ސިޓީގެ ތިން ކުޅުންތެރިއަކަށް ޕްރީ ސީޒަން ޓުއަރގައި ބައިވެރިނުވެވުނު!

އާސީޒަނަށް ތައްޔާރުވުމަށް މެންޗެސްޓަރ ސިޓީން އެމެރިކާއަށް ކުރާ ދަތުރުގައި މުހިއްމު ތިން ކުޅުންތެރިއަކަށް ބައިވެރި ނުވެވުނެވެ.

ބައިވެރިނުވެވުނު ތިން ކުޅުންތެރިންނަކީ ފިލް ފޮޑެންއާއި, ޑިފެންޑަރ ޖޯން ސްޓޯންސް އަދި މިޑްފީލްޑަރ ގުންޑޮގާންއެވެ. ތިން ކުޅުންތެރިންނަށްވެސް ބައިވެރި ނުވެވެނީ އެމެރިކާއަށް އެތެރެވުމަށް ފުރިހަމަކުރަން ޖެހޭ ކަންކަން ފުރިހަމަ ނުކުރެވިގެންނެވެ. ނަމަވެސް އެއީ ކޮންކަމެއްކަން ކްލަބުންވެސް ނުބުނެއެވެ. އެހެންކަމުން އެތިން ކުޅުންތެރިން ތަމްރީނުތައް ކުރިއަށްގެންދާނީ ކްލަބްގެ އެލީޑް ޑިވެލޮޕްމަންޓް ސްކޮޑާއެކު ކްރޮއޭޝިޔާގައެވެ. ޕްރީ ސީޒަން ޓުއަރގައި ބައިވެރިނުވެވޭ ސިޓީގެ މުހިއްމު އަނެއް ކުޅުންތެރިއަކީ ލަޕޯޓްއެވެ. އޭނާ ބައިވެރިނުވަނީ ފިޓް ނުވާތީއެވެ. ޓީމާ އަލަށް ގުޅުނު ކުޅުންތެރިންކަމަށްވާ ފޯވާޑް ހާލާންޑް, އަލްވަރޭޒް އަދި މިޑްފީލްޑަރ ކަލްވިން ފިލިޕްސް ދަތުރުގައި ބައިވެރިވެއެވެ. އަދި ޗެލްސީން ޝައުޤުވެރިކަން ފާޅުކޮށްފައިވާ ޑިފެންޑަރ ނަތަން އަކޭއާއި, އާސެނަލްއިން ހޯދަން މަސައްކަތްކުރަމުން އަންނަ ޒިންޗެންކޯވެސް ބައިވެރިވެއެވެ.

ޔޫއެސް ޓުއަރގައި މެންޗެސްޓަރ ސިޓީން ކްލަބް އެމެރިކާގެ އިތުރުން ބަޔާން މިއުނިކާ ވާދަކުރާނެއެވެ. އާސީޒަންގައި ސިޓީގެ ފުރަތަމަ މެޗަކަށް ވާނީ މިމަހުގެ 30 ވަނަ ދުވަހު ކޮމިއުނިޓީ ޝީލްޑް މެޗުގައި ލިވަޕޫލާ ވާދަކުރާ މެޗެވެ.