ވިލާ ކޮލެޖްގެ ސްޓުޑެންޓް އެސޯސިއޭޝަން (ވީ.ސީ.އެސް.އޭ)ގެ ފަރާތުން އިންތިޒާމުކޮށްގެން ބާއްވާ ޓްރިޕަލް ތްރެޓް ބާސްކެޓްބޯލް ޓޯނަމެންޓް 2022 (ޓީ.ޓީ.ބީ.ޓީ)ގެ ފިރިހެން ޑިވިޝަންގެ ޗެމްޕިއަންކަން ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ން ހޯދައިފިއެވެ.

މުބާރާތުގެ ޗެމްޕިއަންކަން އެމް.އެން.ޔޫ އިން ހޯދީ ހޯމަ ދުވަހުގެ ރޭ ކުޅުނު ފައިނަލްގައި ވިލާ ކޮލެޖުގެ މައްޗަށް ކުރި ހޯދައިގެންނެވެ. މެޗު ފެށިގެން ކުރީ ކޮޅު ވިލާ ކޮލެޖުން ލީޑު ކުރި ނަމަވެސް، އެމް.އެން.ޔޫ އިން ވަނީ ފަހަތުން އަރައި އެއްވަރުކޮށް، ލީޑު ހޯދައި މެޗުން މޮޅުވެފައެވެ. އެމް.އެން.ޔޫއިން ވިލާ ކޮލެޖުގެ މައްޗަށް ކުރި ހޯދީ 37-29 ންނެވެ. މުބާރާތުގެ ޗެމްޕިއަންކަން އެމް.އެން.ޔޫއިން ހޯދީ އެ ޓީމު ކުޅުނު ހުރިހާ މެޗަކުން މޮޅުވެގެންނެވެ.

މުބާރާތުގެ އަންހެން ޑިވިޝަންގެ ފައިނަލްގައި ބައްދަލުކުރީ ސެންޓަރ ފޯރ ހަޔަރ ސެކަންޑްރީ އެޑިއުކޭޝަން (ސީ.އެޗް.އެސް.އީ) އާއި އަޙުމަދިއްޔާ އިންޓަރނޭޝަލަށް ސްކޫލްއެވެ. މުޅި މެޗު ލީޑުގައި އޮވެ ކާމިޔާބުކުރީ ސީ.އެޗް.އެސް.އީ އިންނެވެ. އެ ޓީމުން އަޙުމަދިއްޔާގެ މައްޗަށް ކުރި ހޯދީ 23-11 ންނެވެ. އަންހެން ޑިވިޝަންގެ ޗެމްޕިއަންކަން ސީ.އެޗް.އެސް.އީން ހޯދީ އެ ޓީމު ކުޅުނު ހުރިހާ މެޗަކުން މޮލުވެގެންނެވެ.

މުބާރާތުގެ ވަނަތަކަށް އިނާމު ދިނުމުގެ ރަސްމިއްޔާތު އޮންނާނީ ބުދަ ދުވަހުގެ ރޭގައެވެ.

ވީ.ސީ.އެސް.އޭ އިން ކުރިއަށް ގެންދާ މި މުބާރާތުގައި މިއަދު ފަށާނީ ތްރީ އޮން ތްރީއެވެ. މެޗުތައް ފެށުމަށް ހަމަޖެހިފައިވާ ގަޑިއަކީ މިރޭ 19:00 ގައެވެ. މުބާރާތުގައި މިއަދު ވަނީ 16 މެޗެއް ކުޅުމަށް ހަމަޖެހިފައެވެ. އެއީ ޕޫލްގެ މެޗުތަކެވެ. މުބާރާތުގެ ސެމީ ފައިނަލް މެޗުތަކާއި، ފައިނަލް މެޗު އޮންނާނީ ބުދަ ދުވަހުގެ ރޭގައެވެ. މިއަދުގެ ފުރަތަމަ މެޗުގައި ބައްދަލުކުރާނީ އަޙުމަދިއްޔާ އާއި މެޕްސް ކޮލެޖެވެ.