ރައީސް މުޢިއްޒުގެ ވެރިކަމުގައި ޕާޓީތައް އުވާލަން މަސައްކަތްކުރައްވާތަން ފެނޭ: މޫކޭ
17 މާރިޗު 2025 | ހޯމަ 22:44ރައްޔިތުން ސަރުކާރުދެކެ ފޫހިވެއްޖެ
އެމްޑީޕީގެ ޤައުމީ މަޖިލީހުގެ މަޑުއްވަރީ ދާއިރާގެ ރައީސް މޫސާ އަލީ މަނިކު (މޫކޭ)
ރައީސް މުޢިއްޒު އެތައް ޕާޓީއެއްގައި އުޅުއްވައިގެން ވެރިކަމަށް ވަޑައިގަތުމަށްފަހު ސިޔާސީ ޕާޓީތައް ވެސް އުވާލައްވަން މަގުފަހި ކުރައްވައި އެކަންވެސް ކުރައްވާތަން ފެންނަ ކަމަށް އާރުޑީސީގެ ކުރީގެ މެނޭޖިންގ ޑިރެކްޓަރ މޫސާ އަލިމަނިކު ( މޫކޭ) ވިދާޅުވެއްޖެއެވެ.
އޭނާ އެހެން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުންނެވެ.
މޫކޭ ވިދާޅުވީ ރައީސް މުޢިއްޒު އުޅުއްވި އެއްޕާޓީ މިވެރިކަމުގައި އުވާލައިފި ކަމަށާ ދެން ރާއްޖޭގައި ހުރި އެހެން ޕާޓީތައް ވެސް ފަސޭހައިން އުވާލެއްވުމަށް މިހާރު މަގުފަހިކުރައްވައިފި ކަމަށެވެ. އަދި ރާއްޖޭގައި ކޮމިޝަންތަކުގައި މިހާރު ތިއްބެވީ މިނިވަން މެންބަރުން ކަމަށް އަމިއްލައަށް ވިދާޅުވިޔަސް މިނިވަންކަމާއެކު މަސައްކަތްކުރެއްވޭ ބޭފުޅުން ނޫން ކަމަށެވެ.
ނުރަނގަޅު ބަދަލުތައް ގެންނެވުމުގައި މުޢިއްޒު އަބަދުވެސް ފައްޓަވަނީ އެންމެ މަތިން ކަމަށާ އެގޮތުން އަދުލު އިންސާފު ޤާއިމްކުރުމުގެ ބާރާ ކުޅެވަޑައިގަތީ ވެސް އެންމެމަތީ ކޯޓާ ހަމައިން ކަމަށް މޫކޭ ވިދާޅުވިއެވެ. އަދި މުޢިއްޒުއަކީ ކުއްލިއަކަށް ޖަންޕުޖައްސަވާ ބޭފުޅެއް ކަމަށް ވިދާޅުވިއެވެ.
މިވަގުތު ސަރުކާރުގެ އެއްވެސް އަމާޒެއް މިސްރާބެއް ނެތް ކަމަށާ ރައްޔިތުންނަށްވީ ވަޢުދު ނުފުއްދާ ކަމަށް މޫކޭ ވިދާޅުވިއެވެ. މޫކޭ ވަނީ މިސަރުކާރަކީ ދޮގާ ވައްކަމުގެ ސަރުކާރެއްގެ ގޮތުގައި ސިފަކޮށްފައެވެ. އަދި ރައްޔިތުންނަށް ރަނގަޅު ގޮތްތަކެއް ހޯދައިނުދެވި ، ސަރުކާރުދެކެ ރައްޔިތުންފޫހިވުމުން އަނިޔާވެރިވާ މަންޒަރު ފެންނަ ކަމަށް މޫކޭ ވިދާޅުވިއެވެ.
