މާޓިނޭޒް ހޯދުމަށް ޔުނައިޓެޑުން 45 މިލިއަން ޔޫރޯގެ ޑީލެއް ހަދައިފި

އަޔެކްސްއަށް ކުޅެމުން އަންނަ ލިސާންޑްރޯ މާޓިނޭޒް ހޯދުމަށް 45 މިލިއަން ޔޫރޯގެ ޑީލެއް މެންޗެސްޓަރ ޔުނައިޓެޑުން އަޔެކްސްއާއެކު ހަދައިފިއެވެ.

ޔުނައިޓެޑްގެ އައު ކޯޗު އެރިކް ޓެން ހާގް ޓީމާއި ހަވާލުވުމަށްފަހު އޭނާ ވަނީ މާޓިނޭޒް ހޯދުމަށް ވަރަށް ބޮދަށް މަސައްކަތް ކޮށްފައެވެ. 2019 ވަނަ އަހަރު މާޓިނޭޒް އަޔެކްސްއާއި ގުޅުނުއިރު އެޓީމުގެ ކޯޗަކަށް ހުރީ ޓެން ހާގެވެ.

މާޓިނޭޒްއަކީ ވާތްފަޅިން ފަހަތަށް ކުޅޭ ކުޅުންތެރިއެކެވެ. އެހެންކަމުން އޭނާއަށް ޔުނައިޓެޑްގައި އެ ޖާގަ ހުސްކުރުމަށް ޓެން ހާގް ވަނީ، ޓީމުގެ ކެޕްޓަން ހެރީ މެގުއާ ކުރިން އަދާކުރަމުން އައި ދައުރު ބަދަލުކޮށްފައެވެ. މީގެ ކުރިން ޑިފެންސްގެ މެދުތެރެއިން ވާތްފަޅީގައި މެގުއާ ބޮޑު ދައުރެއް އަދާކުރިނަމަވެސް މެލުބާންއާއެކު ކުޅުނު ޕްރީ ސީޒަން މެޗުގައި ޓެން ހާގް ވަނީ ޑިފެންސްލައިންގެ ކަނާތްފަޅިން މެގުއާ ލައްވާ ކުޅުވާފައެވެ.

މާޓިނޭޒް މިހާރު ވަނީ މެޑިކަލް ޓެސްޓާއި ވިސާގެ ކަންތައް ހަމަޖެއްސުމަށް މެންޗެސްޓަރއަށް ދަތުރުކޮށްފައެވެ. ނަމަވެސް އޮސްޓްރޭލިއާގައި ޕްރީ ސީޒަނަށް ތައްޔާރުވުމަށް ޔުނައިޓެޑް ކުޅެމުން އަންނަ އެއްވެސް މެޗަކުން މާޓިނޭޒް ފެނުން ދުރުކަމަށް ރިޕޯޓުތައް ބުނެއެވެ.

މާޓިނޭޒްއަކީ މިދިޔަ ސީޒަންގައި އަޔެކްސްގެ ސަޕޯޓަރުން ހޮވި، ޓީމުގެ އެންމެ މޮޅު ކުޅުންތެރިޔާއެވެ.

ޔުނައިޓެޑުން އަންނަނީ މިއަންނަ ސީޒަން ފެށެންވާއިރަށް އެޓީމު ރަނގަޅުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން މާޓިނޭޒްއަކީ މި ޓްރާންސްފަރ މާކެޓުގައި ޔުނައިޓެޑުން ހޯދި ތިންވަނަ ކުޅުންތެރިޔާއެވެ. ޑެންމާކުގެ ކްރިސްޓެން އެރިކްސަން އިއްޔެ ޔުނައިޓެޑަށް ސޮއިކުރިއިރު، އެޓީމުން ވަނީ މި މަސް ފެށުނުކޮޅު ނެދަލެންޑްސްގެ ފުލް ބެކް ޓައިރެލް މަލާސިއާވެސް އެޓީމަށް ގެންގޮސްފައެވެ. މީގެ އިތުރުން ބާސެލޯނާގެ މެދުތެރެ ބަލަހައްޓަމުން އަންނަ ފްރެންކީ ޑިޔޯންގ ހޯދުމަށްވެސް ޔުނައިޓެޑުން އަންނަނީ ވަރަށް ބޮޑަށް މަސައްކަތް ކުރަމުންނެވެ.