ޔޫތު ޗެމްޕިއަންޝިޕްގެ ޗެމްޕިއަންކަން ވެލެންސިޔާއަށް

އެފްއޭއެމް 16 އަހަރުން ދަށުގެ ޔޫތު ޗެމްޕިއަންޝިޕްގެ ޗެމްޕިއަންކަން ކްލަބް ވެލެންސިޔާއިން ހޯދައިފިއެވެ.

މުބާރާތުގެ ތަށި ވެލެންސިޔާއިން އުފުލާލީ ފައިނަލް މެޗުގައި 2-1ން ޔުނައިޓެޑް ވިކްޓްރީ (ޔޫވީ) ގެ މައްޗަށް ކުރި ހޯދައިގެންނެވެ. ވާދަވެރި ކުޅުމެއް ފެނުނު މި މެޗުގެ ފުރަތަމަ ހާފުގައި ވެލެންސިޔާއިން ލީޑު ނެގީ ލިބުނު ޕެނަލްޓީއެއްގެ ބޭނުން ހިފައިގެންނެވެ. މެޗުގެ 22 ވަނަ މިނެޓުގައި ވެލެންސިޔާގެ އަގްސަން އަހުމަދު ނަސީމް ފޮނުވާލި ޕެނަލްޓީ ޔޫވީގެ ކީޕަރުގެ އަތުގައި ޖެހިފައި ނިކުތުމުން ގޯލުގެ ތެރެއަށް ފޮނުވާލީ އަގްސަންއެވެ.

ފުރަތަމަ ހާފުގައި ލީޑު ފުޅާކުރަން ވެލެންސިޔާއަށް ފުރުސަތު ލިބުނެވެ. ނަމަވެސް އޭގެ ބޭނުން ހިފޭގޮތް ނުވިއެވެ. ނަތީޖާ ހަމަހަމަ ކުރަން ޔޫވީއަށް ލިބުނު ފުރުސަތުގެ ބޭނުންވެސް ނުހިފުނެވެ.

ދެވަނަ ހާފުގެ 55 ވަނަ މިނެޓުގައި ވެލެންސިޔާއަށް ލީޑު ނަގައިދިން އަގްސަންއަށް ވަނީ ދެ ރީންދޫ ކާޑާއެކު ރަތް ކާޑު ދައްކާފައެވެ. އެހެންކަމުން ދެވަނަ ހާފުގެ ބޮޑު ބައެއް ވެލެންސިޔާއިން ކުޅުނީ 10 ކުޅުންތެރިންނާއެކުއެވެ.

ފުރުސަތުގެ ބޭނުންހިފާ ޔޫވީން މަސައްކަތްކުރީ ނަތީޖާ ހަމަހަމަ ކުރުމަށެވެ. ނަމަވެސް ކައުންޓަރ އެޓޭކެއްގައި ލިބުނު ހުސް ފުރުސަތެއްގައި ވެލެންސިޔާއިން ވަނީ އިތުރު ލަނޑެއްޖަހާ ލީޑު ފުޅާކޮށްފައެވެ. ޔޫވީގެ އޭރިއާ ތެރެއަށް ބޯލަ ހިފައިގެން ވަދެ ގޯލުގެ ދުރުކަނަށް ބޯޅަ ފޮނުވާލައިގެން ވެލެންސިޔާއަށް ލީޑު ފުޅާކޮށްދިނީ އައިހަމްއެވެ.

މިއާއެކު ޔޫވީން އިތުރަށް ކުރިއަށް ޖެހިގެން ނަތީޖާ ހަމަހަމަ ކުރުމަށް މަސައްކަތް ކުރިއެވެ. މެޗުގެ 70 ވަނަ މިނެޓުގައި ޔޫވީގެ ހަމައެކަނި ލަނޑު ކާމިޔާބކޮށްދިނީ މުހައްމަދު ރަޒާންއެވެ. މިއީ ކޯނަރަކުން އައި ބޯޅައެއް ގޯލުގެ ދުރު ކަނަށް ފޮނުވާލައިގެން އޭނާ ކާމިޔާބުކުރި ލަނޑެވެ.

ނަތީޖާ ހަމަހަމަ ކުރުމަށް ޔޫވީއަށް ގިނަ ފުރުސަތުތަކެއް ލިބުނު ނަމަވެސް ބޭނުމެއް ނުހިފުނެވެ. އެޓީމުގެ އަރުޝަދު ވެލެންސިޔާގެ އޭރިއާތެރެއަށް ވަދެ ފޮނުވާލި ބޯޅަ ގޯލަށް ވަނަނުދީ މަތަކުރީ ވެލެންސިޔާގެ ކީޕަރެވެ. އޭރިއާ ބޭރުން ރަޒާން ފޮނުވާލި ބާރު ހަމަލާ ގޯލާއި ދިމާނުވިއެވެ.

ފޯރިގަދަ ފައިނަލް މެޗުގެ މޮޅު ކުޅުންތެރިއަކީ ވެލެންސިޔާގެ އައިހަމްއެވެ. ހަ ލަނޑު ޖަހައިގެން މުބާރާތުގެ ރަން ބޫޓު ހާސިލްކުރީ ވެލެންސިޔާގެ އަގްސަންއެވެ. އެންމެ މޮޅު ކޯޗަކަށް ހޮވުނީ ވެލެންސިޔާގެ ކޯޗު އާދަމް އަބްދުއްލަތީފް (ލައްޗޭ) އެވެ. ފެއަރ ޕްލޭ ޓީމަކީ ދަ ގްރާންޑޭ ސްޕޯޓްސް ކްލަބްއެވެ.

މުބާރާތުގެ ޑްރީމް ޓީމުގައި ވެލެންސިޔާގެ ފަސް ކުޅުންތެރިން ހިމެނުނެވެ. އެއީ ޔޫސުފް ނަމިިކް، ކެޕްޓަން މުހައްމަދު ޖޫދު، އަހްމަދު ހަމްދާންގެ އިތުރުން ރަޒީން އަދި އަގްސަންއެވެ. ޑްރީމް ޓީމުގައި ދެން ހިމެނުނީ ޔޫވީގެ އަޒުލާން، މުހައްމަދު އުނައިޝް، ރަޒާން އަދި އަހުމަދު އަލްތަފް އަޒީމް އަދި ޓީސީގެ ޔޫސުފް އާއިޝް އާއި އީގަލްސްގެ އަޝްހަމް އިބްރާހިމްއެވެ.