ސްޕެއިންގެ އެޓްލެޓިކޯ މެޑްރިޑް ދޫކޮށް އިނގިރޭސިވިލާތުގެ މެންޗެސްޓަރ ޔުނައިޓެޑަށް ބަދަލުވުން އެކަށީގެންވާ ކަމަށް އެންޓޮއިން ގްރީޒްމަން ބުނެފިއެވެ.
ފްރާންސްގެ ޓީވީ ޝޯ އަކަށް ދިން އިންޓަވިއުއެއްގައި ގްރީޒްމަން ބުނީ ޓްރާންސްފާގައި ޔުނައިޓެޑަށް ބަދަލުވުމުގެ ފުރުސަތު ދިހައަކުން ހަ ޕަސެންޓް އޮތް ކަމަށެވެ.
ގްރީޒްމަން އެގޮތަށް ރޭޓްކޮށްފައި ވަނީ އޭނާ ޔުނައިޓެޑަށް ބަދަލުވުމުގެ ފުރުސަތު އޮތް ކަމަށް ބުނުމުން އެ ޝޯގެ ޕްރެޒެންޓަރު ގްރީޒްމަންގެ އެވާހަކައަށް އޭނާ އަމިއްލައަށް 10-1 އާ ދެމެދު ދޭނީ ކިހާ ވަރެއްތޯ ސުވާލު ކުރުމުންނެވެ.
ފްރާންސްގެ ގައުމީ ޓީމަށް ވެސް ކުޅެމުން އަންނަ އުމުރުން 26 އަހަރުގެ ގްރީޒްމަން ބުނީ ކުރިއަށް އޮތް ދެ ހަފްތާއެއްގެ ތެރޭގައި އޭނާގެ މުސްތަޤްބަލާ ގުޅޭ ގޮތުން ގޮތެއް ނިންމާނެ ކަމަށެވެ.
ގްރީޒްމަން ޔުނައިޓުން ފެނިދާނެތޯ ފްރާންސްގެ ކޯޓިޑިއެން ޝޯގެ ޕްރެސެންޓަރ ތަކުރާރުކޮށް ސުވާލު ކުރުމުން ވެސް ގްރީޒްމަން ވެސް ވަނީ އޭނާ ޔުނައިޓެޑަށް ބަދަލުވުމަކީ އެކަށީގެންވާ ކަމެއް ކަމަށް ޖަވާބުތަކުރާރު ކޮށްފައެވެ.
މިއީ ގްރީޒްމަން ޔުނައިޓެޑުން ފެނިދާނެ ކަމަށް ބުނި ފުރަތަމަ ފަހަރެވެ. ޝޯގެ ޕްރެސެންޓަރު އެ ސުވާލު އަމާޒްކޮށްލުމުން ގްރީޒްމަން ބުނެފައި ވަނީ މިއީ އޭނާ އެގޮތަށް ބުނި ފުރަތަމަ ފަހަރު ކަމަށެވެ.
ގްރީޒްމަންގެ ސޮއި ހޯދުމަށް 100 މިލިއަން ޔޫރޯގެ އަގެއް ހުށަހެޅުމަށް ޔުނައިޓުން އޮތީ ތައްޔާރަށެވެ. އަދި އެކަމުގެ މަޝްވަރާތައް ދެ ކުލަބުގެ މެދުގައި ވެސް ކޮންމެވެސް ވަރަކަށް ހިނގާފައިވާ ކަމަށް ރިޕޯޓްތައް ބުނެފައި ވެއެވެ.
ޔުނައިޓެޑަށް ގްރިޒްމަންގެ ސޮއި ހޯދިދާނެ ކަމަށް ބެލެވޭ އަނެއް ސަބަބަކީ އަންނަ ސީޒަނުގައި އެކުލަބަށް ޗެމްޕިއަންސް ލީގަށް ކޮލިފައިވުމުގެ ފުރުސަތު އޮތުމެވެ.
ބުދަ ދުވަހު ރޭ އަޔެކްސްއާ ދެކޮޅަށް ޔޫރޮޕާ ލީގުގައި ޔުނައިޓެޑުން ނުކުންނަ އިރު އެ މުބާރާތް ކާމިޔާބު ކޮށްފި ނަމަ ޔުނައިޓެޑަށް ޗެމްޕިއަންސް ލީގަށް ކޮލިފައިވެވޭނެއެވެ. އެހެންވެއްޖެ ނަމަ ގްރީޒްމަން ހޯދުމުގައި ޔުނައިޓެޑަށް ފަސޭޙަތަކެއް ލިބިގެންދާނެއެވެ.
އަނެއްކޮޅުން ފްރާންސްގެ ތަރި ޕައުލް ޕޮގްބާ ޔުނައިޓެޑުގައި ހުރުމަކީ ވެސް ގްރީޒްމަން ހޯދުމުގައި އެކުލަބަށް އޮތް އެޑްވާންޓޭޖެކެވެ. އެއީ ޕޮގްބާއާ އެއްކުލަބަކަށް ކުޅެން ބޭނުންވާ ކަމަށް ގްރީޒްމަން ބުނެފައިވެއެވެ.
