ދެ ވަނަ މެޗުގައި ފްލެކްސާ އަތުން ޕޮލިސް ބަލިވެއްޖެ

މިހާރު ކުރިއަށްދާ ޤައުމީ ވޮލީ ބޯޅަ މުބާރާތުގައި ޕޮލިސް ކުލަބުން ކުޅުނު ދެ ވަނަ މެޗުގައި، ފްލެކްސާ ސްޕޯޓްސް ކުލަބު އަތުން ބަލިވެއްޖެ އެވެ.

މުބާރާތުގައި ޕޮލިސް ކުލަބުގެ ފުރަތަމަ މެޗުގައި އެ ޓީމުން ވަނީ ހުރާ ކޮމިއުނިޓީ ކުލަބުގެ މައްޗަށް ސީދާ ތިން ސެޓުން ކުރި ހޯދައިފަ އެވެ.

ޕޮލިސް ކުލަބުގެ ދެ ވަނަ މެޗުގައި ބުދަ ދުވަހުގެ ހަވީރު ނިކުތީ ފްލެކްސާއާ ދެކޮޅަށެވެ. ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު އެ މެޗު ފްލެކްސާ އިން ކާމިޔާބު ކުރީ ތިން ސެޓު އެއް ސެޓުންނެވެ.

މެޗުގެ ފުރަތަމަ ސެޓު ފްލެކްސާ އިން ވަނީ 25-20 އިން ކާމިޔާބު ކޮށްފަ އެވެ. ނަމަވެސް ޖެހިގެން ކުޅުނު ދެ ވަނަ ސެޓު 21-25 އިން ކާމިޔާބުކޮށް ޕޮލިސް ކުލަބުން ވަނީ ސެޓުގެ ގޮތުން އެއްވަރު ކޮށްފަ އެވެ.

މެޗުގެ ތިން ވަނަ ސެޓުގައި ފްލެކްސާ އިން ވަނީ 25-20 އިން ކުރި ހޯދައިފަ އެވެ. އަދި ވާދަވެރި ކުޅުމެއް ފެނުނު ހަތަރު ވަނަ ސެޓު ފްލެކްސާ އިން ކާމިޔާބު ކުރީ 25-23 އިންނެވެ.

މި މެޗުގެ މޮޅު ކުޅުންތެރިޔަކަށް ހޮވުނީ ފްލެކްސާގެ ބިދޭސީ ކުޅުންތެރިޔާ ސަބެންގްބަން ޗަނޮކްނަން އެވެ.

މި ނަތީޖާ އާއެކު ޕޮލިސް ކުލަބު އޮތީ ތާވަލްގެ ދެ ވަނައިގަ އެވެ. އެއީ މިހާތަނަށް ކުޅެފައިވާ ދެ މެޗުން ތިން ޕޮއިންޓާ އެކު އެވެ.