ފައްލޯ ފާހަގަ ކުރި ގޮތުގައި ޕޮލިހަށް، ކުރަން ޖެހޭ ބައެއް ކަންކަން ނުކުރެވުނީ!

އެސޯސިއޭޝަން ކަޕްގެ ފައިނަލްގައި ކުލަބު ވެމްކޯއާ ދެކޮޅަށް ކުޅުނު މެޗުގައި ޕޮލިސް ކުލަބަށް ކުރަން ޖެހޭ ބައެއް ކަންކަން ނުކުރެވުނު ކަމަށް އެ ޓީމުގެ ކޯޗު ފަތުޙުﷲ ވަޙީދު (ފައްލޯ) ބުނެފި އެވެ.

މެޗަށްފަހު ވާހަކަ ދައްކަމުން ފައްލޯ ބުނީ، މެޗުގައި ކުރަން ޖެހޭ ކުދި ކުދި ބައެއް ކަންކަން ނުކުރެވުނީ ކަމަށެވެ. އަދި އެކަހަލަ ފައިނަލް މެޗެއްގައި އެގޮތަށް ދިމާވެދާނެ ކަމުގަައި ވެސް އޭނާ ބުންޏެވެ. އެހެން ނަމަވެސް، ފައްލޯ ދެކޭ ގޮތުގައި ފައިނަލް މެޗުގައި ކުޅުނު ގޭމަށްވުރެ ރަނގަޅު ގޭމެއް ޕޮލިހަށް ކުޅެވޭނެ އެވެ. ޕޮލިސް ޓީމުގައި ޒުވާން އައު ކުޅުންތެރިން ތިބިކަން ފާހަގަކޮށް ފައްލޯ ބުނީ، އެ ކުޅުންތެރިން ދެއްކި ކުޅުމާ މެދު ހިތްހަމަ ޖެހޭ ކަމަށެވެ.

މީގެ އިތުރުން ފައްލޯ ބުނީ ފައިނަލް މެޗުގެ ނަތީޖާއަށްވުރެ ރަނގަޅު ނަތީޖާ ޕޮލިހަށް ނެރެވޭނެ ކަމުގެ ޔަގީންކަން އޮތް ކަމަށެވެ. އޭނާ ބުނީ މެޗުގައި ވެމްކޯގެ ކުޅުންތެރިންގެ ކުޅުން ވަރަށް ބޮޑަށް ރަނގަޅު ކަމަށެވެ. ސަބަބަކީ އެ ކުޅުންތެރިންނަކީ ޤައުމީ އަންހެން ޓީމުގައި ވެސް ހިމެނޭ ކުޅުންތެރިންނަށް ވެފައި، އެ ކުޅުންތެރިންގެ ތަޖުރިބާ ވެސް ރަނގަޅުވުން ކަމަށް ފައްލޯ ވަނީ ބުނެފަ އެވެ.

އިތުރަށް ވާހަކަ ދައްކަމުން ފައްލޯ ބުނީ، ކުރިއަށް ހުރި މުބާރާތްތަކަށް ޕޮލިސް ކުލަބުގެ ތައްޔާރީތައް ރަނގަޅު ވާނެ ކަމަށެވެ. އެ މަސައްކަތާއެކު، ކުރިއަށް އޮތް މުބާރާތުގައި މިއަށްވުރެ ރަނގަޅު ނަތީޖާއެއް ނެރުމަށް ގަދައަޅާ މަސައްކަތް ކުރާނެ ކަމުގައި ވެސް ފައްލޯ ވަނީ ބުނެފަ އެވެ.