ދުވުމަށް ބިރު ނުގަންނަކަމަށާއި، އެފްރިކާގައި ޕާން ކޮޅެއް ހޯދަން ކޮންމެ ދުވަހަކު ހެނދުނު 30 ކިލޯމީޓަރު ހިނގަންޖެހޭ ކަމަށް ބާސެލޯނާއަށް ބަދަލުވި އައިވަރީ ކޯސްޓުގެ މިޑްފީލްޑަރު ފްރޭންކް ކެސިއޭ ބުނެފިއެވެ.

ބާސާއަށް ބަދަލުވުމަށްފަހު އޭނާ ބުނީ އާމްދަނީގެ ގޮތުގައި ފައިސާ ހޯދުމަށް އެތައް ދަލެއް އޮހޮރުވަން ޖެހޭ ކަމަށެވެ. ކެސިއޭ އަކީ ދުވެލި ބާރު ހުނަރުވެރި ކުޅުންތެރިއެކެވެ. އޭނާ އުންމީދު ކުރަނީ ބާސާގެ މިޑްފީލްޑުގައި އޭނާއަށް މުހިންމު ދައުރެއް އަދާ ކުރެވުން ކަމަށް ކެސިއޭ ބުނެފައިވެއެވެ.

އިތުރަށް ކެސިއޭ ބުނީ ދުވަން ޖެހިދާނެތީ އޭނާ ބިރު ނުގަންނަކަމަށެވެ. އޭނާ ފާހަގަ ކުރި ގޮތުގައި ދުވުމަކީ އޭނާގެ ގައިގަ ހުންނަ ގުދުރަތީ ކަމެކެވެ. އޭނާ ބުނީ އެފްރިކާގައި ޕާން ކޮޅެއް ހޯދަން، ކޮންމެ ދުވަހަކު ހެނދުނު 30 ކިލޯމީޓަރު ހިނގަންޖެހޭ ކަމަށާއި، އެގޮތަށް ހިނގާ މީހުން އުޅޭނެކަމަށެވެ. އިތުރަށް އޭނާ ބުނީ އޭނާ މަސައްކަތް ކުރާނީ ބާސާގެ ސަޕޯޓަރުންގެ މެދުގައި މަގުބޫލު މީހަކަށްވެވޭ ވަރަށް ކުޅެން ކަމަށެވެ.

އޭސީ މިލާން ދޫކޮށް ބާސާއަށް ބަދަލުވި ކެސިއޭ އަކީ އެޓޭކިންގައި ވެސް ފާހަގަކޮށްލެވޭ ކުޅުންތެރިއެކެވެ. އޭނާ ވަނީ ނިމުނު ސީޒަނުގައި އޭސީ މިލާނަށް ކުޅެދިން މެޗުތަކުގައި ހަތް ލަނޑު ޖަހާފައެވެ. އޭސީ މިލާނާއެކު އޭނާ ވަނީ ނިމުނު ސީޒަނުގައި 39 މެޗު ކުޅެފައެވެ. އޭގެ ތެރެއިން އޭނާ ފުރަތަމަ 11 ގައި ހިމެނިގެން ކުޅެން އަރާފައިވަނީ 32 މެޗުގައެވެ. ސީޒަންގެ މެދު ތެރެއިން އޭނާ އަށް ވަނީ އަނިޔާ ވެފައެވެ.