ސެމީ ފައިނަލްގައި ޕޮލިހާއި ހުރާ
މުބާރާތުގެ ލީގު ބުރުގައި ކުޅުނު ތިން މެޗުން ވެސް މޮޅުވެ، ކުލަބު ވެމްކޯ އިން ވަނީ އެއް ވަނައިގައި ފައިނަލްގެ ޖާގަ ހޯދައިފަ އެވެ.
މުބާރާތުގެ ލީގު ބުރުގައި ޕޮލިސް ކުލަބާއި ހުރާ ބައްދަލު ކުރި މެޗުގެ ތެރެއިން
މިހާރު ކުރިއަށްދާ ޤައުމީ ވޮލީ ބޯޅަ މުބާރާތުގެ ސެމީ ފައިނަލްގައި ޕޮލިސް ކުލަބާއި، ހުރާ ކޮމިއުނިޓީ ކުލަބު ބައްދަލު ކުރަން ޖެހިއްޖެ އެވެ.
ހަތަރު ޓީމުގެ ދެ މެދުގައި ކުރިއަށްދާ މުބާރާތް ރޭވިފައި އޮތީ، ކޮންމެ ޓީމެއް ކޮންމެ ޓީމެއް ބައްދަލު ކުރުމަށްފަހު، އެއް ވަނަ ޓީމު ސީދާ ފައިނަލަށް ދާ ގޮތަށެވެ. ދެ ވަނަ ޓީމާއި، ތިން ވަނަ ޓީމަށް ޖެހެނީ ސެމީ ފައިނަލްގައި ވާދަކުރުމަށެވެ.
މުބާރާތުގެ ލީގު ބުރުގައި ކުޅުނު ތިން މެޗުން ވެސް މޮޅުވެ، ކުލަބު ވެމްކޯ އިން ވަނީ އެއް ވަނައިގައި ފައިނަލްގެ ޖާގަ ހޯދައިފަ އެވެ. ލީގު ބުރުގެ ފަހު މެޗުގައި ވެމްކޯ އިން ވަނީ ޕޮލިސް ކުލަބުގެ މައްޗަށް ތިން ސެޓު ދެ ސެޓުން ކުރި ހޯދައިފަ އެވެ.
ތިން މެޗުގެ ތެރެއިން ޕޮލިސް ކުލަބު މޮޅުވެފައި ވަނީ އެންމެ މެޗަކުންނެވެ. ފުރަތަމަ މެޗުގައި ހުރާ އަތުން މޮޅުވީއިރު، ދެ ވަނަ މެޗުގައި ފްލެކްސާ ސްޕޯޓްސް ކުލަބު އަތުން ބަލިވެފައި ވަނީ ތިން ސެޓު އެއް ސެޓުންނެވެ. ފަހު މެޗުގައި ވަނީ ވެމްކޯ އަތުން ފަސް ސެޓު ކުޅެގެން ބަލިވެފަ އެވެ.
ހުރާގެ ފުރަތަމަ މެޗުގައި ޕޮލިސް އަތުން ބަލިވީއިރު، ދެ ވަނަ މެޗުގައި ވެމްކޯ އަތުން ބަލިވީ ފަސް ސެޓު ކުޅެގެންނެވެ. ފަހު މެޗުގައި ވަނީ ސީދާ ތިން ސެޓުން ފްލެކްސާގެ މައްޗަށް ކުރި ހޯދައިފަ އެވެ.
ވެމްކޯ އަކީ ޤައުމީ މުބާރާތުގެ އެންމެ ފަހުގެ ޗެމްޕިއަނުންނެވެ.
