އިނގިރޭސިވިލާތުގެ ބޮޑުވަޒީރު ހޮވުމަށް ކޮންޒަވޭޓިވް ޕާޓީގެ މަޖިލިސް މެމްބަރުންގެ މެދުގައި ނަގަމުން އަންނަ ވޯޓުގެ 2 ވަނަ ބުރުވެސް ރިޝީ ސުނާކް ކާމިޔާބު ކުރައްވައިފިއެވެ.

ބުރާސްފަތި ދުވަހު ކުރިއަށްގެންދިޔަ މި ވޯޓުގައި އެއް ކެންޑިޑޭޓަކު ވަނީ ރޭހުން ބޭރުވެވަޑައިގެންފައެވެ. އެއީ އެޓަރނީ ޖެނެރަލްގެ މަގާމުގައި ހުންނެވި ސުއެލާ ބްރެވަމަންއެވެ.

ދެވަނަ ބުރުގެ ވޯޓުގައި ރިޝީ ސުނާކަށް ވަނީ 101 ވޯޓު ލިބިވަޑައިގެންފައެވެ. ދެވަނައަށް އެންމެ ގިނަ ވޯޓު ކާމިޔާބުކުރެއްވީ ޕެނީ މޯރޑޮންޓެވެ. އޭނާއަށް ލިބިވަޑައިގަތީ 83 ވޯޓެވެ. ތިން ވަނައިގައި ލިޒް ޓްރޫސް އޮތީ 64 ވޯޓާއެކުއެވެ.

ބްރެވަމަން ރޭހުން ބޭރުވެވަޑައިގަތުމާއެކު މިހާރު ބޮޑުވަޒީރުގެ ރޭހުގައި ބާކީ ތިއްބެވީ 5 ކެންޑިޑޭޓުންނެވެ. އެއީ ސުނާކާއި މޯރޑޮންޓާއި ޓްރޫސްގެ އިތުރުން ޓޮމް ޓަގެންދަޓާއި ކެމީ ބެޑެނޮކްއެވެ.

ސުނާކަކީ މިފަހަރު އިނގިރޭސިވިލާތުގެ ބޮޑުވަޒީރުކަމަށް ވާދަކުރައްވާނެ 2 ބޭފުޅުންގެ ތެރޭގައި ހިމެނޭނެ އެއްބޭފުޅަކުކަމަށް ރިޕޯޓްތައް ބުނެއެވެ. އެއީ މަޖިލީހުގައި އޭނާއަށް އޮތް ތާއީދަށް ބަލާފައެވެ. ބޮޑުވަޒީރުކަމަށް ނަން ހުށަހެޅުއްވި ބައެއް މެމްބަރުންވެސް ވަނީ ސުނާކަށް ތާއީދުކުރައްވައި، އަނބުރާ ނަން ނަންގަވާފައެވެ.

ބޮޑުވަޒީރުކަމަށް ވާދަކުރައްވާނެ 2 ބޭފުޅުން ލިބެންދެން ނޮކްއައުޓް އުސޫލުން ވޯޓުލުން ކުރިއަށްދާނެއެވެ. މި ވޯޓުލުން ކުރިއަށްދާނީ ކޮންޒަވޭޓިވް ޕާޓީގެ މަޖިލިސް މެމްބަރުންގެ މެދުގައެވެ. އެއަށްފަހު ހޮވޭ 2 ބޭފުޅުންގެ ތެރެއިން ބޮޑުވަޒީރާއި ޕާޓީގެ ލީޑަރު ހޮވަން ޕާޓީގެ ހުރިހާ މެމްބަރުން ވޯޓުލާނެއެވެ.

އިނގިރޭސިވިލާތުގެ ބޮޑުވަޒީރު އިއުލާންކުރުމަށް ހަމަޖެހިފައިވަނީ އަންނަ ސެޕްޓެމްބަރު މަހުގެ 5 ވަނަ ދުވަހުއެވެ.