މެންޗެސްޓަރ ސިޓީގެ ޖަރޒީއެއްގައި ސޮއިކުރުމަށް ސްޓާލިން ދެކޮޅު ހަދައިފި

މެންޗެސްޓަރ ސިޓީގެ ޖަރޒީއެއްގައި ސޮއިކުރުމަށް ރަހީމް ސްޓާލިން ދެކޮޅު ހަދައިފިއެވެ.

ހަތް އަހަރު މެންޗެސްޓަރ ސިޓީގައި ހޭދަކުރުމަށްފަހު ސްޓާލިން ޗެލްސީއަށް ބަދަލުވީ މި މަހުގެ ތެރޭގައެވެ. ފަސް އަހަރު ދުވަހުގެ އެއްބަސްވުމެއްގެ ދަށުން ޗެލްސީއަށް ބަދަލުވި ސްޓާލިންގެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ. އެއްބަސްވުމުގެ މުއްދަތު ހަމަވުމުން، އެ މުއްދަތު އިތުރު ކުރުމުގެ ފުރުސަތު ވެސް އޮންނާނެއެވެ. ސްޓާލިން އަކީ ޗެލްސީގެ އައު އޯނަރު ޓޮޑް ބޮހްލީ ޓީމާ ހަވާލުވި ފަހުން އެ ޓީމުން ހޯދި ފުރަތަމަ ކުޅުންތެރިޔާއެވެ.

ސިޓީ ދޫކޮށް ޗެލްސީއަށް ބަދަލުވަމުން ސްޓާލިން ވަނީ ވަދާއީ މެސެޖެއް ހިއްސާކޮށްފައެވެ. އެ މެސުޖުގައި އޭނާ ބުނީ ސިޓީގައި ހޭދަކުރި ހަތް އަހަރާއި، އެ ޓީމާއެކު ކާމިޔާބުކުރެވުނު 11 ތައްޓަކީ އޭނާގެ އުމުރު ދުވަހުގެ ހަނދާނެއް ކަމަށާއި، ސިޓީއާ ގުޅުނީ އުމުރުން 20 އަހަރުގައި ނަމަވެސް، އެ ޓީމު ދޫކޮށް އޭނާ ދަނީ މީހެއްގެ ގޮތުގައި ހުރެކަމަށެވެ.

ސޯޝަލް މީޑިއާގައި ދައުރުވަމުންދާ ވީޑިއޯއެއްގައި ފެންނަ ގޮތުގައި ސްޓާލިން އަންނަނީ ޗެލްސީގެ ސްޕޯޓަރުންނާއެކު ވަގުތުކޮޅެއް ހޭދަކުރަމުންނެވެ. އެވަގުތުގެ ތެރޭގައި ސްޕޯޓަރުންގެ އަތުގައި އޮތް ޗެލްސީގެ ޖަރޒީގައި ސްޓާލިން އައީ އޭނާގެ ސޮއިކުރަމުންނެވެ. ސޮއިކުރަމުން ދިޔަ ވަގުތުގައި އެތަނުގައި ހުރި ސަޕޯޓަރަކު ސްޓާލިންގެ އަތަށް މެންޗެސްޓަރ ސިޓީގެ ޖަރޒީއެއް ދިއްކުރާ މަންޒަރު ފެނެއެވެ. ނަމަވެސް ސްޓާލިން ވަނީ އެ ޖަރޒީގައި ސޮއިކުރުމަށް ދެކޮޅު ހަދައި، ޖެހިގެން ހުރި ސްޕޯޓަރުގެ އަތުގައި އޮތް ޗެލްސީގެ ޖަރޒީގައި ސޮއިކޮށްފައެވެ.

ސިޓީ ދޫކޮށް ސްޓާލިން ޗެލްސީއަށް ބަދަލުވެފައިވާއިރު، އެ ޓީމުން މިހާރު އަންނަނީ ޕްރީ ސީޒަަންގެ ފަރިތަކުރުންތައް ކުރިއަށް ގެންދަމުންނެވެ. ޗެލްސީއަސް ބަދަލުވުމާއެކު އެ ޓީމުގެ ކޯޗު ތޯމަސް ޓުޗެލް ވަނީ ސްޓާލިންއަށް ވަރަށް ބޮޑަށް ތައުރީފު ވެސް ކޮށްފައެވެ. ޓުޗެލް ބުނެފައިވަނީ ސްޓާލިން އަކީ ޗެލްސީއަށް ބޭނުންވާ ފެންވަރުގެ ކުޅުންތެރިއެއްކަމަށާއި، ޗެލްސީ ޗެލްސީގެ ގޮތުގައި ބާއްވަން އޭނާއަށް އެހީވެވޭނެކަމަށެވެ. މީގެ އިތުރުން ޓުޗެލް ބުނެފައިވަނީ މެންޗެސްޓަރ ސިޓީއާއި ލިވަޕޫލާ ގާތުގައި ޗެލްސީ އޮތުމަށް ސްޓާލިންއަށް އެހީވެވޭނެކަމަށާއި، އެއީ ޗެލްސީއަށް ލިބުނު ބޮޑު "އެސެޓެއް" ކަމަށެވެ.