މެންޗެސްޓަރ ސިޓީއަށް ކުޅެމުން އަންނަ އަލްޖީރިއާގެ ރިޔާދް މާރޭޒް އެ ޓީމާއެކު ހަދާފައިވާ އެއްބަސްވުމުގެ މުއްދަތު އިތުރުކޮށްފިއެވެ.
ސިޓީއާއެކު އޭނާ ހަދާފައިވާ އެއްބަސްވުމުގެ މުއްދަތު ޖޫން މަހުގެ ނިޔަލަށް ވަނީ ހަމަވެފައެވެ. މާރޭޒް ވަނީ އިތުރު ތިން އަހަރު ސިޓީގައި މަޑުކުރުމަށް ނިންމައި، އެއްބަސްވުމުގައި ސޮއިކޮށްފައެވެ. ސިޓީއާއެކު އޭނާ ހެދި އައު އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ.
ސިޓީއާއެކު އައު އެއްބަސްވުމުގައި ސޮއިކުރުމަށްފަހު މާރޭޒް ބުނީ، އެކަމާ މެދު އޭނާ ވަރަށް އުފާވާކަމަށެވެ. މާރޭޒް ބުނީ ސިޓީގައި އޭނާ ހޭދަކުރާ ކޮންމެ ވަގުތަކީ ވެސް ނުހަނު އުފަލާއެކު ހޭދަކުރާ ވަގުތެއް ކަމަށެވެ. އަދި ސިޓީ ކަހަލަ ބޮޑު ޓީމެއްގައި ހިމެނުމަކީ ފަޚުރެއްކަމަށް އޭނާ ބުންޏެވެ. އިތުރަށް މާރޭޒް ބުނީ ނިމުނު ހަތަރު ސީޒަން އަކީ ވެސް އެންމެން އެކުގައި ގިނަ ކާމިޔާބީތަކެއް ހޯދަން މަސައްކަތް ކުރެވުނު ސީޒަންތަކެއް ކަމަށާއި، އެއީ ހަނދާނުން ފޮހެލަން އުނދަގޫ ދުވަސްތަކެއް ކަމަށެވެ.
މީގެ އިތުރުން މާރޭޒް ވަނީ ސިޓީގެ ކޯޗު ޕެޕް ގާޑިއޯލާއަށް ތައުރީފުކޮށްފައެވެ. އޭނާ ބުނީ ކަންކަން ރަނގަޅުކޮށް، އިތުރަށް ކުރިއަށްދާން ގާޑިއޯލާ އާއި ކޯޗިން ސްޓާފުންގެ ފަރާތުން ވަރަށް ބޮޑު އެއްބާރުލުމެއް ލިބޭ ކަމަށެވެ. މާރޭޒް ބުނީ މިހާރު އޭނާ އެންމެ ބޭނުންވަނީ ކުރިއަށް އޮތް ސީޒަނުގައި ކާމިޔާބީތަކެއް ހޯދަން ކަމަށެވެ.
ލެއިސްޓަރ ސިޓީ ދޫކޮށް މާރޭޒް ސިޓީއަށް ބަދަލުވީ 2018 ވަނަ އަހަރުއެވެ. އޭގެ ފަހުން އޭނާ ވަނީ އެ ޓީމަށް ކުޅެދިން 189 މެޗުގައި 63 ލަނޑު ޖަހާފައެވެ. މާރޭޒް ވަނީ ސިޓީއާއެކު ގިނަ ކާމިޔާބީތަކެއް ހޯދާފައެވެ. އޭގެ ތެރޭގައި އިނގިރޭސި ޕްރިމިއަރ ލީގު ތިން ފަހަރު، އެފްއޭ ކަޕް އެއް ފަހަރު، ކަރަބޯ ކަޕް ތިން ފަހަރު އަދި އެފްއޭ ކޮމިއުނިޓީ ޝީލްޑް އެއް ފަހަރު ކާމިޔާބުކުރުން ހިމެނެއެވެ. މީގެ އިތުރުން އޭނާ ވަނީ ސިޓީއާއެކު 21- 2020 ވަނަ އަހަރުގެ ޔުއެފާ ޗެމްޕިއަންސް ލީގުގެ ފައިނަލް ކުޅެފައެެވެ.
އުމުރުން 31 އަހަރުގެ މާރޭޒް އަންނަނީ 2014 ވަނަ އަހަރުން ފެށިގެން އަލްޖީރިއާގެ ޤައުމީ ޓީމަށް ވެސް ކުޅެމުންނެވެ. އޭނާ ވަނީ ޤައުމީ ޓީމަށް މިހާތަނަށް ކުޅެދިން 75 މެޗުގައި 26 ލަނޑު ޖަހާފައެވެ.
މާރޭޒްގެ އިތުރުން ސިޓީއަށް ކުޅެމުން އަންނަ ރޮޑްރީ ވެސް ވަނީ އެއްބަސްވުމުގެ މުއްދަތު އިތުރުކޮށްފައެވެ. މިހާރު އެ ޓީމުން ކުރަމުން އަންނަނީ ފިލް ފޮޑެންގެ އެއްބަސްވުމުގެ މުއްދަތު އިތުރުކުރުމުގެ މަސައްކަތެެވެ.
