާޖީ ގޮތަކަށް ގާޑިއޯލާ ބުނީ، މީޑިއާތަކުގައި ވާހަކަ ދެކެވޭ ގޮތަށް ސިޓީން ކޮންމެ ސީޒަނަކު 150 ކުޅުންތެރިން ހޯދަން ނޫޅޭ ކަމަށެވެ.

މީގެ އިތުރުން ގާޑިއޯލާ ވަނީ އައު ސީޒަނަށް ތައްޔާރުވުމުގެ ގޮތުން މެންޗެސްޓަރ ސިޓީން އެމެރިކާއަށް ކުރި ދަތުރުގައި މުހިންމު ތިން ކުޅުންތެރިޔަަކަށް ބައިވެރި ނުވެވުނީތީ ހިތްހަމަ ނުޖެހޭ ކަމަށް ވެސް ބުނެފައެވެ.

ސިޓީގެ ދަތުރުގައި ބައިވެރިނުވެވުނު ތިން ކުޅުންތެރިންނަކީ ފިލް ފޮޑެންއާއި, ޑިފެންޑަރ ޖޯން ސްޓޯންސް އަދި މިޑްފީލްޑަރ ގުންޑޮގާންއެވެ. ތިން ކުޅުންތެރިންނަށްވެސް ބައިވެރި ނުވެވެނީ އެމެރިކާއަށް އެތެރެވުމަށް ފުރިހަމަކުރަން ޖެހޭ ކަންކަން ފުރިހަމަ ނުކުރެވިގެންނެވެ. އެހެންކަމުން އެތިން ކުޅުންތެރިން މިހާރު އަންނަނީ ކްލަބްގެ އެލީޑް ޑިވެލޮޕްމަންޓް ސްކޮޑާއެކު ކްރޮއޭޝިޔާގައި ތަމްރީނުތައް ހަދަމުންނެވެ.

ގާޑިއޯލާ ބުނީ ލީގު ތަށި ދިފާއުކުރަން ނިކުންނައިރު، ޓީމު ވަރަށް ވަރުގަދަޔަށް ތައްޔާރުވާނެ ކަމަށް އުންމީދުކުރެވޭކަމަށެވެ. ނަމަވެސް މުހިންމު ތިން ކުޅުންތެރިންނަށް ދަތުރުގައި ބައިވެރިނުވެވުނީތީ ހިތްހަމަ ނުޖެހޭކަން ފާހަގަކޮށް އޭނާ ބުނީ، ހުރިހާ ކުޅުންތެރިން ހާޒިރުވެގެން ޕްރީ ސީޒަންގެ ފަރިތަކުރުންތައް ކުރިއަށް ގެންދެވުނު ފަހަރަކީ ސިޓީން 100 ޕޮއިންޓާއެކު ލީގު ނިންމާލި ސީޒަން ކަމަށެވެ. ގާޑިއޯލާ ބުނީ އޭރު ސީޒަންތައް ފަށަނީ ގިނަ މައްސަލަތަކާ ކުރިމަތިލައިގެން ކަމަށާއި، އޭގެ ސަބަބުން މުހިންމު ޕޮއިންޓުތަކެއް ގެއްލޭ ފަހަރު ވެސް އަންނަ ކަމަށެވެ.

މީގެ އިތުރުން ގާޑިއޯލާ ބުނީ މިފަހަރުގެ ޕްރީ ސީޒަންގެ ފަރިތަކުރުންތަކުގައި ހުރިހާ ކުޅުންތެރިންނަށް ބައިވެރިވެވޭނެ ކަމަށް އޭނާ ވަރަށް އުންމީދު ކުރި ކަމަށެވެ. ނަމަވެސް ބައެއް ކުޅުންތެރިންގެ އަމިއްލަ ސަބަބުތަކާ ހުރެ ބައިވެރިނުވެވުނު ކަމަށާއި، އެކަަމަކުވެސް ސިޓީން ދާނީ ކުރިއަަށް ކަމަށެވެ. އިތުރަށް ގާޑިއޯލާ ބުނީ ބައިވެރިނުވެވުނު ކުޅުންތެރިން ކްރޮއޭޝިޔާގައި ތަމްރީނުތައް ހެދުމަށްފަހު ޓީމާ ގުޅޭނެ ކަމަށާއި، އެ ކުޅުންތެރިން ތިބީ ފިޓުކޮށް ކަމަށެވެ.

އެމެރިކާގެ ޓުއާގައި ސިޓީން އެކުވެރިކަމުގެ ދެ މެޗެއް ކުޅޭނެއެވެ.