ދެ ވަނަ މެޗުގައި ވެމްކޯ އިން ހުރާ ބަލި ކުރީ ފަސް ސެޓު ކުޅެގެން

މިހާރު ކުރިއަށްދާ ޤައުމީ ވޮލީ ބޯޅަ މުބާރާތުގައި ކުލަބު ވެމްކޯ އިން ކުޅުނު ދެ ވަނަ މެޗުގައި، ހުރާ ކޮމިއުނިޓީ ކުލަބުގެ މައްޗަށް ވެސް ކުރި ހޯދައިފަ އެވެ.

މުބާރާތުގައި ވެމްކޯގެ ފުރަތަމަ މެޗުގައި ވަނީ ފްލެކްސާ ސްޕޯޓްސް ކުލަބުގެ މައްޗަށް ކުރި ހޯދައިފަ އެވެ.

ޒުވާނުންގެ މަރުކަޒުގެ އެތެރޭ ކޯޓުގައި ބުދަ ދުވަހުގެ ރޭ ހުރާއާ ދެކޮޅަށް ކުޅުނު މެޗު ވެމްކޯ އިން ކާމިޔާބު ކުރީ ތިން ސެޓު ދެ ސެޓުންނެވެ.

މެޗުގެ ފުރަތަމަ ސެޓު 25-15 އިން ކާމިޔާބު ކުރީ ހުރާ އިންނެވެ. ނަމަވެސް ވެމްކޯ އިން ވަނީ 20-25 އިން ދެ ވަނަ ސެޓު ކާމިޔާބު ކޮށްފަ އެވެ. ޖެހިގެން ކުޅުނު ތިން ވަނަ ސެޓުގައި ހުރާ އިން ވަނީ 25-22 އިން ކުރި ހޯދައިފަ އެވެ. ނަމަވެސް، ހަތަރު ވަނަ ސެޓު ވެމްކޯ އިން ކާމިޔާބު ކުރީ 22-25 އިންނެވެ.

ނަތީޖާ ނެރުމަށް ކުޅުނު ފަސް ވަނަ ސެޓުގައި ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނުއިރު، މި ސެޓު ވެމްކޯ އިން ކާމިޔާބު ކޮށްފައި ވަނީ 14-16 އިންނެވެ.

މި މެޗުގެ މޮޅު ކުޅުންތެރިޔަަކަށް ހޮވުނީ ވެމްކޯގެ ބިދޭސީ ކުޅުންތެރިޔާ ނޮކްޔޫން އެވެ.

މި މޮޅާ އެކު ވެމްކޯ އިން އޮތީ މިހާތަނަށް ކުޅުނު ދެ މެޗުން ވެސް މޮޅުވެ، ފަސް ޕޮއިންޓާ އެކު ތާވަލްގެ އެއް ވަނައިގަ އެވެ. މުބާރާތުގެ ލީގު ބުރުގައި ވެމްކޯގެ ފަހު މެޗުގައި ނިކުންނާނީ ޕޮލިސް ކުލަބާ ދެކޮޅަށެވެ.