ހުރާ ބަލިކޮށް ޕޮލިސް ފައިނަލަށް

މިހާރު ކުރިއަށްދާ ޤައުމީ ވޮލީ ބޯޅަ މުބާރާތުގެ ސެމީ ފައިނަލްގައި ހުރާ ކޮމިއުނިޓީ ކުލަބުގެ މައްޗަށް ކުރި ހޯދައި، ޕޮލިސް ކުލަބުން މުބާރާތުގެ ފައިނަލްގެ ފުރުސަތު ހޯދައިފި އެވެ.

ހަތަރު ޓީމުގެ ދެ މެދުގައި ކުރިއަށްދާ މުބާރާތް ރޭވިފައި އޮތީ، ކޮންމެ ޓީމެއް ކޮންމެ ޓީމެއް ބައްދަލު ކުރުމަށްފަހު، އެއް ވަނަ ޓީމު ސީދާ ފައިނަލަށް ދާ ގޮތަށެވެ. ދެ ވަނަ ޓީމާއި، ތިން ވަނަ ޓީމަށް ޖެހުނީ ސެމީ ފައިނަލްގައި ވާދަކުރުމަށެވެ.

ސީދާ ފައިނަލްގެ ޖާގަ ހޯދީ އެންމެ ފަހުގެ ޗެމްޕިއަން ކުލަބު ވެމްކޯ އެވެ. ހުރާ އަދި ޕޮލިހަށް ޖެހުނީ ސެމީ ފައިނަލްގައި ވާދަކުރުމަށެވެ.

ޒުވާނުންގެ މަރުކަޒުގެ އެތެރޭ ކޯޓުގައި ހޮނިހިރު ދުވަހުގެ ރޭ ކުޅުނު ސެމީ ފައިނަލް މެޗު ޕޮލިސް ކުލަބުން ކާމިޔާބު ކުރީ ތިން ސެޓު ދެ ސެޓުންނެވެ.

މެޗުގެ ފުރަތަމަ ސެޓު ޕޮލިސް ކުލަބުން ކާމިޔާބު ކުރީ 25-20 އިންނެވެ. ނަމަވެސް، ހުރާ އިން ވަނީ ޖެހިގެން ކުޅުނު ދެ ސެޓު ވެސް ކާމިޔާބު ކޮށްފަ އެވެ. އެއީ ދެ ވަނަ ސެޓު 16-25 އަދި ތިން ވަނަ ސެޓު ވެސް 16-25 އިންނެވެ. ޕޮލިސް ކުލަބުން ވަނީ 25-11 އިން ހަތަރު ވަނަ ސެޓު ކާމިޔާބުކޮށް، ސެޓުގެ ގޮތުން ހަމަހަމަ ކޮށްފަ އެވެ.

ނަތީޖާ ނެރުމަށް ކުޅުނު ފަސް ވަނަ ސެޓު ޕޮލިސް ކުލަބުން ކާމިޔާބު ކުރީ 15-13 އިންނެވެ.

މުބާރާތުގެ ފައިނަލްގެ ޖާގަ ޕޮލިސް ކުލަބުން ހޯދައި، ވެމްކޯއާ ދެކޮޅަށް ނިކުންނައިރު މުބާރާތުގައި މި ދެ ޓީމު ބައްދަލު ކުރި މެޗު ކާމިޔާބު ކުރީ ވެމްކޯ އެވެ.

މީގެ އިތުރުން މިއަހަރުގެ ވީއޭއެމް ކަޕްގެ ފައިނަލްގައި ވެމްކޯ އިން ވަނީ ޕޮލިސް ބަލިކޮށް މުބާރާތް ކާމިޔާބު ކޮށްފަ އެވެ. ނަމަވެސް ޤައުމީ ލީގުގައި ޕޮލިސް ކުލަބުން ވަނީ ވެމްކޯ ބަލިކޮށް ލީގު ކާމިޔާބު ކޮށްފަ އެވެ.