ރެއިމްސް އަށް ކުޅެމުން އައި ފްރާންސްގެ ޒުވާން ފޯވާޑް ހޫގޯ އެކިޓީކޭ ޕެރިސް ސެއިންޓް ޖާމަން (ޕީއެސްޖީ)އަށް ބަދަލުވެއްޖެއެވެ.

މިއީ ކުރިއަށް އޮތް ސީޒަނަށް ތައްޔާރުވުމުގެ ގޮތުން ޕީއެސްޖީން ހޯދި ތިންވަނަ ކުޅުންތެރިޔާއެވެ. މީގެ ކުރިން އެ ޓީމުން ވަނީ ނޫނޯ މެންޑޭސް އައި ވިޓީނިއާގެ ސޮއި ހޯދާފައެވެ.

އުމުރުން 21 އަހަރުގެ އެކިޓީކޭ ޕީއެސްޖީއަށް ގުޅުނީ ލޯނު އެއްބަސްވުމެއްގެ ދަށުންނެވެ. ޕީއެސްޖީއަށް އޭނާ ބަދަލުވީ، އެ ޓީމުން ބޭނުންވާނަމަ ދާއިމީކޮށް އޭނާ އެ ޓީމަށް ގަނެވޭ ގޮތަށެވެ. އޭނާ ވަނީ ނިމުނު ސީޒަނުގެ ފްރާންސް ލީގުގައި ރެއިމްސް އަށް ކުޅެދިން 26 މެޗުގައި 11 ލަނޑު ޖަހާފައެވެ.

ޕީއެސްޖީއަށް ބަދަލުވުމަށްފަހު އޭނާ ބުނީ، އެ ޓީމަށް ބަދަލުވުމަކީ އެތަކެއް އިހްސާސް ކުރެވޭ ކަމެއް ކަމަށެވެ. އެކިޓީކޭ ވަނީ ޕީއެސްޖީއަށް ކުޅުމުގެ ފުރުސަތު ލިބުމަކީ ފަޚުރުވެރިކަމެއް ކަމަށް ބުނެފައެވެ. މީގެ އިތުރުން އޭނާ ބުނީ ޕީއެސްޖީއާއެކު ކުރިއަށް ދާން ނިންމީ އެތަކެއް ސަބަބުތަކެއް ހުރުމުން ކަމަށެވެ. އެގޮތުން އޭނާ އަކީ ފްރާންސްގެ ކުޅުންތެރިއެއްކަން ފާހަގަކޮށް، އެކިޓީކޭ ބުނީ ޕީއެސްޖީއަކީ އޭނާގެ އަމިއްލަ ވަޒަނުގައި އޮތް ޓީމެއް ކަމަށެވެ.

އެކިޓީކޭ ޤަބޫލުކުރާ ގޮތުގައި ދުނިޔޭގެ ފެންވަރުގައި ފާހަގަކޮށްލެވޭ ފަދަ މޮޅެތި ކުޅުންތެރިން ޕީއެސްޖީގައި އެބަ ތިއްބެވެ. މީގެ އިތުރުން ޕީއެސްޖީގައި ތިބީ ތަޖުރިބާކާރު ކޯޗިން ސްޓާފުންކަން ފާހަގަކޮށް އޭނާ ބުނީ އެ ޓީމަކީ ހުރިހާ މުބާރާތެއްގެ ތަށި ކާމިޔާބުކުރަން އެދޭ ޓީމެއް ކަމަށެވެ. މީގެ އިތުރުން އޭނާ ބުނީ ޕީއެސްޖީއަކީ އެންމެ ރަނގަޅު ޗޮއިސް ކަމަށާއި، ކުރިމަގުގައި ކުރިއަށް ދާން ބޭނުންވާ ހުރިހާ ކަމެއް އެ ޓީމުން ލިބޭނެ ކަމަށެވެ.

އެކިޓީކޭ ޕީއެސްޖީއަށް ބަދަލުވީ އޭނާ ހޯދުމުގެ މަސައްކަތް ނިއުކާސަލް އިން ކުރަމުން ދަނިކޮށެވެ. އޭނާ ނިއުކާސަލަށް ބަދަލު ނުވީ، ޕީއެސްޖީއަކީ އަބަދު ވެސް އޭނާ ކުޅެން ބޭނުންވާ ޓީމަކަށް ވެފަައި. ޕީއެސްޖީގެ ހުށަހެޅުން ރަނގަޅުވުމުންނެވެ.