ޑީއާރުޕީގެ ހަރަކާތްތައް ރާއްޖެއަށް ފުޅާކުރުމުގެ މަސައްކަތް ފަށައިފި
ޑީއާރުޕީގެ ޕްރައިމަރީގައި ވާދަކުރައްވާނެކަމަށް ވިދާޅުވި
ޑީއާރުޕީ
ދިވެހި ރައްޔިތުންގެ ޕާޓީ (ޑީއާރުޕީ)ގެ ހަރަކާތްތައް މުޅި ރާއްޖެއަށް ފުޅާކުރުމުގެ މަސައްކަތް ފަށައިފިއެވެ.
މި މަސައްކަތް ފެށުމުގެ ގޮތުން ބުދަ ދުވަހުގެ ރޭ ޅ. ނައިފަރުގައި ވަނީ އެ ޕާޓީގެ އޮފީހެއް ހުޅުވާފައެވެ. މިއީ ރާއްޖޭގެ ރަށްރަށުގައި އެ ޕާޓީގެ އޮފީސްތައް ހުޅުވުމުގެ ފެށުންކަމަށް ޑީއާރުޕީން ބުނެއެވެ. އެގޮތުން، ކުރިއަށް އޮތް ދުވަސްތަކުގައި ކ. ކާށިދޫއާއި ކުޅުދުއްފުށި ސިޓީއާއި ހއ. ދިއްދޫގައިވެސް އެ ޕާޓީގެ އޮފީސްތައް ހުޅުވާނެކަމަށް ޑީއާރުޕީން ބުނެއެވެ.
ޑީއާރުޕީގެ ވަގުތީ ލީޑަރު، އަބްދުﷲ ޖާބިރު "ރާއްޖެ އެމްވީ"އަށް ވިދާޅުވީ އޭނާ ލީޑަރުކަމާ ވަގުތީގޮތުން ހަވާލުވެވަޑައިގެން އެންމެ ފުރަތަމަ ކުރެއްވީ ޕާޓީއަށް މެމްބަރުން ހަމަކުރުމުގެ މަސައްކަތްކަމަށެވެ. އެ މަސައްކަތް މިހާރު ނިމިފައިވާކަމަށާއި ދެން އޮތީ މުޅި ރާއްޖެއަށް ހަރަކާތްތައް ފުޅާކުރުމުގެ މަސައްކަތް ކަމަށްވެސް ވިދާޅުވިއެވެ.
އޭނާ ވިދާޅުވީ ޑީއާރުޕީއަކީ ވަރަށް ރަނގަޅަށް މަސައްކަތްކުރަމުން އައި ޕާޓީއެއްކަމަށާއި ނަމަވެސް އޭނާ ޕާޓީއާ ހަވާލުވެވަޑައިގެންނެވިއިރު އެކަންކަން އޮތީ މަޑުޖެހިފައިކަމަށެވެ. އެއީ ބަދަލުވާންޖެހޭކަމެއް ކަމަށާއި، ކުރިއަށް އޮތްތަނުގައި ރާއްޖޭގެ ކޮންމެ ރަށެއްގައި ޑީއާރުޕީގެ އޮފީހެއް ހުޅުވާނެކަމަށްވެސް ޖާބިރު ވިދާޅުވިއެވެ.
ޖާބިރު ވިދާޅުވިގޮތުގައި، ނައިފަރުގައި އެ ޕާޓީގެ އޮފީހެއް ހުޅުވީ އެރަށުގައި ޑީއާރުޕީއަށް އޮތް ތާއީދު ބޮޑުކަމުންނެވެ. އެހެން ރަށްރަށުގައިވެސް ޑީއާރުޕީއަށް އޮތް ތާއީދު އިތުރުވާކަން ފެންނަކަމަށާއި، ކުރިއަށް އޮތް ރިޔާސީ އިންތިޚާބަށް ޕާޓީން ޓިކެޓް ދޭނެކަމަށްވެސް އޭނާ ވިދާޅުވިއެވެ.
ޑީއާރުޕީގެ މެމްބަރުން ހަމަވެފައިވާކަމަށް އިލެކްޝަންސް ކޮމިޝަނުން ބުނެފައިވާއިރު، މިހާރު އެ ޕާޓީން އަންނަނީ ޕާޓީގެ ކޮންގްރެސް ބޭއްވުމުގެ މަސައްކަތް ކުރަމުންނެވެ. މި ކޮންގްރެސްގައި ޕާޓީގެ ލީޑަރާއި ނައިބު ލީޑަރު ހޮވާނެއެވެ.
ޖާބިރު ވިދާޅުވީ މިހާރުވެސް ރިޔާސީ އިންތިޚާބުގެ މަޝްވަރާތައް ކުރިއަށްދާ ކަމަށާއި ކޯލިޝަނެއްގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުއާއެކު ނުކުންނަވާނީ ޖުމްހޫރީ ޕާޓީގެ ލީޑަރު ގާސިމް އިބްރާހީމް އެ ކޯލިޝަނެއްގައި ނުހިމެނޭނަމަކަމަށެވެ.
މީގެ އިތުރުން ޑީއާރުޕީގެ ރިޔާސީ ކެންޑިޑޭޓުގެ ޕްރައިމަރީގައި އަމިއްލަފުޅަށް ވާދަކުރައްވާނެކަމަށާއި، ޑީއާރުޕީން ރަނިންގމޭޓެއްގެ ގޮތުގައި ނުކުންނާނީ އަންހެނެއް ކަމަށްވެސް ޖާބިރު ވިދާޅުވިއެވެ.
