ޤައުމީ ވޮލީބޯޅަ މުބާރާތުގެ ފުރަތަމަ ސެމީ ފައިނަލަށް ނުކުތްއިރު ހުރިހާ ކުޅުންތެރިން ވެސް މަސައްކަތް ކުރީ ވަރަށް ގުޅިގެން ކަމަށް ޕޮލިސް ކުލަބުގެ ކޯޗު ފަތުހުﷲ ވަހީދު (ފައްލޯ)ބުނެފިއެވެ.

މިއަހަރުގެ ޤައުމީ މުބާރާތުން ޕޮލިސް ޓީމަށް ޖާގަ ލިބުނީ ލީގުގެ ހަތަރު ވަނަ ޓީމުގެ ގޮތުގައެވެ. ފުރަތަމަ ސެމީގައި އެ ޓީމު ވާދަކުރީ ލީގުގެ ތިން ވަނަ ކުލަބް ވެމްކޯއާއެވެ. ސެމީގައިި ޕޮލިހުން ވަނީ ވަރުގަދަ ވެމްކޯގެ މައްޗަށް ސީދާ ތިން ސެޓުން ކުރި ހޯދައި، ވެމްކޯ ކަޓުވާލައިފައެވެ. ސެމީން މޮޅުވެ ޕޮލިސް ވަނީ ތިން ވަނަ ސެމީއަށް ދަތުރުކޮށްފައެވެ. ތިން ވަނަ ސެމީގައި ޕޮލިސް ނިކުންނާނީ ދިވެހި ސިފައިންގެ ކުލަބާ ދެކޮޅަށެވެ.

ސެމީ މެޗަށްފަހު ފައްލޯ ބުނީ ލިބުނު މޮޅަށް ޙަމްދާއި ޝުކުރު ކުރާ ކަމަށެވެ. ފައްލޯ ބުނީ ޕޮލިސް ޓީމުގައި އޮތީ ވަރަށް ޒުވާން ޓީމެއް ކަމަށާއި، ޓީމު އަންނަނީ ތަޖުރިބާ ހޯދަމުން ކަމަށެވެ. އޭނާ ބުނީ ޓީމުގެ ހުރިހާ ކުޅުންތެރިން، އޮފިޝަލުން އަދި މެނޭޖުމަންޓު ގުޅިގެން ކުރެވުނު މަސައްކަތުން ނެރެވުނީ ވަރަށް ރަނގަޅު ނަތީޖާއެއް ކަމަށެވެ.

ފައްލޯ ބުނީ ކުރީ ދެ މެޗެއްގައި ފާހަގަ ކުރި ގޮތަސް ޕޮލިސް ޓީމުގައި އަނިޔާގެ މައްސަލަތަކެއް އުޅޭ ކަމަށެވެ. ނަމަވެސް ކޮންމެ ދުވަހު އެވާހަކަައް ދައްކަން ބޭނުންނުވާ ކަމަށެވެ.

މިއަހަރުގެ ވޮލީ ސީޒަނަށް ޕޮލިސް ޓީމުން އެކުލަވާލާފައިވަނީ ޒުވާން ޓީމެކެވެ. އެ ޓީމުގައި ހިމެނޭ ޒުވާން ކުޅުންތެރިންނަށް ބަލާއިރު، އެސޯސިއޭޝަން ކަޕްގެ އެންމެ ޒުވާން ކުޅުންތެރިޔާގެ މަގާމު ހޯދި މާއީޝް އަހުމަދު، ވޮލީ ލީގުގެ ޒުވާން ކުޅުންތެރިޔާގެ މަގާމު ހޯދި ހައިލަމް ހަސަންގެ އިތުރުން އަޙުމަދު ނާފިޔު، ޝާމިލް މުހައްމަދު، މައުޒޫން ނިޔާޒް އަދި ޝާއިން ޢަބްދުﷲ ހިމެނެއެވެ. ޕޮލިސް ޓީމުގެ ޒުވާން ކުޅުންތެރިން މުބާރާތުގައި ދައްކާ ކުޅުމަށް އެ ޓީމުގެ ކޯޗު ފައްލޯ ވަނީ އެކި ފަހަރު މަތިން ތައުރީފުކޮށްފައެވެ.

މީގެ ކުރިން ފައްލޯ ފާހަގަ ކުރި ގޮތުގައި ޒުވާން ކުޅުންތެރިންނަށް ފުރުސަތު ދިނުމުގެ އެންމެ ބޮޑު މަގުސަދަކީ މުސްތަގުބަލަށް ކުޅުންތެރިން ތައްޔާރުކުރުމާއި، ޤާބިލްކަން އިތުރު ކުރުންކަމަށެވެ. ފައްލޯ ވަނީ ޕޮލިސް ޓީމާއެކު ފަރިތަކުރި ބައެއް ޒުވާން ކުޅުންތެރިން ކޯޓު މަތިން ނުފެނުމަކީ ހިތާމަހުރި ކަމެއް ކަމަށް ވެސް ބުނެފައެވެ.