އަބްދުﷲ ޔާމީން އަބްދުލް ގައްޔޫމްގެ ސަރުކާރުގައި މޯލްޑިވްސް ރޯޑްސް ޑިވެލޮޕްމަންޓް ކޯޕަރޭޝަން (އެމްއާރުޑީސީ) އުވާލީ ވައްކަމާއި ޖަރީމާތައް ފޮރުވަން ކަމަށް ރޯޑް ޑިވަލޮޕްމަންޓް ކޯޕަރޭޝަން (އާރުޑީސީ)ގެ މެނޭޖިން ޑިރެކްޓަރ މޫސާ އަލީ މަނިކު (މޫކޭ) ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަ ދައްކަވަމުން މޫކޭ ވިދާޅުވީ މިއަދުގެ ސަރުކާރުން ކުންފުނިތައް ބަނގުރޫޓުވާކަށް ދުލެއް ނުކޮށްލާނެ ކަމަށެވެ. ވައްކަމާއި، ޖަރީމާ ފޮރުވަން ކުރީ ސަރުކާރުން އެމްއާރުޑީސީ އުވާލި ގޮތަށް މި ސަރުކާރުން ކުންފުނިތައް އުވައެއް ނުލާނެ ކަމަށް މޫކޭ ވިދާޅުވިއެވެ.

މޫކޭ ވިދާޅުވީ އެމްއާރުޑީސީ އިން ގެއްލިފައިވާ އެތައް ވެހިކަލެއް އެބަހުރި ކަމަށާއި، އެއިން އެއްވެސް އެއްޗަކަށް ވީނުވީއެއް ނޭނގޭ ކަމަށެވެ. ކުރީ ސަރުކާރުން އެމްއާރުޑީސީ އުވާލުމާއެކު މި ސަރުކާރުން ވަނީ އާރުޑީސީގެ ނަމުގައި ކުންފުންޏެއް އުފައްދާފައެވެ. އެއީ 2019 ވަނަ އަހަރުގެ އޮކްޓޯބަރު މަހުގެ ތެރޭގައެވެ.

މޫކޭ ވިދާޅުވީ ކުންފުނި އުފެދި އެ އަހަރުގެ ޑިސެމްބަރު މަސް ތެރޭގައި ދެ ޕްރޮޖެކްޓްއަކާއި ހަވާލުވި ކަމަށާއި، 2020 ވަނަ އަހަރުގެ ފުރަތަމަ ކުއާޓަރ ތެރޭގައިވެސް ދެ ޕްރޮޖެކްޓް އަކާއި ހަވާލުވި ކަމަށެވެ. އެ މަސައްކަތްތަކަށް މުވައްޒަފުން ނަގައި، ވާންޖެހޭ ތައްޔާރީތައް ވެފައި ވަނިކޮށް ކުރިމަރިލާންޖެހުނީ ކޮވިޑާ ކަމަށް މޫކޭ ވިދާޅުވިއެވެ. އެހެންނަމަވެސް މުވައްޒަފުން ވަޒީފާއިން ވަކިނުކޮށް، ދޭންޖެހޭ މުސާރަ ދީފައިވާނެ ކަމަށް މޫކޭ ވިދާޅުވިއެވެ. އެއީވެސް ކާމިޔާބީއެއްގެ ގޮތުގައި ދެކިވަޑައިގަންނަވާކަމަށް އޭނާ ވިދާޅުވިއެވެ.

އާރުޑީސީއަކީ ގެއްލުމުގައި ހިންގާ ކުންފުންޏެއް ކަމަށްބުނެ ޕީޕީއެމް ކައުންސިލް މެމްބަރ އިބްރާހިމް ޝުޖާއު ވިދާޅުވި ބަހަށް ރައްދުދެއްވައި މޫކޭ ވިދާޅުވީ 2020 އަދި 2021 ވަނަ އަހަރު ދިމާވި ކަންކަމާހުރެ ކުންފުންޏަށް އެއްވެސް ފައިދާއެއް ލިބިފައިނުވާކަމަށެވެ. އެހެންނަމަވެސް 2022 ވަނަ އަހަރުގެ ފުރަތަމަ ކުއާޓަރ ނިމުނީ ފައިދާ އާއިއެކުގައި ކަމަށް އޭނާ ވިދާޅުވިއެވެ. މި ކުއާޓަރގައި އެ ފައިދާ ތިން ގުނަ ކުރެވިފައިވާކަމަށާއި، ކުރިއަށް އޮތް ތަނުގައި ދާނީ ރަނގަޅުވަމުން ކަމަށް ބެލެވޭ ކަމަށް މޫކޭ ވިދާޅުވިއެވެ.

މޫކޭ އިތުރަށް ވިދާޅުވީ މީގެ ކުރިން ކުންފުނިތަކަށް ވާނުވާ ނުވެސް އެނގޭ ކަމަށެވެ. އެއީ ކިހިނެއްވެގެން ކަމެއް ނުވަތަ ކޮންމެ ކުއާޓަރއެއްގައި ކަން ހިނގާފައިވާ ގޮތް އެނގެން ނޯންނަ ކަމަށް މޫކޭ ވިދާޅުވިއެވެ. އެހެންނަމަވެސް މިއަދު ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން އެކަންކަން ބަލައި ރައްޔިތުންނަށް ހާމަކުރަމުންދާކަމަށް އޭނާ ވިދާޅުވިއެވެ. މިއަދުގެ ސަރުކާރަކީ ރައްޔިތުންނަށް ވެރިކަން ކޮށްދޭ ސަރުކާރެއް ކަމަށް މޫކޭ ވަނީ ވިދާޅުވެފައެވެ.