އާސެނަލުން ޒިންޗެންކޯ ހޯދުމަށް މަސައްކަތް ކުރަނީ

މެންޗެސްޓަރ ސިޓީގެ ޑިފެންޑަރު ޒިންޗެންކޯ ހޯދުމުގެ މަސައްކަތް އާސެނަލްއިން ފަށައިފިއެވެ.

ކުރިއަށް އޮތް ސީޒަންއަށް ޓީމު ވަރުގަދަ ކުރުމަށް އާސެނަލްއިން ކުރަމުން އަންނަ މަސައްކަތުގެ ތެރެއިން، ޒިންޗެންކޯ ހޯދުމަށް އެ ޓީމުން އަންނަނީ ސިޓީއާ މަޝްވަރާތައް ކުރަމުންނެވެ. މީޑިއާ ރިޕޯޓުތައް ބުނާ ގޮތުގައި އާސެނަލްއިން ޒިންޗެންކޯ ހޯދުމުގެ މަސައްކަތް ކުރަނީ ސިޓީން އޭނާ ވިއްކާލަން ބޭނުންވެފައިވާ ދަނޑިވަޅެއްގައި ކަމަށެވެ. އަދި ޒިންޗެންކޯ އަކީ އާސެނަލްގެ ކޯޗު މިކެލް އާޓެޓާ ގަޔާވާ ކުޅުންތެރިއެއް ކަމަށް ވެސް ރިޕޯޓުތަކުގައި ވެއެވެ.

ޒިންޗެންކޯ އޭނާގެ ސީނިއަރ ކެރިއަރު ފަށާފައިވަނީ 2015 ވަނަ އަހަރު އެފްސީ އުފާ އިންނެވެ. އެ ޓީމަށް އެއް އަހަރު ދުވަހު ކުޅެދިނުމަށްފަހު، އޭނާ ސިޓީއަށް ބަދަލުވީ 2016 ވަނަ އަހަރުއެވެ. އޭގެ ފަހުން ޒިންޗެންކޯ ވަނީ ސިޓީއަށް 128 މެޗު ކުޅެދީ، ދެ ލަނޑު ޖަހާފައެވެ. މީގެ އިތުރުން އޭނާ ވަނީ ސިޓީއާއިއެކު އިނގިރޭސި ޕްރިމިއަރ ލީގު، އެފްއޭ ކަަޕް، ކަރަބޯ ކަޕް އަދި އެފްއޭ ކޮމިއުނިޓީ ޝީލްޑް ކާމިޔާބުކޮށްފައެވެ. ސިޓީއަށް ބަދަލުވި ފަހުން އޭނާ ވަނީ ލޯނު އެއްބަސްވުމެއްގެ ދަށުން ދެ ޓީމަކަށް ކުޅެފައެވެ.

އުމުރުން 25 އަހަރުގެ ޒިންޗެންކޯ އަންނަނީ 2015 ވަނަ އަހަރުން ފެށިގެން ޔުކްރެއިންގެ ޤައުމީ ޓީމަށް ވެސް ކުޅެމުންނެވެ. އޭނާ ވަނީ މިހާތަނަށް ޤައުމީ ޓީމަށް ކުޅެދިން 52 މެޗުގައި އަށް ލަނޑު ޖަހާފައެވެ.

ދާދި ފަހުން އާސެނަލް އިން ވަނީ ސިޓީގެ ފޯވާާޑް ގެބްރިއަލް ޖެސުސްގެ ސޮއި ހޯދާފައެވެ. އެހެންކަމުން ޒިންޗެންކޯގެ ޑީލް ކާމިޔާބުކުރެވިއްޖެނަމަ، އެއީ އާސެނަލުން ހޯދާ ސިޓީގެ ދެ ވަނަ ކުޅުންތެރިޔާއެވެ.