ނިއުރޭޑިއަންޓް އަނބުރާ ގެނެވުނީ ދިވެހި ކުޅުންތެރިންގެ ފަރާތުން ލިބުނު ވަރަށްބޮޑު ހިތްވަރެއްގެ ސަބަބުންކަމަށް ޗެއަރމަން އަހުމަދު ވާސިފް ވިދާޅުވެއްޖެއެވެ.
ނިއުރޭޑިއަންޓް އެނބުރި އައުމާ ގުޅިގެން ރާއްޖެ ޓީވީގެ "ކުޅިވަރު ފައިލް" ޕްރޮގްރާމްގައި ވާހަކަދައްކަވަމުން ވާސިފް ވިދާޅުވީ ކްލަބް އަނބުރާ ގެނައުމަށް ކުރި މަސައްކަތުގައި މުސާރަ ނުދީ ތިބި ދިވެހި ކުޅުންތެރިން ދިން އެއްބާރުލުމަކީ ކުރިއަށްދާން ލިބުނު ވަރަށްބޮޑު ހިތްވަރެއްކަމަށެވެ. ގިނަ ކުޅުންތެރިންނަށް ދޭން އޮތް ފައިސާގެ ތެރެއިން ބޮޑު އަދަދެއް ކުޅުންތެރިން އުނިކޮށްދިންކަން ވާސިފް ފާހަގަކުރެއްވިއެވެ.
ފަންސާސްހާސް ދޭން އޮތް ކުޅުންތެރިއެއް ވެއްޖިއްޔާ ފަންސަވީސް ހާސް ކަނޑާލި. ތިރީސްހާސް ދޭން އޮތް ކުޅުންތެރިން ފަނަރަ ހާހަށް ކުޑަކޮށްދިނީ. 1.3 މިލިއަން އޮތް އަޝްފާޤު ތިންލައްކައަށްވުރެ ބޮޑު އެއްޗެއް ކަނޑާލަދިނީ. އިމްރާންވެސް ހަމަ އެއަށްވުރެ ބޮޑު އެއްޗެއް ކަނޑާލަދިނީ. އެހިސާބުން އަޅުގަނޑުމެންނަށް އުއްމީދު ލިބުނު.އަހުމަދު ވާސިފް/ ނިއުރޭޑިއަންޓްގެ ޗެއަރމަން
ވާސިފް ވިދާޅުވީ ނިއުރޭޑިއަންޓް އެނބުރި އައުމަށް އެންމެ ބޮޑު ޗެލެނެޖަކަށްވީ ދައްކަން އޮތް ބޮޑު އެމައުންޓުކަމަށެވެ. ފައިސާ އަތުގައިނެތި ކްލަބު ގެންނަން އުޅުންވީ ބޮޑު ޗެލެންޖެއްކަމަށް ވާސިފް ވިދާޅުވިއެވެ. އެކަމަކު އަބަދުވެސް ނިއުރޭޑިއަންޓް އަނބުރާ ގެނައުމުގެ ވިސްނުން އޮތް ކަމަށާއި, އެކަން ކުރެވޭނެ ގޮތްތައް ހޯދަން ކުރި މަސައްކަތްތަކުގައި ވަރުގަދަ ހަރުދަނާ ބޭބޭފުޅުންނާވެސް ވާހަކަދެއްކެވިކަމަށް ވިދާޅުވިއެވެ.
އެކަމަކު އެދަރަންޏާއެކީގައި ހަވާލުވާނެ އެއްވެސް މީހަކުނެތް. އެދަރަންޏާއެކު ހަވާލުވީ ނިއުރޭޑިއަންޓް ދެކެ ލޯބިވާ ސަޕޯޓަރުން. އަޅުގަނޑުމެންނަކީ ނިއުރޭޑިއަންޓް ސަޕޯޓަރުންގެ ގޮތުގައި ގްރާސްރޫޓްގައި ތިބި މީހުން. އަޅުގަނޑުމެންނަކީ ވިޔަފާރިވެރިންނެއް ނޫން. އަޅުގަނޑުމެން ނުކުތީމަ އެކަން ކޮށްދޭނެ ބަޔަކުވެސް އޭރަކު ނެތް.އަހުމަދު ވާސިފް/ ނިއުރޭޑިއަންޓްގެ ޗެއަރމަން
ވާސިފް ވިދާޅުވީ ދެވަނަ ފަހަރަށް ނުކުންނަން އެންމެ ބޮޑު ހިތްވަރެއް ލިބިގެންދިޔައީ ރައީސުލްޖުމްހޫރިއްޔާގެ ފަރާތްޕުޅުންކަމަށެވެ. ނިއުރޭޑިއަންޓް އަނބުރާ ގެނައުމުގެ މަސައްކަތަށް ނުކުތުމުގެ ކުރިން ރައީސުލްޖުމްހޫރިއްޔާއާ ބައްދަލުކުރެއްވި ކަމަށާއި, ފުރަތަމަ ބައްދަލުވުމުގައިވެސް ރައީސުލްޖުމްހޫރިއްޔާ ދެއްވި ހިތްވަރުން ނިއުރޭޑިއަންޓް އަނބުރާ ގެނެވޭނެކަން ޔަޤީންވެގެންދިޔަކަމަށް ވާސިފް ވިދާޅުވިއެވެ.
ރައީސް ދެއްކެވީ މަގު, ރައީސް ދެއްވީ ގައިޑެންސް. ރައީސް ދެއްކެވި މަގުން ހިނގައިގެން މިނިސްޓަރ ސަމީރުގެ ލަފައާއި އިރުޝާދުގެ ދަށުން އަޅުގަނޑުމެންގެ އެތައްހާސް ސަޕޯޓަރުންގެ އެހީގައި ނިއުރޭޑިއަންޓް އަނބުރާ ގެނެވުނީ.އަހުމަދު ވާސިފް/ ނިއުރޭޑިއަންޓްގެ ޗެއަރމަން
މުސާރަ ނުލިބިގެން ދިވެހި 10 ކުޅުންތެރިއަކު އޮތީ އެފްއޭއެމްއަށް މައްސަލަ ހުށަހަޅާފައެވެ. އާބޯޑް ހަވާލުވިއިރު ދިވެހި ކުޅުންތެރިންނަށް ދޭންޖެހޭ ފައިސާގެ އަދަދުވެސް ދެ މިލިއަނަށް އަރައެވެ. ކްލަބުން މިހާރުވަނީ އެކުޅުންތެރިންނަށް ފައިސާދޭނެ ގޮތުގެ އެއްބަސްވުންތަކެއް ހަދާފައެވެ. ނިއުރޭޑިއަންޓްގެ އިތުރުން ވިކްޓްރީވެސް ސަސްޕެންޝަނުން އެނބުރި އައިސް ފުރަތަމަ ވާދަކުރާނީ މިމަހުގެ 13 ވަނަ ދުވަހު ފަށާ ދެވަނަ ޑިވިޝަން ފުޓްބޯޅަ މުބާރާތުގައެވެ. އެމުބާރާތަށް ދެ ކްލަބުންވެސް ތައްޔާރުވަނީ ބިދޭސީ ކުޅުންތެރިންނާއެކުއެވެ.
