ވެލެންސިޔާ ހަޔަކަށް ވެއްޓި، ގްރީން ހަތަރަކަށް
12 ޖުލައި 2022 | އަންގާރަ 14:13ގްރީންއާއި ޔުނައިޓެޑް ވިކްޓްރީވެސް އޮތީ 23 ޕޮއިންޓްގައި
ގްރީންގެ ފުރަތަމަ ލަނޑު ޖެހީ ސަސްއާ ދެކޮޅަށް ކުޅުނު މެޗުގައި ހޯސޭ އަވީލާ | އެފްއޭއެމް
ވެލެންސިޔާ އަތުން ކްލަބް ގްރީން ސްޓްރީޓްސް މޮޅުވުމުން ވެލެންސިޔާ ލީގު ތާވަލްގެ ހަވަނައަށް ވެއްޓި, ގްރީން ހަތަރުވަނައަށް ޖެހިލައިފިއެވެ.
ދެޓީމްގެވެސް 17 ވަނަ މެޗުގައި އަންގާރަ ދުވަހު ހަވީރު ވެލެންސިޔާ އަތުން ގްރީން ސްޓްރީޓްސް މޮޅުވީ 3-2ންނެވެ. މެޗުން މޮޅުވެ ގްރީން ހަތަރުވަނައަށް ޖެހިލީ 23 ޕޮއިންޓް ހޯދައިގެންނެވެ. ފަސްވަނާގައި ޔުނައިޓެޑް ވިކްޓްރީވެސް އޮތީ 23 ޕޮއިންޓާއެކުއެވެ. ދެޓީމްގެ ފަރަގަކީ ފައިދާ ގޯލެވެ. މިބައްޔާއެކު ވެލެންސިޔާ ވަނީ ހަވަނައަށް ވެއްޓިފައެވެ. ވެލެންސިޔާ އޮތީ 22 ޕޮއިންޓާއެކުއެވެ.
މެޗު ފަށައިގެން ތިންވަނަ މިނިޓްގައި ގްރީންއަށް ކުރި ހޯދައިދިނީ ހޯސޭ އަވީލާއެވެ. އެކަމަކު ޖެހިގެން އައި މިނިޓްގައި އަމްދާން އަލީ (އެންޑީ) ލަނޑު ޖަހާ ވެލެންސިޔާއަށް ނަތީޖާ ހަމަހަމަކޮށްދިނެވެ. ގްރީންއިން ދެވަނަ ފަހަރަށް ކުރިހޯދީ ހުއާން ކާލޯސް ޖެހި ގޯލުންނެވެ. ގްރީންގެ ތިންވަނަ ގޯލްވެސް ޖެހީ ހުއާން ކާލޯސްއެވެ. ވެލެންސިޔާއިން ފަރަގު ކުޑަކުރީ އިތުރު ވަގުތުގައި ޚަލީލް ޖަމާލް ޖެހި ލަނޑުންނެވެ.
ލީގުގައި އަންގާރަ ދުވަހުގެރޭ ވާދަކުރާނީ އެއްވަނާގައި އޮތް މާޒިޔާއާއި ހަތްވަނާގައި އޮތް ސަސްއެވެ.
