ރޭންޖާސްގެ މެދުތެރެ ބަލަހައްޓަމުންއައި ޖޯ އަރީބޯ ސައުތެމްޓަންއަށް ބަދަލުވެއްޖެއެވެ.

ސައުތެމްޓަންއިން އަރީބޯގެ ސޮއި ހޯދީ ހަ މިލިއަން ޔޫރޯގެ އިތުރުން އެޑް އޮންސް ތަކާއެކު ޖުމްލަ 10 މިލިއަން ޔޫރޯގެ ފީއެއް ރޭންޖާސްއަށް ދެއްކުމަށްފަހުއެވެ. އަރީބޯ ސައުތެމްޓަންއަށް ބަދަލުވީ ރޭންޖާސްއާއެކު ހަދާފައިވާ އެއްބަސްވުމުގައި ބާކީ އެއް އަހަރު އޮއްވައެވެ. ސައުތެމްޓަން އާއިއެކު އަރީބޯ ހެދީ ހަތަރު އަހަރުގެ އެއްބަސްވުމެކެވެ.

އަރީބޯ ރޭންޖާސްއާ ގުޅުނީ 2019 ވަނަ އަހަރުއެވެ. އޭގެ ފަހުން އޭނާ ވަނީ 2021 ވަނަ އަހަރުގެ ސްކޮޓިޝް ޕްރިމިއަރ ލީގު ރޭންޖާސްއަށް ކާމިޔާބު ކޮށްދިނުމުގައި އިސް ދައުރެއް އަދާކޮށްފައެވެ. ރޭންޖާސްއަށް ކުޅުނު 148 މެޗުން އަރީބޯ ވަނީ 26 ލަނޑު އެޓީމަށް ކާމިޔާބުކޮށްދީފައެވެ.

ސައުތެމްޓަން އަށް ބަދަލުވުމަށްފަހު އަރީބޯ ބުނީ އެޓީމަކީ ތަފާތު އަދި ރަނގަޅު ތާރީޚެއް އޮތް ޓީމެއް ކަމަށެވެ. އަދި ޕްރިމިއަރ ލީގުގައި ކުޅުމަކީ އަބަދުވެސް ދެކެމުން އަންނަ ހުވަފެނެއް ކަމަށާއި، ފުރުސަތުގެ ބޭނުން ރަނގަޅަށް ހިފާނެކަމަށް އަރީބޯ ބުންޏެވެ.