ނިއުރޭޑިއަންޓުން ގެނައީ ގާނާގެ ފޯވާޑެއް
13 ޖުލައި 2022 | ބުދަ 04:52މުބާރާތް ބުދަ ދުވަހު ފަށާނެ
ކޯޗު ސޮބާ ޓީމްގެ ކުޅުންތެރިންނާ ވާހަކަދައްކަނީ
މިއަދު ފަށާ ދެވަނަ ޑިވިޝަން ފުޓްބޯޅަ މުބާރާތަށް ގެނައީ ގާނާގެ ފޯވާޑެއްކަމަށް ނިއުރޭޑިއަންޓުން ބުނެފިއެވެ.
ނިއުރޭޑިއަންޓުން ފުރަތަމަ މަސައްކަތްކުރީ މިޞްރު ފޯވާޑެއް ގެންނާށެވެ. އެކަމަކު ފަހުވަގުތު އޭނާއަށް އާދެވެން ނެތްކަމަށް އެންގުމުން ބެލަރޫސްގެ ފޯވާޑެއް ގެންނަން ނިންމާ ވިސާގެ ކަންކަން ހަމަޖެއްސުމުގެ މަސައްކަތްވެސް ކުރިއެވެ. އަދި ސްރީލަންކާގެ ފޯވަޑެއް ގެނައުމަށްވެސް ނިއުރޭޑިއަންޓުން މަސައްކަތްކުރިއެވެ. އެކަމަކު އެންމެފަހުން ކްލަބުން ގެނައީ ގާނާގެ ފޯވަޑެކެވެ. އެއާއެކު ދެވަނަ ޑިވިޝަންގައި ވާދަކުރާ ނިއުރޭޑިއަންޓްގައި ގާނާގެ ތިން ކުޅުންތެރިން ތިބޭނެއެވެ. އެއީ ފޯވާޑްގެ އިތުރުން މިޑްފީލްޑަރަކާއި ޑިފެންޑަރެކެވެ. ނިއުރޭޑިއަންޓްގައި ހުރި ހަތަރުވަނަ ބިދޭސީ ކުޅުންތެރިއަކީ އުޒުބެކިސްތާންގެ ޑިފެންސިވް މިޑްފީލްޑަރެކެވެ. ބިދޭސީ ކީޕަރެއް ގެނައުމުގެ ވިސްނުންވެސް ފުރަތަމަ ނިއުރޭޑިއަންޓުން ގެންގުޅުނެވެ. އެކަމަކ ދިވެހި ރަނގަޅު ކީޕަރެއް ލިބުމުން ފީލްޑަށް ބިދޭސީ ކުޅުންތެރިން އިތުރުކުރަން އެވިސްނުން ދޫކޮށްލީކަމަށް ކުރިން ނިއުރޭޑިއަންޓުން ބުންޏެވެ. މުބާރާތުގައި ނިއުރޭޑިއަންޓް ކުޅޭ ފުރަތަމަ މެޗުގައި ހޮނިހިރު ދުވަހު ހަވީރު ވިލިމާލެ ދަނޑުގައި ވާދަކުރާނީ ކްލަބް ޓީނޭޖާއެވެ.
މުބާރާތުގެ ފުރަތަމަ މެޗުގައި ބުދަ ދުވަހު ހަވީރު ވާދަކުރާނީ ޓެންޓް ސްޕޯރޓްސް ކްލަބާއި, ކްލަބް ޕީކޭއެވެ. ނިއުރޭޑިއަންޓްގެ އިތުރުން ވިކްޓްރީއާއި, ބުރު ސްޕޯރޓްސް ކްލަބާއި, ޓެންޓް ސްޕޯރޓްސް ކްލަބުންވެސް ވަނީ ބިދޭސީ ކުޅުންތެރިން ހިމަނައިގެން ޓީމް ވަރުގަދަކޮށްފައެވެ. މުބާރާތުގައި މިފަހަރު 16 ޓީމް ވާދަކުރެއެވެ. 16 ޓީމް ބަހާލާފައިވަނީ ދެ ގްރޫޕަކަށެވެ. ސެމީއަށްދާނީ ކޮންމެ ގްރޫޕަކުންވެސް އެއްވަނަ ޓީމާއި ދެވަނަ ޓީމެވެ.
