ކިމްޕެމްބޭއާ މެދު ވާނެ ގޮތެއް ބުނަން ގަލްޓިއޭ އަށް ނޭނގޭ

ޕެރިސް ސެއިންޓް ޖާމަން (ޕީއެސްޖީ)އަށް ކުޅެމުން އަންނަ ފްރާންސްގެ ޑިފެންޑަރު ކިމްޕެމްބޭއާ މެދު ވާނެ ގޮތެއް ބުނަން ނޭންގޭ ކަމަށް އެ ޓީމުގެ ކޯޗު ކްރިސްޓޮފް ގަލްޓިއޭ ބުނެފިއެވެ.

ޕީއެސްްޖީގެ ކޯޗުކަމުގެ މަގާމަށް ގަލްޓިއޭ ހަމަޖެއްސުމުގެ މަޤްސަދަކީ އަންނަ ސީޒަނަށް އެ ޓީމު ވަރުގަދަ ކުރުމެވެ. ޚާއްސަކޮށް ޕީއެސްޖީގެ އެންމެ ބޮޑު ޓާގެޓަކަށް ވެފައިވާ ޗެމްޕިއަންސް ލީގު ކާމިޔާބުކުރުން ކަމަށް މީޑިއާ ރިޕޯޓުތައް ބުނެއެވެ.

ޕީއެސްޖީން ޕްރީ ސީޒަންގެ ފަރިތަކުރުންތައް ފަށައިގެން ކުރިއަށް ގެންދާއިރު، ހުކުރު ދުވަހުގެ ރޭ އެ ޓީމުން ވަނީ އެކުވެރިކަމުގެ މެޗެއް ވެސް ކުޅެފައެވެ. ޕްރީ ސީޒަންގެ ފުރަތަމަ މެޗުގައި އެ ޓީމުން ވަނީ ކުއެވިލީގެ މައްޗަށް 2-0 ން ކުރި ހޯދާފައެވެ. އެ މެޗުގައި ޕީއެސްޖީގެ ލަނޑުތައް ޖެހީ ސާޖިއޯ ރާމޯސް އާއި ގަސަމާއެވެ.

ޕީއެސްޖީގެ ޑިފެންސް ލައިނުގައި މުހިންމު ރޯލެއް އަދާކުރަމުން އަންނަ ކިމްޕެމްބޭއާ ގުޅޭ ގޮތުން ވާހަކަ ދައްކަމުން ގަލްޓިއޭ ބުނީ، އޭނާއާ ގުޅިގެން ދައްކާ ހުރިހާ ވާހަކަތަކެއް އަޑު އަހައިފި ކަމަށެވެ. އަދި އެ ވާހަކަތަކާ މެދު އޭނާ އާއި ކިމްޕެމްބޭ އެކުގައި ހީ ސަމާސާ ވެސް ކުރި ކަމަށެވެ. މީގެ އިތުރުން ގަލްޓިއޭ ބުނީ ކިމްޕެމްބޭ އަކީ އޭނާ ވަރަަށް ގަޔާވާ ކުޅުންތެރިއެއް ކަމަށެވެ. ކިމްޕެމްބޭއަކީ ރަނގަޅު ޑިފެންޑަރެއްކަން ފާހަގަކޮށް ގަލްޓިއޭ ބުނީ، އޭނާއާ މެދު ކަންތައް ވޭނެ ގޮތެއް ބުނަން ނޭނގޭ ކަމަށެވެ.

ގަލްޓިއޭ މިފަދައިން ވާހަކަ ދައްކަމުން އަންނައިރު، ކިމްޕެމްބޭ ހޯދުމުގެ ގޮތުން ޗެލްސީއާއި ޕީއެސްޖީއާ ދެމެދު އަންނަނީ މަޝްވަރާތައް ކުރަމުންނެވެ. ޗެލްސީގެ ކޯޗު ތޯމަސް ޓުޗެލްގެ އެންމެ ބޮޑު ޓާގެޓަކީ އެ ޓީމުގެ ޑިފެންސް ވަރުގަދަ ކުރުމެވެ.