އޮފީސް މުބާރާތުގެ ފިރިހެން ޑިވިޝަން ކާމިޔާބު ކުރީ ޕޮލިސް ކުލަބުން

ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމު ކޮށްގެން ބާއްވާ އިންޓަ އޮފީސް/ކޮމްޕެނީ ވޮލީ ބޯޅަ މުބާރާތުގެ ފިރިހެން ޑިވިޝަންގެ ޗެމްޕިއަންކަން ޕޮލިސް ކުލަބުން ހޯދައިފި އެވެ.

ޕޮލިސް ކުލަބުންް މުބާރާތުގެ ޗެމްޕިއަންކަން ހޯދީ ފައިނަލްގައި ދިވެހި ސިފައިންގެ ކުލަބު ބަލިކޮށްގެންނެވެ. ފައިނަލް މެޗުގައި ޕޮލިސް ކުލަބުން ވަނީ ތިން ސެޓު އެއް ސެޓުން ސިފައިންގެ ކުލަބުގެ މައްޗަށް ކުރި ހޯދައިފަ އެވެ. އެއީ މެޗުގެ ފުރަތަމަ ސެޓު ސިފައިންގެ ކުލަބުން ކާމިޔާބު ކޮށްފައި ވަނިކޮށް، ފަހަތުން އަރައި ތިން ސެޓު ކާމިޔާބު ކޮށްގެންނެވެ.

ވާދަވެރި ކުޅުމަކަށްފަހު މެޗުގެ ފުރަތަމަ ސެޓު ސިފައިންގެ ކުލަބު ކާމިޔާބު ކުރީ 25-23ންނެވެ. ނަމަވެސް ޕޮލިސް ކުލަބުން ވަނީ 22-25ން ދެ ވަނަ ސެޓު ކާމިޔާބު ކޮށްފަ އެވެ. ޖެހިގެން ކުޅުނު ތިން ވަނަ ސެޓު ޕޮޮލިސް ކުލަބުން ކާމިޔާބު ކުރީ 08-25 ގެ ތަފާތު ބޮޑު ނަތީޖާ އަކުންނެވެ. މި ސެޓުގައި ސިފައިންގެ ކުލަބަށް ވަނީ ގިނަ ގޯސްތަކެއް ހެދިފަ އެވެ. ނަމަވެސް ހަތަރު ވަނަ ސެޓުގައި ދެ ޓީމުގެ ފަރާތުން ވެސް ވާދަވެރި ކުޅުމެެއް ފެނުނެވެ. ފަހު ވަގުތު ކުރި ހޯދައި ޕޮލިސް ކުލަބުން މި ސެޓު ކާމިޔާބު ކުރީ 25-27ންނެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ޕޮލިސް ކުލަބުގެ ޝާމިލް މުޙައްމަދު އެވެ.

މުބާރާތުގެ އެންމެ މޮޅު ހަ ކުޅުންތެރިންގެ ތެރޭގައި ހިމެނުނީ ޗެމްޕިއަން ޕޮލިސް ކުލަބުގެ ޝާމިލް، މުޙައްމަދު ހަމްދޫން، މައުޒޫން ނިޔާޒް، ސިފައިންގެ ކުލަބުގެ ޖުނައިދު ޢަބްދުﷲ، މުޙައްމަދު މުނީފު އަދި ކުޅިވަރު ވުޒާރާގެ މުޙައްމަދު ފައިސަލް އެވެ. މުބާާރާތުގެ އެންމެ މޮޅު ލިބަރޯ އަކަށް ހޮވުނީ ޕޮލިސް ކުލަބުގެ މުޙައްމަދު އިލްހާމް އަލީ އެވެ. މުބާރާތުގެ އެންމެ މޮޅު ކޯޗަކަށް ޕޮލިސް ކުލަބުގެ ކޯޗު ފަތުހުﷲ ވަޙީދު (ފައްލޯ) ހޮވުނުއިރު، މުބާރާތުގެ އެންމެ މޮޅު ކުޅުންތެރިޔަކީ ޕޮލިސް ކުލަބުގެ ޝާމިލް އެވެ.